Yema Cuáü̃ nüxü̃ dauxü̃ i yixcüra tá ngupetüxü̃chiga 1
1
Ore ga Cuáü̃xü̃ nüxü̃ nacua̱xẽxẽxü̃ ga Ngechuchu ya Cristu
1Ñaa nixĩ ga yema ore ga Tupana Ngechuchu ya Cristuxü̃ nüxü̃ nacua̱xẽẽxü̃ nax nüxĩ́ norü duü̃xü̃güxü̃ nüxü̃ nacua̱xẽẽxü̃ca̱x i ngẽma paxa tá ínguxü̃. Rü nüma ga Ngechuchu ya Cristu rü norü orearü ngeruxü̃ ga daxũcüã̱xü̃ namu nax norü duü̃ ga Cuáü̃maxã nüxü̃ yaxuxü̃ca̱x.
2Rü nüma ga Cuáü̃ rü nüxí meama nüxü̃ nixu ga guxü̃ma ga yema nüxü̃ nadauxü̃. Rü nanaxümatü ga guxü̃ma ga yema Tupanaarü ore ga Ngechuchu nüxü̃ ixuxü̃.
3Rü tataãxẽ ya yíxema nawa ngúe i ñaa Tupanaarü ore. Rü ngẽxgumarüxü̃ ta tataãẽgü ya yíxema nüxü̃ ĩnüexe rü naga ĩnüexe i ñaa ore i ümatüxü̃ nachiga i ngẽma tá ínguxü̃, erü paxa tá ningu i ngẽma nüxü̃ yaxuxü̃.
Cuáü̃ nanaxümatü naxca̱x ga yema 7 tücumü ga yaxõgüxü̃ ga Áchiaanewa yexmagüxü̃
4Rü choma i Cuáü̃ rü pexca̱x chanaxümatü i pema i 7 tücumügü i yaxõgüxe i Áchiaanewa ngẽxmagüxe. Rü chanaxwa̱xe i pexü̃ narüngü̃xẽxẽ rü pexü̃ nataãẽxẽxẽ ya yimá Tupana ya woetama yexmacü rü ñu̱xma ngẽxmacü rü guxü̃gutáma ngẽxmacü. Rü ngẽxgumarüxü̃ ta chanaxwa̱xe i pexü̃ narüngü̃xẽxẽ rü pexü̃ nataãẽxẽxẽ i ngẽma 7 i Naãxẽgü i Tupanaarü tochicaxü̃pe̱xewa ngẽxmagüxü̃.
5Rü ngẽxgumarüxü̃ ta chanaxwa̱xe nax pexü̃ nangü̃xẽẽxü̃ rü pexü̃ nataãẽxẽẽxü̃ ya Ngechuchu ya Cristu ga meama nüxü̃ ixucü ga Tupanachiga ga ñoma ga naanewa. Rü nüma nixĩ ga nüxíra yuwa ínadaxü̃. Rü nüma nixĩ i namaxã inacuáxü̃ i guxü̃ma i ñoma i naanewa ngẽxmagüxü̃ i nachixü̃anegüarü ãẽ̱xgacügü. Rü nüma rü tüxü̃ nangechaü̃, rü nagümaxã tüxü̃́ inayanaxoxẽxẽ i tórü pecadugü.
6Rü ñu̱xma nax guxü̃arü ãẽ̱xgacü yixĩxü̃ i nümax, rü tüxü̃ naxüchica i ngextá nüma ãẽ̱xgacü íyixĩxü̃wa. Rü chacherdótegüxü̃ tüxü̃ nixĩgüxẽxẽ nax Nanatü ya Tupanaaxü̃́ ipuracüexü̃ca̱x rü nüxü̃ icua̱xüü̃güxü̃ca̱x. Rü name nixĩ i guxü̃gutáma Cristuxü̃ ticua̱xüü̃gü, erü nüma rü guxü̃gutáma guxü̃arü ãẽ̱xgacü nixĩ. Rü ngẽmaãcü yixĩ.
7¡Rü dücax, marü ningaica nax caixanexü̃gu ínanguxü̃ ya Cristu! Rü guxü̃táma i duü̃xü̃gü nüxü̃ nadau, rü woo ga yema nacanapacütüxü̃güxü̃ rü tá ta nüxü̃ nadaugü. Rü guxü̃ i duü̃xü̃gü i guxü̃ i nachixü̃anecüã̱x rü norü ngechaü̃maxã tá naxauxe i ngẽxguma ínanguxgu i nümax. Rü ngẽmaãcü tá nixĩ.
8Rü nüma ya tórü Cori ya Tupana ya Guxü̃étüwa Ngẽxmacü ya Guxü̃guma Yexmacü rü Ñu̱xma Ngẽxmacü, rü Guxü̃gutáma Ngẽxmaechacü rü ñanagürü: “Chowa nixĩ ga inaxügüxü̃ ga guxü̃ma, rü chowa nixĩ i yacuáxü̃”, ñanagürü.
Cuáü̃ca̱x nango̱x ga Cristu
9Rü choma i Cuáü̃ rü peenexẽ chixĩ. Rü ñu̱xma nax Ngechuchuarü duü̃xü̃ chixĩxü̃ rü pexrüxü̃ chaxãchica i Tupana ãẽ̱xgacü íyixĩxü̃wa. Rü Ngechuchuca̱x pexrüxü̃ ngúxü̃ chinge, natürü nüma pexü̃ naporaexẽẽxü̃rüxü̃ choxü̃ naporaxẽxẽ nax yáxna namaxã chaxĩnüxü̃ca̱x i guxü̃ma i ngẽma ngúxü̃ i chingexü̃. Rü choma rü capaxũ ga Pátmugu chapoxcu naxca̱x nax nüxü̃ chixuxü̃ ga Tupanaarü ore ga Ngechuchuchiga.
10-11Rü wüxi ga yüxüarü ngunexü̃gu rü Tupanaãxẽ ya Üünecü chomaxã inacua̱x, rü chango̱xetü rü choweama nüxü̃ chaxĩnü ga wüxi ga naga ga tagaxü̃ ga ñoma cornétagarüxü̃ ixĩxü̃ ga ñaxü̃ choxü̃: “Chanaxwa̱xe nax wüxi i poperagu cunaxümatüxü̃ i ngẽma nüxü̃ cudauxü̃. Rü ñu̱xũchi chanaxwa̱xe i natanüwa cunamu i ngẽma 7 tücumü i yaxõgüxü̃ i Áchiaanearü ĩanegüwa ngẽxmagüxü̃. Rü yima ĩanegü nixĩ: Epéchiu, rü Echamíra, rü Pérgamu, rü Tiatíra, rü Chárdex, rü Filadélfia, rü Laodichéa”, ñaxü̃ choxü̃.
12Rü chaugü íchidau nax nüxü̃ chadauxü̃ca̱x nax ta̱xacü yixĩxü̃ ga yema chomaxã idexaxü̃. Rü yexguma chaugü íchida̱u̱xgu rü nüxü̃ chadau ga 7 ga omüarü üruü̃gü ga úirunaxca̱x.
13Rü yema 7 ga omüarü üruü̃güarü ngãxü̃tanüwa nüxü̃ chadau ga wüxi ga duü̃xü̃ ga cha̱u̱xca̱x nax Ngechuchu ga duü̃xü̃xü̃ ixĩcüraü̃xü̃. Nüma rü wüxi ga naxchiru ga mámüxü̃gu nicu̱x rü wüxi ga goyexü̃ ga úirunaxca̱xmaxã nigoyeremü.
14Rü nayae rü nachoxochi ñoma carnéruta̱xa i cho̱xochixü̃rüxü̃ rü ñoma gáuxü̃te̱xe i cho̱xochixü̃rüxü̃. Rü naxẽtü rü ñoma üxüemarüxü̃ niyauracüxü.
15Rü nacutü rü ta niyauracüxü ñoma bróũche i meama iya̱u̱xracüüxẽẽxü̃rüxü̃. Rü yexguma yadexaxgu rü natagaxüchi ñoma taxü̃ i dexá i chuxchuxü̃rüxü̃.
16Rü norü tügüneme̱xẽwa nüxü̃́ nayexma ga 7 ga woramacurigü. Rü naã̱xwa ínaxũxũ ga wüxi ga tara ga guxü̃cüwawa téxü̃. Rü nachiwe rü ñoma üa̱xcü poraãcü ngu̱xetügurüxü̃ nixĩ.
17Rü yexguma nüxü̃ chada̱u̱xgu, rü nape̱xegu chayangu ñoma chayuxü̃rüxü̃. Natürü ga nüma rü norü tügüneme̱xẽmaxã choxü̃ ningõgü, rü ñanagürü choxü̃: “¡Taxṹ i cumuü̃xü̃! Choma nixĩ i chaxíra chayexmaxü̃ rü guxü̃gutáma changexmaechaxü̃.
18Rü ñu̱xma rü chamaxü̃. Rü woo chayu, natürü ñu̱xma chamaxü̃ nax guxü̃gutáma chamaxechaxü̃ca̱x. Rü choma nixĩ i namaxã ichacuáxü̃ i ngẽma yu, rü namaxã ichacua̱x i ngẽma nachica i yuexü̃ nawa ngẽxmagüxü̃.
19Rü ñu̱xma rü chanaxwa̱xe i cunaxümatü i ngẽma marü nüxü̃ cudauxü̃. Rü ngẽma nixĩ i ngẽma ñu̱xma ngupetüxü̃, rü ngẽma yixcüra tá ngupetüxü̃.
20Rü ñu̱xma rü tá cumaxã nüxü̃ chixu i ta̱xacüchiga nixĩ ya yimá 7 ya woramacurigü ya chorü tügüneme̱xẽwa nüxü̃ cudaucü rü ngẽma 7 i omüarü üruü̃gü i úirunaxca̱x. Rü yimá 7 ya woramacurigü ya nüxü̃ cudaucü, rü ngẽma nixĩ i ngẽma dauruü̃gü i ngẽma 7 tücumü i yaxõgüxü̃maxã icua̱xgüxü̃. Rü ngẽma 7 i omüarü üruü̃gü rü ngẽma nixĩ i ngẽma 7 tücumü i yaxõgüxü̃”, ñanagürü choxü̃.
Currently Selected:
Yema Cuáü̃ nüxü̃ dauxü̃ i yixcüra tá ngupetüxü̃chiga 1: tcaP
Highlight
Share
Copy
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.