Popera ga Yudíugü ga yaxõgüxü̃ca̱x ümatüxü̃ 1
1
Tupana rü Nanewa tamaxã nidexa
1Nũxcüma ga Tupana rü mue̱xpü̱xcüna rü naguxü̃raü̃xü̃ãcüma norü orearü uruü̃güwa tórü o̱xigümaxã nidexa.
2Natürü i ñomaü̃cüxü ya Tupana rü Nanewatama nixĩ i tamaxã yadexaxü̃. Rü Nanemaxã nixĩ ga naxüaxü̃ ga ñoma ga naane rü daxũguxü̃ ga naane rü üa̱xcü rü tauemacü rü woramacurigü. Rü ñu̱xũchi gumá Nanena nanana ga guxü̃ma ga yema nax noxrü yixĩxü̃ca̱x.
3Rü Nanewa nixĩ i nüxü̃ idauxü̃ nax ñuxãcü naxüünexü̃ i nüma ya Tupana. Rü nüma ya Nane, rü Nanatü ya Tupanarüü̃tama nixĩ. Rü ñu̱xma nax guxü̃arü ãẽ̱xgacü yixĩxü̃ ya Nane, rü nüma rü norü orearü poramaxã guxü̃maama inacua̱x. Rü nüma ya Nane nixĩ ga taxca̱x nayuxü̃ nax nüxü̃ rüxoexü̃ca̱x ga tórü pecadugü. Rü yemawena rü Nanatüxü̃tawa naxũ rü yéma Nanatüarü tügünecüwawa nayarüto.
Tupana Nane rü guxü̃ma i orearü ngeruü̃gü i daxũcüã̱xétüwa nangẽxma
4Rü ñu̱xma i nüma ya Nane rü guxü̃ma i Tupanaarü orearü ngeruü̃gü i daxũcüã̱xétüwa nangẽxma yerü yemaacü nanaxuegu ga Nanatü.
5Rü Tupana rü taguma wüxi ga norü orearü ngẽruxü̃ i daxũcüã̱xchiga ñanagürü:
“Cuma nixĩ i Chaune. Rü ñu̱xma chanango̱xẽxẽ nax aixcüma Chaune quixĩxü̃”,
ñanagürü. Rü taguma wüxi ga norü orearü ngẽruxü̃ i daxũcüã̱xchigü ñanagürü:
“Choma nixĩ i Nanatü chixĩxü̃ rü nüma rü Chaune nixĩ”,
ñanagürü.
6Natürü yexguma ñoma ga naanewa namuãgu ga Nane ya nüxíraü̃cü, rü ñanagürü ga Tupana:
“Chanaxwa̱xe i guxü̃ma i chorü orearü ngeruü̃gü i daxũcüã̱x rü nüxü̃ nicua̱xüü̃gü ya Chaune”,
ñanagürü.
7Rü yexguma norü orearü ngeruü̃gü ga daxũcüã̱xchiga yadexaxgu ga Tupana, rü ñanagürü:
“Choma rü chanamu i ngẽma chorü orearü ngeruü̃gü. Rü ñoma buanecürüxü̃ rü ñoma üxüemarüxü̃ chayaxĩgüxẽxẽ nax naxügüã̱xü̃ca̱x i chorü ngúchaü̃”,
ñanagürü.
8Natürü yexguma Nanechiga yadexaxgu ga Tupana rü ñanagürü:
“Cuma nax chauxrüxü̃ Tupana quixĩxü̃ rü guxü̃gutáma ãẽ̱xgacü quixĩ, rü aixcüma meama guxü̃maxã icucua̱x.
9Rü cuma rü nüxü̃ cungechaü̃ i ngẽma mexü̃, rü naxchi cuxai i ngẽma chixexü̃.
Rü ngẽmaca̱x i choma nax Cunatü ya Tupana chixĩxü̃ rü guxãétüwa cuxü̃ changexmaxẽxẽ rü guxü̃ i cumücügüarü yexera cuxü̃ chataãẽxẽxẽ”,
ñanagürü.
10Rü yexgumarüxü̃ ta Nanexü̃ ñanagürü ga Tupana:
“Cuma nax guxü̃arü Cori quixĩxü̃, rü noxriarü ügügumama ga yexguma nataxuxgutama ga ñoma ga naane, rü cuma nixĩ ga cunaxüxü̃.
Rü cumatama nixĩ ga cunaxüxü̃ ga üa̱xcü rü tauemacü rü guxü̃ma ga woramacurigü.
11Rü guxü̃ma i ngẽma rü tá inayarütaxu, natürü i cuma rü guxü̃gutáma cungexmaecha.
Rü guxü̃ma i ngẽma rü ñoma naxchirurüxü̃ tá nangaue.
12Rü ñoma wüxi i naxchiru i ngauxü̃ i ngéma ita̱xmarexü̃rüxü̃ tá ícunawogü i ñoma i naane rü guxü̃ma i daxũwa nüxü̃ idauxü̃.
Rü to i ngexwacaxü̃xü̃maxã tá cunaxüchicüü, ñoma wüxi i naxchiru i ngauxü̃ i ngexwacaxü̃xü̃maxã ixüchicüüxü̃rüxü̃.
Natürü i cuma rü tá cunaxa̱i̱xrügumaraxü̃echa rü curü taunecü rü taguma nagu̱x”,
ñanagürü ga Tupana.
13Rü Tupana rü taguma wüxi ga norü orearü ngeruü̃xü̃ ga daxũcüã̱xü̃ ñanagürü:
“¡Nua chorü tügünecüwawa rüto ñu̱xmatáta guxü̃ma i curü uanügüxü̃ cuxü̃ charüporamaexẽxẽ!”
ñanagürü.
14Rü guxü̃ma i Tupanaarü orearü ngeruü̃gü i daxũcüã̱x rü naãxẽgü i Tupanaaxü̃́ puracüexü̃ nixĩgü. Rü nüma ya Tupana rü nanamugü nax nüxü̃ yanangü̃xẽẽgüxü̃ca̱x i guxü̃ma i ngẽma duü̃xü̃gü ya Tupana naxwa̱xexü̃ nax nayauxgüãxü̃ i maxü̃ i taguma gúxü̃.
Currently Selected:
Popera ga Yudíugü ga yaxõgüxü̃ca̱x ümatüxü̃ 1: tcaP
Highlight
Share
Copy
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.