Ore i mexü̃ ga Cuáü̃ ümatüxü̃ 21
21
Ngechuchu rü 7 ga norü ngúexü̃güca̱x nango̱x
1Rü yemawena ga Ngechuchu rü wenaxarü norü ngúexü̃güca̱x nango̱x ga naxtaxa ga Tibériaanacüwa. Rü ñaãcü nixĩ ga naxca̱x nangóxü̃.
2Rü wüxiwa nayexmagü ga Chimóü̃ ga Pedru, rü Tumáchi ga Wüxigu Buexü̃maxã naxugüxü̃, rü Natanaé ga Gariréaanegune ga ĩane ga Canácüã̱x, rü Chebedéu nanegü rü taxre ga to ga Ngechuchuarü ngúexü̃gü.
3Rü Chimóü̃ ga Pedru rü ñanagürü nüxü̃: —Tá chayapüchae —ñanagürü. Rü yexguma ga yema togü ga ngúexü̃gü rü nanangãxü̃gü, rü ñanarügügü nüxü̃: —Toma rü tá ta cuwe tarüxĩ —ñanarügügü. Rü yéma naxĩ, rü wüxi ga nguegu nichoü̃. Natürü yema chütaxü̃gu rü taxuxü̃ma ga choxni niyauxgü.
4Rü yexguma noxri yangóonegu rü Ngechuchu naxca̱x nango̱x ga naxtaxaanacüwa. Natürü ga nüma ga norü ngúexü̃gü rü tama nüxü̃ nacua̱xgü nax Ngechuchu yixĩxü̃.
5Rü yexguma ga Ngechuchu rü nüxna naca, rü ñanagürü nüxü̃: —Pa Ngextü̱xücügüx, ¿taxuxü̃ma i perü choxni? —ñanagürü. Rü nümagü rü nanangãxü̃gü rü ñanarügügü: —Taxuxü̃ma —ñanarügügü.
6Rü yexguma ga Ngechuchu rü ñanagürü nüxü̃: —¡Peweü̃arü tügünecüwawaama penatáe i perü pücha! rü tá ípenayauxü̃ i choxni —ñanagürü. Rü yémaama nanatáegü ga norü pücha, rü taxucürüwa ínanatúãchigü, yerü muxũchixü̃ ga choxni niyauxgü.
7Rü yexguma ga yema ngúexü̃ ga Ngechuchu poraãcü nüxü̃ ngechaü̃xü̃ rü Chimóü̃ ga Pedruxü̃ ñanagürü: —Yimá nixĩ ya Cori ya Ngechuchu —ñanagürü. Rü yexguma yemaxü̃ naxĩnügu ga Pedru ga gumá nax yixĩxü̃ ga Cori, rü nicuxcuchi ga naxchiru yerü noxri rü ínacuxuchi. Rü natüchíüwa nayuxu, rü naxãnacüwa nawẽxẽ.
8Rü yema togü ga natanüxü̃ rü nguemaãtama naxãnacüwa naxãgü. Rü yéma nanatúgü ga yema pücha ga choxnimaxã ããcuxü̃, yerü 100 metruxicatama nataxu nax naxãnacüwa nangugüxü̃.
9Rü yexguma nguewa ínachoü̃gu rü yéma nüxü̃ nadaugü ga wüxi ga üxü. Rü naétügu naxǘ ga wüxi ga choxni, rü nayexma ta ga wüxi ga paũ.
10Rü Ngechuchu rü ñanagürü nüxü̃: —¡Nuata penge i ñuxre i ngẽma choxni i ípeyauxü̃xü̃! —ñanagürü.
11Rü Chimóü̃ ga Pedru rü nguegu nixüe. Rü yema püchamaxã naxnecügu ínanatúãchiwetaxü̃ ga choxni ga ínayauxü̃xü̃. Rü 153 ga choxni ga ítáxü̃ nayexma nawa ga yema pücha. Rü woo nax namuxũchixü̃, rü tama narügáu ga pücha.
12Rü yexguma ga Ngechuchu rü ñanagürü nüxü̃: —¡Nua pexĩ rü peyachibüe! —ñanagürü. Rü taxuxü̃ma ga norü ngúexü̃gü rü nüxna nacaxchaü̃ nax texé yixĩxü̃ ga nümax, yerü marü nüxü̃ nacua̱xgü nax gumá yixĩxü̃ ga Cori ga Ngechuchu.
13Rü yexguma ga Ngechuchu rü naxü̃tawa naxũ. Rü nanayaxu ga paũ rü wüxichigüna nanaxã. Rü yexgumarüxü̃ ta ga choxni rü nüxna nanaxã.
14Rü yema nixĩ ga norü tomaepü̱xcüna nax norü ngúexü̃güca̱x nangóxü̃ ga Ngechuchu nawena nax yuwa ínadaxü̃.
Ngechuchu rü Chimóü̃ ga Pedrumaxã nidexa
15Rü yexguma chibüewa yangugüguwena rü Ngechuchu rü Chimóü̃ ga Pedruna naca, rü ñanagürü: —Pa Chimóü̃ Pa Cuáü̃ Nanex, ¿aixcüma choxü̃ cungechaü̃xü̃ i ñaa cumücügüxü̃ nax cungechaü̃xü̃arü yexera? —ñanagürü. Rü Pedru nanangãxü̃, rü ñanagürü: —Ngü̃, Pa Corix, cuma nüxü̃ cucua̱x nax cuxü̃ changechaü̃xü̃ —ñanagürü. Rü Ngechuchu rü ñanagürü nüxü̃: —¡Nüxna nadau i chorü duü̃xü̃gü i ñoma carnéruxacügürüxü̃ ixĩgüxü̃! —ñanagürü.
16Rü wenaxarü Pedruna naca, rü ñanagürü: —Pa Chimóü̃ Pa Cuáü̃ Nanex, ¿aixcüma i choxü̃ cungechaü̃xü̃? —ñanagürü. Rü Pedru nanangãxü̃, rü ñanagürü: —Ngü̃, Pa Corix, cuma nüxü̃ cucua̱x nax cuxü̃ changechaü̃xü̃ —ñanagürü. Rü Ngechuchu rü ñanagürü nüxü̃: —Ẽcü, ¡nüxna nadau i chorü duü̃xü̃gü i ñoma carnérugürüxü̃ ixĩgüxü̃! —ñanagürü.
17Rü norü tomaepü̱xcüna Pedruna naca, rü ñanagürü: —Pa Chimóü̃ Pa Cuáü̃ Nanex, ¿aixcümaxü̃chi yixĩxü̃ i choxü̃ cungechaü̃xü̃? —ñanagürü. Rü yexguma ga Pedru rü nangechaü̃, yerü norü tomaepü̱xcüna Ngechuchu nüxna naca rü aixcüma nüxü̃ nangechaü̃. Rü ñanagürü ga Pedru: —Pa Corix, cuma nüxü̃ cucua̱x i guxü̃ma. Rü cuma nüxü̃ cucua̱x nax aixcümaxü̃chi cuxü̃ changechaü̃xü̃ —ñanagürü. Rü Ngechuchu ñanagürü nüxü̃: —Ẽcü, ¡nüxna nadau i chorü duü̃xü̃gü i ñoma carnérugürüxü̃ ixĩgüxü̃!
18Rü aixcüma cumaxã nüxü̃ chixu rü yexguma cungextü̱xügu rü cugü quicu̱xcuchi nax ngextá cuma ícunaxwa̱xexü̃wa cuxũxü̃ca̱x. Natürü ngẽxguma yaxguã̱x quixĩxgu rü tá quixuuchichacüxü nax toguxe cuxü̃ icu̱xcuchixü̃ca̱x. Rü ngẽma tama cuma ícunaxwa̱xexü̃wa tá cuxü̃ nagagü —ñanagürü.
19Rü Ngechuchu rü yema ñanagürü nax nüxü̃ nüxü̃ nacua̱xẽẽxü̃ca̱x nax ñuxãcü tá nayuxü̃ ga Pedru nax yemaacü Tupanaxü̃ nataxẽẽxü̃ca̱x. Rü yemawena ga Ngechuchu rü ñanagürü nüxü̃: —¡Chowe rüxũ! —ñanagürü.
Yema ngúexü̃ ga Ngechuchu poraãcü nüxü̃ ngechaü̃xü̃chiga
20Rü yexguma nügüweama nada̱u̱xgu ga Pedru rü nüxü̃ nadau nax naweama ne naxũxü̃ ga yema ngúexü̃ ga Ngechuchu poraãcü nüxü̃ ngechaü̃xü̃. Rü nüma nixĩ ga chibüwa Ngechuchucüwawa natoxü̃ rü nüxna naca̱xaxü̃ rü ñaxü̃: “Pa Corix, ¿texé tá tixĩ ya yíxema bexma cuxü̃ íxuaxü̃xẽ?” ñaxü̃.
21Rü yexguma Pedru yema ngúexü̃xü̃ da̱u̱xgu rü Ngechuchuna naca, rü ñanagürü: —Pa Corix, ¿ñaa curü ngúexü̃ rü ta̱xacü tá nüxü̃ üpetüxü̃? —ñanagürü.
22Rü Ngechuchu nanangãxü̃, rü ñanagürü nüxü̃: —Ngẽxguma choma chanaxwa̱xegu nax namaxü̃xü̃ ñu̱xmatáta wena núma chaxũ, ¿rü tü̱xcüü̃ i nagu curüxĩnüxü̃ i ngẽma? Rü cuma ¡rü chowe rüxũ! —ñanagürü.
23Rü yexguma yemaxü̃ naxĩnüegu ga namücügü, rü nagu narüxĩnüe nax taxũtáma nayuxü̃ ga yema ngúexü̃. Natürü Ngechuchu rü tama nüxü̃ nixu ga taxũtáma nax nayuxü̃. Natürü ñanagürümare: “Ngẽxguma choma chanaxwa̱xegu nax namaxü̃xü̃ ñu̱xmatáta wena núma chaxũ, ¿rü tü̱xcüü̃ i nagu curüxĩnüxü̃ i ngẽma?” ñanagürümare.
24Rü yema ngúexü̃ ga Ngechuchu nachiga idexaxü̃ nixĩ ga nüxü̃ dauxü̃ ga guxü̃ma ga ñaa nüxü̃ yaxuxü̃ rü nachiga naxümatüaxü̃. Rü nüxü̃ tacua̱x nax aixcüma yixĩxü̃ i ngẽma nüxü̃ yaxuxü̃.
25Rü nayexma ga to ga muxũchixü̃ma ga Ngechuchu üxü̃. Rü ngẽxguma chi naxümatügu i guxü̃ma ga yema naxüxü̃chiga, rü nagu charüxĩnügu rü taxũchima ñoma i naanegu ningu i ngẽma poperagü i ngẽma Ngechuchu üxü̃chiga ixümatügu.
Currently Selected:
Ore i mexü̃ ga Cuáü̃ ümatüxü̃ 21: tcaP
Highlight
Share
Copy
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.