LIZULIZA 10

Musa ahevwa malago kandi

(Kut. 34:1-10)

1“Maku Yahova yambolera, ‘Vaza vibaho viviri via magina kuli iviali viukutanga, kandi olombe lisandugu lie zimbaho uviviiki mu. Hamba ku inzi ku kiguru, 2na inzi ndang'oda ku vibaho zana yivio amakuva gaali ku vibaho viukutunga via watanyia, kandi uviviiki mu lisandugu zana.’

3“Kunangwa, ndalomba lisandugu kutura ku zimbaho ziu musaala gwi kikuma kandi nimbaaza vibaho viviri ku magina kuli viali viukutanga, ninzia navio ku kiguru 4Kunangwa Yahova yang'oda ku vibaho yivio amakuva malala meere aga yaali nang'odi ing'inga yukutanga, amalago likomi aga yahaana ku munyi lwa yamoloma kutura hagati hu muliru ku lidiku lia mwavunga ha kiguru. Yahova yamba vibaho zana; 5kandi ndasulunguta kutura ku kiguru. Maku, kuli Yahova yaali nalagi, ndaviviika mu lisandugu lia ndaali ninombi; kandi viavamu kutura ing'inga yeyo.”

6(Avandu va Isiraeli vatanga samula ku logendo kutura mu vidaho viali via vandu va Jaakani, ni vazia kuduuka Mosera. Haruni yakuzira aheene yaho, ma nayavirwa ho. Elieza, mwana weve yavugula vwiyangu vwivwe kuli musaalisi. 7Vatanga logendo kutura ho kuzia Gudigoda, ma nivazizagilira kuduuka Jotibaza, havundu ha mazi manyingi. 8Yahova yatovola avasaza vi ihiiri ya Levi, valindi Lisandugu lia malago ga Yahova, vamutumikiri kuli avasaalisi kandi kugasiza avandu mu lieta lilie. Yiji ni miyinzi jaavo kali kuduuka kalunu. 9Yiki nicho chagira ihiiri ya Levi yoosi nivavula konyoora kidieli mu kivala kuva miandu jaavo kuli zihiiri zindi zia Isiraeli vanyoola. Icha vanyoola chaali uvwiyangu vwu kuva avasaalisi va Yahova, kuli Yahova Nyasaye winyu yasuuviriza.)

10“Ndaamenya mu kiguru amadiku arubaini mbasu nuvudiku kuli maziambiri. Yahova yambulira ing'inga yeyo kandi navugilira kuvula kumudiviza. 11Kandi Yahova yambolera, ‘Singira, utange logendo lulwo, wimiliri avandu kunzira yavo, kunangwa vaduuki kwingira nokwidikila mu kivala cha ndasuuviriza kuhaana ku avaguuga vinyu.’

Lienya lia Nyasaye

12“Kalunu avandu va Isiraeli, muhuliri aga Yahova Nyasaye winyu yenya munyi mukore: Sigamiri Yahova ma mukora goosi agalagaa. Mumuyaanze, mumutumikiri ni mioyo jinyu josi, na roho jinyu josi, 13kandi muhuliri malago geege goosi, nimiima jije josi iga mbana ku munyi kalunu kulwu vulahi vwinyu aveene.

14“Henza, Ligulu, kali ligulu liu mwigulu ligali, viveeye via Yahova; lirova ni vindu viveeyemu, viosi iviveeye vivie. 15Navuzwa vuyanzi vwa yahova yaali navwo ku avaguuga vinyu vwali ovonene kandi vwizingulu ligali, kali natovora munyi, visukululwi viavo muvogono vwa avandu vandi vosi, kandi mukikiri avandu vatovole veve 16Kunangwa kutura kalunu muve avahuliri ku Yahova kandi mutava vikirage mba. 17Kigira Yahova Nyasaye winyu aveeye Nyasaye wavanyasaye vosi; kandi mwami wa avami, Nyasaye munene, wizingulu kandi wukutihiza; uvula kumanyia liyaanzilira avandu valala kuvita avandi kandi siavugilira kuvugura viambeti mba. 18Akolaa zinguru kolola ndi avavisandu na vakunzakali valindiywi keleng'ani; kandi ayaanza avageni navaha viukulia nezinguvu. 19Kunangwa, muyanze avageni kigira munyi kandi mwaali vageni mu kivala cha Egebeti. 20Mutie Yahova Nyasaye winyu kandi mumusigamiri oyo yeng'ine. Muve avasuuvirifu kuye yeng'ine kandi mulombe amalagano ginyu mu lieta lilie lieng'ine. 21Mumwizominyi, aveeye Nyasaye winyu, niyie wamukolera vindu vinene kandi viokogenyia yivi viamumali kolola nizimoni zienyu munyi aveene. 22Lwa avaguuga vinyu vazia Egebeti, vaali vuzwa avandu sabwini. Navuzwa kalunu, Yahova Nyasaye winyu yamukola kuva avanyingi kuli zing'ereng'ani mu vwerefu.

Currently Selected:

LIZULIZA 10: LOGOOLI

Highlight

Copy

Compare