KINOBAḺIAN 1
INOMOG

KINOBAḺIAN 1

1
Ouman soaḷ pinomaḻían kon dunia
1Kon pinomangkoian, tungkuḷ in ki Allah nomangkoi nomaḻí kon dunia naa,#1:1: Kon pinomangkoian, tungkuḷ in ki Allah … kon dunia naa, ande Kon pinomangkoian ki Allah nomaḻí kon dunia naa, ande Kon pinomangkoian ki Allah nomaḻí kon dunia naa. 2dunia naa in diápa notompiamai, bo diápa doman in tombonunea, nosindipabí komintan, bo Roho i Allah in maya-mayá mako kon tudu in tubig.#1:2 Kon bonu in bahasa Ibrani motaau doman terjemahan táe Roho i Allah ande bo tompot nongkon i Allah ande bo tompot inta moḷoben. 3#Kor.2. 4:6 Ki Allah in noguman, “Kobaḻí in bayag!” Bo nobaḻí domandon in bayag. 4Nopia in gina i Allah nokoontong kon bayag tatua. Bo sinondí-Neadon in bayag tatua nongkon sindip, 5bo sinangoian-Neadon in bayag tatua “Singgai” bo sindip tatua “Doḷom”. Doḷom noitaḻibdon, bo noiangoidon in doḷo-doḷom. Tuata in singgai inta muna.
6-7 # Pet.2. 3:5 Onda intua ki Allah in noguman, “Kobaḻídon tobatú botok kon sigad in tubig sinbá mosilai doyowa in tubig bo oyúon in moidimpot kon tampat inta noitontaní tua.” Bo soaḷ tatua nobaḻí domandon. Natuata in pinomomaḻí i Allah kon botok inta nopoyotondí in tubig inta kon ḻimonag in botok tatua nongkon tubig inta kon ḻimoniknea. 8Botok tatua in sinangoian i Allah “Ḷangit”. Doḷom noitaḻib bo noiangoidon doḷo-doḷom. Tuata in singgai nogindua.
9Noiduduimai kon tua ki Allah noguman, “Koibog-Ku in bayongan tubig inta kon ḻimonag in ḷangit moiḻig kon tampat tobatú, sinbá butá in koontongandon.” Dá nobaḻí domandon intua. 10Butá tatua in sinangoian i Allah “Toba”. bo pinosipunan in tubig tatua sinangoian i Allah “Dagat”. Bo nosanang gina i Allah in nokoontong kon tua. 11Ki Allah in noguman bui, “Koibog-Ku in butá mopoḷuaidon in bayongan inta mobobiag, bayongan inta oyúon in batoḷ bo bayongan ayop.” Bo nobaḻí domandon intua. 12Natuata in nobaḻí, butá nopoḷuaidon in bayongan inta mobobiag. Bo nopia in gina i Allah in nokoontong kon soaḷ tatua. 13Doḷom noitaḻib bo noiangoidon in doḷo-doḷom. Tuata in singgai nogintoḷu.
14-15Noiduduimai kon tua ki Allah in noguman, “Koibog-Ku oyúon in barang mita kon ḷangit inta motaau monimbayag kon dunia naa, bo mopoyotondí in singgai bo doḷom bo monantú kon pomangkoian in singgai, taong bo singgai moḷoben in agama.”#1:14-15 singgai moḷoben agama ande sempo. Dá nobaḻí domandon in soaḷ tatua. 16Dá ki Allah nomaḻí kon barang ponimbayag inta moḷoben, mata in singgai in tangoinea inta mongawasa kon wakutu in singgai, bo buḷan inta mongawasa kon wakutu in doḷom; koḻikud intua binaḻí-Nea doman in tundi mita. 17Barang mita ponimbayag tatua sinampat i Allah kon ḷangit sin ponimbayag kon dunia naa, 18bo mongawasa kon singgai bo doḷom, bo mopoyotondí doman in bayag nongkon sindip. Bo nopia in gina i Allah in nokoontong kon tua. 19Doḷom noitaḻib, bo doḷo-doḷom noiangoidon. Tuata in singgai inta noginggopat.
20Onda intua ki Allah in noguman, “Koibog-Ku kon bonu in tubig mobiag in moyagi-yagimai in mahaḷuk, bo kon toḷungayá mobarong in ḷagapan inta noḷayu-ḷayugan.” 21Dá ki Allah in nomaḻí kon mahaḷuk mita mongoḷoben kon bonu in dagat, bo noyagi-yagimai in mahaḷuk inta nobiag kon bonu in tubig, takin noyagi-yagimai in ḷagapan. Bo nopia in gina i Allah in nokoontong kon tua. 22Ki Allah in nomarakat kon bayongan tua takin nomarenta kon mahaḷuk mita inta nobiag kon bonu in tubig sinbá modugang mobarong bo mopuḻing in dagat, bo nomarenta doman kon ḷagapan mita sinbá modugang doman mobarong. 23Doḷom noitaḻib, bo doḷo-doḷom noiangoidon. Tuata in singgai noginḻima.
24Onda intua ki Allah in noguman, “Koibog-Ku butá mopoḷuai in bayongan mahaḷuk in toba, inta moyonok bo kaḻig, moḷoben ande mointok.” Dá nobaḻí domandon in tatua. 25Natuata in pinomomaḻí i Allah kon tua komintan bo nopia in gina i Allah in nokoontong kon tua komintan.
26 # Kor.1. 11:7 Onda intua ki Allah in noguman, “Tanaa kita in momia kon intau potombatangan in gambar bo pogot naton. Mosia in mongawasa kon toyá mita, ḷagapan mita bo bayongan mahaḷuk pinomayá moyonok ande kaḻig,#1:26: Kon tobatú terjemahan dungkuḷmai: mahaḷuk pinomayá moyonok ande kaḻig, Ibrani: mahaḷuk kaḻig bo dunia naa. pinomayá moḷoben ande mointok.” 27#Mat. 19:4; Mrk. 10:6 Natuata in ki Allah nomia kon intau, pinomia-Nea in mosia naonda bo batangan-Nea tontaní. Pinomia-Nea in mosia ḷoḷaki bo bobay. #Kḻn. 5:1-2 28Onda intua binarakatan-Neadon in mosia poḷat noguman, “Pononggadí bo pononggompudon kobarongon, sinbá buímu in ḻimitú bo mongawasa kon tua mita. Moiko in ogoian-Ku in oaidan monompia kon toyá mita, ḷagapan mita, bo bayongan mahaḷuk ibanea inta kaḻig. 29Bo aka soaḷ kaanon monimu yo ogoi-Ku in bayongan mobobiag inta kobatoḷ bo bayongan in ayop. 30Táe kon bayongan in ḷagapan bo mahaḷuk ibanea, ogoi-Ku in bonok bo pinomuḷa inta oyúon in daunnea saḷaku kokaanon monia.” Dá soaḷ tatua in nobaḻí domandon. 31Ki Allah in inimindoi kon bayongan inta ain pinomia-Nea tatua, bo nopia totok in gina-Nea. Doḷom noitaḻib bo namangoidon in doḷo-doḷom. Tuata in singgai inggonomnea.

Alkitab Singog In Mongondow Masa In Tanaa © Indonesian Bible Society, 2016.


Learn More About Alkitab Singog In Mongondow Masa In Tanaa

Encouraging and challenging you to seek intimacy with God every day.


YouVersion uses cookies to personalize your experience. By using our website, you accept our use of cookies as described in our Privacy Policy.