YEREMIA 37
37
Oigum i Zedekia kon i Yeremia
1 #
Dat.2. 24:17; Taw.2. 36:10 Kon tungkuḷ in ki Nebukadnezar datu in Babel nopogogai kon i Yoyakhin ki adí i Yoyakim, sia in noduí kon i Zedekia ki adí i Yosia nobaḻí datu in Yohuda. 2Táe pinomayá ki Zedekia andeka pojabatnea mita bo rayatnea doíbí dinumudui kon koyow i Tuhan inta inogoi-Nea pinongin inakó.
3Ki Datu Zedekia in nopotabá kon i Yukhal ki adí i Selemya, bo ki Imang Zepanya ki adí i Maaseya sin mopoigum sinbá akuoi in mosambayang kon i Tuhan Allah sin kopontingan in bangusa. 4Kon dodai intua akuoi in diápabí binonu kon ponjara bo motaaupabí in maya-mayá mako kon yua-yuak in rayat. 5Tontara in Babel koyogot in mongopung kon Yerusalem, táe naonda in dinongog monia kon tontara in Mesir ain nobuat nongkon Mesir sin moparang, inumundok in mosia.
6Ki Tuhan, Allah in Israel, nopotabá kon inakó 7noguman nanaa kon totabá i Datu Zedekia: “Pogumandon kon i Zedekia, ‘Tontara in Mesir inta nion tayo-tayow mangoi sin motuḷung kon inimu, in momurowbí bo mobui. 8Bo intau in Babel in mobui mangoi bo monubu kon kotá tanaa, poḷat monaḷow bo monurub. 9Akuoi, ki Tuhan, mopotoingat kon i monimu, sinbá dika monompobaḻik kon awakmu tontaní takin morai kon intau in Babel ain minayá bo diádon mobui mangoi. Sin notantú bidon kon mosia in mobuibí mangoi. 10Aka kuma bo moiko in mokotaḷow kon bayongan in tontara in Babel modapot in inta kinotaḷáan in dongkadon intau mita inta kinekeban modaḷom kon bonu in ḷoḷaigan monia, táe mosia in mobangonbí bo monurub modapot in mopayong in kotá tanaa.’ ”
Ki Yeremia in dinomok bo pinobonu kon ponjara
11Tontara in Babel inumundok nongkon Yerusalem popisí in tontara in Mesir nopoangoi in kotá tatua. 12Dá akuoi in nonaḷámaidon kon Yerusalem bo minayá in butá in Benyamin sin motarima kon posilaian kon tonsilaiku in butá kapunyaan in motoḷuadíku. 13Táe kon dodai in akuoi kon Bonawang in Benyamin, itoi in tontara inta noḷukad tungkuḷ intua nonahang kon inakó bo noguman, “Iko in moḷagui mayá kon dotá in intau in Babel!” (Tangoi in porwira tatua in ki Yeria; sia in ki adí i Selemya ki ompu i Hananya.)
14Tubagku, “Diábí totuu! Diábí in makusudku moḷagui mayá kon dotá in musung.” Táe ki Yeria in doíbí mokidongogmai. Dinomoknea in akuoi bo dinia pinotayow kon pojabat mita in pomarenta. 15Sinumorú totok in mosia kon inakó, bo nomarenta sinbá bongkugon in akuoi bo kurungon kon baḷoi i Yonatan, momomais in negara. Baḷoi tatua in binaḻídon ponjara. 16Akuoi in binonu kon tabang tobatú kon bonu in butá, bo noonggot in akuoi sinahang kon tua.
17Onda intua ki Datu Zedekia nopotabá kon intau sin modia kon inakó pobayá in komaḻig kon inia. Kon tua inumuni uni in sia noḻibó kon inakó mongo oyúon in koyow nongkon i Tuhan.
“Oyúon,” tubagku. Bo akuoi in noguman, “Ki Tuang datu in ogoi kon i datu in Babel.” 18Nopaḷut mako kon tua akuoi in noḻibó, “Aid moraat onu in inaidanku kon i Tuang datu andeka kon pojabat mita andeka kon rayat, nodapot in akuoi pinobonu i Tuang datu kon ponjara? 19Kon onda in nabi mita i Tuang datu tua inta noguman kon datu in Babel tua in diábí monubu kon i Tuang bo butá tanaa? 20Tanaa, Tuang datu inta momulia, indongogaipa kaasí in oigumku tanaa. Dikadon pokidia bui i Tuang datu in akuoi kon ponjara kon baḷoi i Yonatan tua, sin matoi in akuoi kon tua.”
21Dá ki Datu Zedekia in nomarenta sinbá akuoi in ponjaraandon kon palas in komaḻig. Dá akuoi in nogutun kon tua, bo pomuḷoi in singgai akuoi ogoian in roti nongkon tampat pogogaidan kon roti nodapot in tongkaaḷ in roti kon kotá tatua nodaitdon komintan.
Currently Selected:
YEREMIA 37: INOMOG
Highlight
Copy
Compare
Share
Want to have your highlights saved across all your devices? Sign up or sign in
Alkitab Singog In Mongondow Masa In Tanaa © Indonesian Bible Society, 2016.
