YouVersion Logo
Search Icon

KALOWARAN 15

15
Nyanyeyanna Mosa ban Isra'il
1 # Why. 15:3 Mosa ban reng-oreng Isra'il laju anyanye amolja'agi PANGERAN,
“Sengko' anyanyeya amolja'agiya PANGERAN,
sabab PANGERAN la mennang tadha' tandhinganna.
Jaran ban orengnga se nompa'
padha eontallagi ka tase'.
2 # Jab. 118:14; Yes. 12:2 PANGERAN reya tang kakowadan;
se apareng kasalameddan.
PANGERAN reya tang Allah,
se esemba tang bangatowa,
sengko' anyanyeya mojiya kaagunganna.
3PANGERAN reya pahlawan perrang;
PANGERAN, jareya asmana.
4Tantara Messer ban ta-karetana
eontallagi ka tase'.
Para parwira peleyanna epatasellem e Tase' Galagas
tadha' karena maske settonga.
5Badanna padha ban bato se raja
nyellem ka dhasarra tase' se dhalem.
6Asta kanganna Junandalem, GUSTE,
talebat makasambu' ate,
sabab kakowadanna
maancor moso sadajana.
7Kalaban kakobasa'an se tadha' bandhinganna
Junandalem mangalotor sadajana manossa
se ta' atoro' ka Junandalem.
Dadukanna Junandalem akadi apoy se rabbang
se makatonon moso akadi oreng ngobbar darameyan.
8Junandalem nyerrop tase' kantos aengnga apesa madhuwa agulung ce' tenggina,
manjeng akadi geddhung,
dhasarra ekenneng lebadi oreng.
9Ca'epon moso, ‘Oreng Isra'il se buru rowa bi' sengko' eserserra pas epega'a,
dhi'-andhi'na erampasa,
egi-bagiya sakanca'an.
Tang peddhang eonosa,
epamateyana moso epatadha'a karena.’
10Namong, Guste, sakaleyan saos ekenneng serrop sareng Junandalem, oreng Messer padha tasellem,
akadi tema se berra' nyellem ka tase' se dhalem.
11Allah se ka'imma se nandhinge Junandalem, Guste,
PANGERAN Se Mahamolja sareng socce?
Pasera se oneng mabadha kaajiban
sareng lalakon se kasohor tadha' bandhinganna
akadi Junandalem, Guste?
12Manabi asta kangannepon Junandalem epangaceng,
sadajana moso mosna tabendhem ka dhalem bume se petteng.
13Bangsa se epasalamet sareng Junandalem ka'dhinto, terros etonton kalaban taresna sareng esto,
sabab Junandalem neptebbi janji se ampon edhabuwagi.
Kalaban kakowadan se raja
reng-oreng gapaneka sareng Junandalem elindhunge sarta etonton ka tanana Junandalem se socce.
14-15Sa-bangsa se mereng padha katako'en;
oreng Filistin padha gujuden.
Para pamimpinna Edom padha katako'en;
reng-oreng Mo'ab se neggu' kakobasa'an padha ngetter.
Oreng Kana'an atena kercet.
16Sadaja padha katako'en
nyaksene kakowadanna Junandalem.
E bakto ommattepon Junandalem lebat
moso ta' kobasa lang-ngalange.
17Isra'il sareng Junandalem ebakta
ka nagara se sareng Junandalem epele
menangka kalenggiyanna Junandalem,
sareng Junandalem epaneptep salanjangnga
e gunong se socce kaagunganna Junandalem,
e kennengnganna oreng abakte ka Junandalem,
se ebadhi sareng Junandalem dibi'.
18Junandalem ka'dhinto PANGERAN, Rato
se marenta salanjangnga.”
Nyanyeyanna Miriyam
19E bakto jareya reng-oreng Isra'il alengka'a tase', ajalan e dhasarra tase' se la daddi kerreng. Tape e bakto ta-karetana bangsa Messer ban jaranna sarta reng-orengnga se nompa' padha maso' ka dhasarra tase' jareya, bi' PANGERAN aengnga epacampo pole epadaddi settong, oreng Messer padha mate tasellem kabbi.
20Saellana jareya Miriyam, se daddi nabbi bine' rowa, embugga Harun, mondhut terbangnga. Babine'an laenna noro' nabbu terbangnga bi'-dibi' sambi padha atari. 21Miriyam pas anyanye mimpin babine'an gella',
“Mara padha anyanye amolja'agi PANGERAN,
sabab PANGERAN mennang e dhalem paperrangan.
Jaran ban reng-orengnga se nompa'
eontallagi ka tase' tadha' karena.”
Aeng se pae'
22Saellana jareya bi' Mosa bangsa Isra'il ebakta dhari Tase' Galagas ka sagara beddhi Syur. Se ajalan e ra-ara jareya tello are abidda. Saabidda tello are jareya ta' nemmo aeng sakale. 23Saellana jareya reng-oreng Isra'il pas napa' ka kennengngan se anyama Mara, e jadhiya badha aengnga, tape aengnga ta' ekenneng enom, polana ce' pae'na. Daddi kennengngan jareya enyamae Mara,#15:23 Mara: Nyama reya e dhalem basa Ibrani artena “pae'”. artena pae'. 24Oreng Isra'il aseddhiyan ka Mosa, oca'na, “Marena pas ponapa se eenoma kaula?” 25Mosa adu'a epagu-onggu, nyo'on ka PANGERAN. PANGERAN pas noduwagi kaju ka Mosa. Bi' Mosa kaju jareya eontallagi ka dhalem aeng gella'; aengnga laju tabar, ekenneng enom.
E kennengngan jareya PANGERAN marengngagi kom-hokomma ka reng-oreng Isra'il, se kodu etoro' ban ejalannagi. E jadhiya PANGERAN nyoba' kaestowanna oreng Isra'il jareya. 26Dhabuna PANGERAN, “Mon ba'na ngestowagi Tang oca' epagu-onggu ban ajalannagi sabarang se bi' Sengko' eanggep becce', sarta atoro' ka sakabbinna Tang parenta, bi' Sengko' ba'na ta' eokoma ban panyaket akantha se epakenneng ka oreng Messer rowa. Sabab Sengko' reya PANGERAN se mabaras ba'na.”
27Saellana jareya reng-oreng Isra'il gella' napa' ka kennengngan se anyama Elim. E jadhiya badha somberra dhubellas meggi' ban bungkana korma pettong polo po'on. Oreng Isra'il jareya laju akemah e seddi'anna aeng jareya.

Currently Selected:

KALOWARAN 15: MAD

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy