1 TO-RATO 1
1
Rato Daud e bakto seppona
1Sateya Rato Daud la ce' seppona. Maske esapo'e epakandel, gi' paggun kecellebben. 2Daddi ba-ponggabana padha mator, “Guste, kadi ponapa manabi junandalem enyareyagi paraban ngodha, me' olle arabat junandalem! Pakon ngellone junandalem me' olle junandalem arassa anga'.” 3-4Reng-oreng jareya pas nyare paraban se raddin. Neng e Sunem reng-oreng jareya nemmo paraban se raddin nyamana Abisag. Abisag jareya egiba ka rato, epanoguwi ban eparabat rato. Tape rato ta' asaren apolong ban paraban jareya.
Adoniya agugat daddiya rato
5-6 #
2Sam. 3:4
Sarrena Absalom la seda, Adoniya, pottrana Daud se nomer dhuwa' daddi se paleng towa. Ebuna Adoniya jareya Hagit. Adoniya jareya bagus robana, ta' tao edukane bi' ramana maskeya andhi' sala. Adoniya terro daddiya rato, daddi laju nyadhiya'agi kareta perrang ban tantara jaran sarta pangawal pribadhi se bannya'na saeket oreng. 7Saellana jareya Adoniya pas arembak ban Yowab sarta Imam Abyatar. Ebuna Yowab nyamana Zeruya. Yowab ban Imam Abyatar nyanggubi nolongana Adoniya. 8Tape Imam Zadok, Benaya ana'na Yoyada, Nabbi Natan, Simei, Rei ban pangawal pribadhina Rato Daud ta' nolonge Adoniya.
9E settong are e kennengngan se anyama Bato Olar e seddi'na somber En-Rogel, Adoniya ngatorragi kurban dumba, sape lake' ban budhu'na sape po-lempo. Tra-pottrana Daud se laen, ban ba-ponggabana karaton se tamaso' suku Yehuda eonjang ka pesta kurban jareya. 10Tape Sulaiman ale'na se laen ebu, ban Nabbi Natan sarta Benaya ban pangawal pribadhina rato ta' eonjang ka pesta kurban jareya.
Sulaiman epajumenneng rato
11 #
2Sam. 12:24
Daddi Nabbi Natan manggi'i Batsyeba, ebuna Sulaiman, laju mator kantha reya, “Ponapa junandalem gi' ta' meyarsa kabar ja' Adoniya, pottraepon Hagit, ampon ngangkat aba'epon dibi' daddi rato? Rato Daud ta' meyarsa pa-ponapa parkara ka'dhinto. 12Manabi junandalem sareng Sulaiman terro salamedda, menorot pamanggi abdidalem, 13langkong sae junandalem duli nyabis ka Rato Daud, pas mator kadi ka'dhinto, ‘Panjennengngan dibi' ampon asompa ka abdina ja' ana' abdina Sulaiman se epaganteya panjennengngan. Aponapa samangken me' Adoniya se epadaddi rato?’ ” 14Natan pas adhabu pole, “Dhaggi', manabi junandalem parappa'epon abu-dhabu sareng rato, abdidalem maso'a badhi ngowadi pa-ponapa se edhabuwagi junandalem.”
15Daddi Batsyeba pas nyabis ka rato. E bakto jareya rato la ce' seppona, teppa'na badha e kamarra eladine Abisag, paraban ngodha dhari Sunem rowa. 16Batsyeba asojud e ajunanna rato, rato pas mareksane, dhabuna, “Arapa'a ba'na?”
17Saodda Batsyeba, “Guste, panjennengngan ampon asompa kalaban asmana PANGERAN, Allahepon panjennengngan, ja' ana' abdina Sulaiman se epadaddiya rato epaganteya panjennengngan. 18Namong samangken ta' kalaban sapangataowannepon panjennengngan, Adoniya ampon daddi rato. 19Adoniya ampon ngatorragi kurban dumba sabannya'na, sape lake' sareng budhu'na sape se po-lempo. Jugan salerana ngonjang tra-pottraepon panjennengngan, sareng Imam Abyatar sarta Yowab, panglimana angkadan perrangngepon panjennengngan. Namong Sulaiman ta' eonjang. 20Guste, samangken ra'yat Isra'il sadajana padha anante' kapotosan dhari panjennengngan parkara pasera se epadaddiya rato agante panjennengngan. 21Manabi panjennengngan ta' apareng kapotosan, sasedana panjennengngan, tanto abdina sareng ana' abdina eseksa amarga eanggep pangkiyanat.”
22Sabatara Batsyeba gi' parappa'na tor-mator, Nabbi Natan napa' ka karaton. 23Rato eatore oneng ja' badha Natan. Batsyeba kalowar, Natan pas maso', terros asojud e ajunanna rato. 24Atorra Natan, “Guste, ponana junandalem ngomommagi manabi Adoniya epajumennengnga rato menangka gante'epon junandalem? 25E are mangken jugan Adoniya ngatorragi kurban dumba sabannya'na, sape lake' sareng budhu'na sape se po-lempo. Pottraepon junandalem eonjang sadaja. Saka'dhinto jugan para panglima angkadan perrangngepon junandalem, sareng Imam Abyatar. Samangken sadajana padha apesta sareng Adoniya, sambi padha rak-soragan, ‘Hidup Rato Adoniya!’ 26Namong abdidalem ta' eonjang, jugan Imam Zadok sareng Benaya, sareng pottraepon junandalem Sulaiman. 27Ponapa junandalem se makon ka'dhinto sadajana, ta' kalaban apareng oneng ka para ponggabaepon junandalem parkara pasera se epaganteya junandalem?”
28Dhabuna Rato Daud, “Olok Batsyeba.” Nabbi Natan kalowar ban Batsyeba maso' pole ngadhep rato. 29-30Dhabuna rato, “Sengko' pajat la asompa ka ba'na, bit asmana PANGERAN, Allahna Isra'il, ja' ana'na ba'na Sulaiman se epaganteya sengko' daddi rato. Daddi, sateya sengko' ajanji ka ba'na bit asmana PANGERAN se odhi', se la malopot sengko' dhari sakabbinna kamalaradan, ja' e are teya keya sengko' ajalannagiya tang janji ka ba'na jareya.”
31Batsyeba pas asojud sambi adhabu, “Mandar panjennengngan eparengngana odhi' salanjangnga!”
32Rato Daud pas makon adikane Zadok, Natan ban Benaya. Saellana kabbi padha rabu, 33rato pas adhabu, “Kone'e tang para parwira pas kabareng kabbi entar ka tang ana' Sulaiman. Sulaiman jareya panompa' tang jaran buwadan, pas aterragi ka Somber Gihon. 34E jadhiya Zadok ban Natan kodu alanti' Sulaiman jareya daddi rato Isra'il. Saellana jareya ba'na kabbi kodu nope tarompet sambi asorak, ‘Hidup Rato Sulaiman!’ 35Mon la mare pas erengngagi dha' enna' epatoju'a e tahtana tang karaja'an, sabab Sulaiman jareya se bi' sengko' epele epadaddi rato se aganteya sengko' marenta Isra'il ban Yehuda.”
36“Mator enggi, guste,” saodda Benaya, “sarengngan moga-moga PANGERAN, Allahepon junandalem, makowada papakonnepon junandalem ka'dhinto'. 37Moga-moga salanjangnga PANGERAN aparenga partolongan ka Sulaiman akadi se apareng partolongan ka junandalem. Moga-moga pamarenta'annepon Sulaiman eparengngana ajaja'an dhari pamarenta'annepon junandalem.”
38Daddi Zadok, Natan ban Benaya ban pangawal pribadhina rato ngatore Sulaiman netene jaran buwadanna Daud, pas ngerengngagi Sulaiman jareya ka Somber Gihon. 39Saellana jareya Zadok mondhut baddhana mennya' jaitun se ebakta dhari Kemah Socce. Sulaiman pas elanti' ngangguy mennya' jareya. Tarompet epamonye ban reng-oreng se badha e jadhiya laju padha asorak, “Hidup Rato Sulaiman!” 40Saellana jareya Sulaiman pas eerengngagi pole; se ngerengngagi sambi rak-soragan ban nope soleng, sampe' tana akantha se melka'a dhari rammena reng-oreng jareya.
41Adoniya ban para tamoyya gi' buru mare se apesta e bakto meyarsa me-ramme jareya. E bakto meyarsa monyena tarompet, Yowab mareksane, “Badha apa ba'nengan e kottha me' ce' rammena?” 42Gi' ta' mare Yowab se abu-dhabu, o-tao Yonatan, pottrana Imam Abyatar dhateng. “Mara maso',” dhabuna Adoniya. “Ba'na oreng becce', tanto ba'na ngeba kabar becce' keya.”
43“Nyo'ona sapora,” ca'na Yonatan. “Banne kabar sae. Sulaiman ampon epajumenneng rato sareng Rato Daud. 44Zadok, Natan, Benaya sareng pangawal pribadhiepon rato epakon ngerengngagi Sulaiman. Sulaiman epanetene jaran buwadan kateteyanna rato, 45pas elanti' e Somber Gihon sareng Zadok sarta Natan. Samangken sadajana ampon abali ka kottha sambi rak-soragan, sakottha ce' rammena. Sowaraepon reng-oreng gapaneka se kapeyarsa sareng junandalem gella'. 46Samangken Sulaiman ampon jumenneng rato. 47La'-mala' para parwiraepon rato ampon padha ngatorragi ocaban salamet ka Rato Daud. Ca'epon reng-oreng gapaneka, ‘Moga-moga sareng Allahepon junandalem Sulaiman epakalonta ngalangkonge junandalem; moga-moga pamarenta'annepon Sulaiman jaja'a ngalangkonge pamarenta'annepon junandalem.’ Saamponnepon ka'dhinto Rato Daud asojud e pasareyannepon nyemba ka Allah, 48pas adu'a, ‘Abdidalem amolja'agi asmaepon Junandalem, GUSTE Pangeran, Allah se esemba ommat Isra'il. E are mangken badha toronan abdidalem se sareng Junandalem epajumenneng rato epagante abdidalem. Sarengngan, Junandalem ampon ngedine abdidalem odhi' kaangguy nyaksene kadaddiyan ka'dhinto!’ ”
49Tamoyya Adoniya padha tako' kabbi, laju padha manjeng pas ondur nyare jalan bang-sebang. 50Adoniya ce' tako'na ka Sulaiman, daddi pas buru ka Kemah Socce, sarta neggu'i co'-konco'na mezba#1:50 co'-konco'na mezba: Co'-konco' se ngajul abangon tandhu' e mezba. Oreng se neggu' konco'na mezba jareya ta' olle epate'e. jadhiya. 51Badha oreng abala parkara jareya ka Sulaiman. Ca'na kabar jareya, Adoniya ce' tako'na ka Sulaiman, daddi meyos ka mezba sarta ngastane co'-konco'na mezba jareya sambi adhabu kantha reya, “Sengko' ta' ondura dhari dhinna' sabellunna Sulaiman asompa ta' mateyana sengko'.”
52Saodda Sulaiman, “Mon tengkana bagus, bi' sengko' ta' epama'-baramma'a; tape mon atengka juba', bi' sengko' epateyana.” 53Rato makon oreng ngone'e Adoniya ka mezba gella'. Adoniya ngadhep ka rato, pas asojud e ajunanna. Dhabuna rato, “Ba'na olle mole.”
Currently Selected:
1 TO-RATO 1: MAD
Highlight
Share
Copy
Want to have your highlights saved across all your devices? Sign up or sign in