MAZMUR 103
103
Kalibosan nu Tumpu
1Nyanyian i Daud.
O, puji' na Tumpu, o, santuu'ku
buke-buke' na kinyonyoangku, puji' na sanggo-Nyo anu susi'.
2O, puji' na Tumpu, o santuu'ku
boli okolilimi na kanonongan-Nyo iwi-iwi'!
3Ia na anu nongampunimo dosa' nu beleyum iwi-iwi',
anu nompa'alinmo iwi-iwi' na panyakit nu beleyum,
4ia na anu nompobebasmo nyawa nu beleyum da nosabatmo mae i uno nu kubulan,
anu talalomo hondo nongkalibosi beleyum ka' nongkanonongimo hondo beleyum.
5Ia na anu nomposukupmo kantumuu'an nu beleyum i han anu ma'ima',
sahingga beleyum sabole-boleh daagi' olitau susumo mbambang nu bonyia'.
6Tumpu mompojalan atulan ka' ka'adilan
hi mian iwi-iwi' anu nohumpakmo kasansala'an.
7Pinotoa-Nyomo hi Musa na tanga'annyo
ka' apa-apaa na palabuatan-Nyo hi bansa Israel.
8 #
Yak. 5:11
Kalana Tumpu saja' mongkalibosi ka' mongkanonongi,
Ia talalo hondo sabaan ka' kalibosannyo daka' hondo.
9Ia madi' sabole-boleh saja'mo monsegai
ka' madi' motambuha' sampemo toka sidu-sidutu'.
10Ia madi' mohukum kita sitimbang tiba, dosa'to,
kabai mombalosi kita sitimbang tiba kasala'anto.
11Panyo sumo kotangkasnyo nu langit anu aita' mae, i buan nu tano' aiya
sumo aitumo na kalibosan-Nyo kona hi mian anu tulu-tulutan hi Ia.
12Sumo kojo'onnyo nu kabete'an lengkat mae i kinsoban,
sumo aijo'mo na Ia mompojoon dosa'to iwi-iwi'.
13Susumo tuuma mongkalibosi to ana-anaknyo,
sumo aijo'mo na Tumpu mongkalibosi mian anu tulu-tulutan hi Ia.
14Kalana nusumbu' nu Tumpu, kita aiya apaa sabenannyo na binau,
nu tutugi kita aiya ola abu' na gampanyo.
15Mian kantumuu'annyo ola sasaingoni' susumo hemput;
ia tingkokamo susumo bunga-bunga i uno nu ale';
16de nupuhimo nu mombun, ia madi'mo otoa-toa,
ka' mule' tampatnyo madi'mo daagi' osumbu-sumbu'.
17Panyo Tumpu sabole-boleh mongkalibosi mian anu tulu-tulutan hi Ia,
kanonongan-Nyo saja' sabole-boleh sampe molundu-lundu na tulunan
18kona hi mian anu montoongi apaa na anu jinanji'-Nyomo,
ka' anu tulu-tulutan mombau anu nu palentahkon.
19Tumpu mompalentah kiita' mae i suluga',
iamo na tomundo anu mongkuasai iwi-iwi'.
20O, puji' na Tumpu, o, belemiu to mala-malaekat-Nyo anu to babaani,
anu mompotombihing ka' mombau anu nu palentahkon.
21O, puji' na Tumpu, o belemiu iwi-iwi' malaekat kiita' i suluga',
iwi-iwi' na posaihon-Nyo anu mombau apaa na anu nu kahanda'i.
22O, puji' na Tumpu, o belemiu iwi-iwi' anu pinotimbalimo nu Tumpu, anu jojoong
i songko-songko na da'erah kakuasan-Nyo.
O, puji' na Tumpu, o, santuu'ku!
Currently Selected:
MAZMUR 103: LAILOE
Highlight
Copy
Compare
Share
Want to have your highlights saved across all your devices? Sign up or sign in
