MAZMUR 102
102
Do'a i uno nu kasusa'an
1Do'a nu mian anu sinansalamo ka' nalawemo
hondo, nompoto'imo kasansalannyo hi Tumpu.
2O Tumpu, potombihingakon mae na do'angku,
de timbali da anu ku kakase aiya toka hi Belento.
3Boli ola mosiloi panyo tonto'i mae na aku
de aku i unomo nu kasusa'an.
Potombihingakon mae de aku mongkakasemo
ka' taami mae lia-lia' na aku.
4Kantumuu'anku ola saimpotulu madi'mo otoa-toa sumomo tibuk;
bukungku iwi-iwi' sumomo oba nu apu.
5Aku nalawemo sumomo hemput anu nanggasmo;
ka' madi'mo ko kinyonyoa mongkaan.
6Aku nolokihismo hoso-hoson;
butongku me kilit kampi-kampit i buku.
7Aku sumomo tomonsi' undan i tampat padang anu mateges na tano'nyo,
sumomo tomonsi' mongkoek i tampat anu mohobo-hobo'mo ka' i liingmo hondo.
8Aku madi'mo moko ala tohoyot,
sumomo tomonsi' anu madi'mo ko sanga-sangalunyo aita' i bawo nu atop nu laigan.
9Sansina-sinaa nupopo'ambang mae nu mian anu monsampobali' mae aku;
sanggongku baumo pontotobi'akon mian de mian anu mongka'ideki mae aku motambuha'mo.
10Aku mongkaan abu' sumomo roti,
anu ku inum mogalo-galo'mo lolu',
11kalana tambuha' nu Belento anu taha-tahahumo
sahingga aku i hangkatmo ka' ingalinmo nu Belento.
12Kantumuu'anku ola sinaimpotulu sumomo lolung salatan malomo;
aku nangkalualemo sumomo hemput.
13Panyo Belento, o, Tumpu, Tomundo' anu sampe toka sidu-sidutu',
sabole-boleh o'inau sampe molapi-lapis na tulunan.
14Belentomo tuminjomo mae ka' mongkalibosimo Sion,
tempo'nyo tinokamo da mongkalibosi ia.
15Kalana to posa-posaihon nu Belento nongka'ima'imo ia,
maumo ia nohobo'mo.
Aha nongkalibosimo ia
maumo ia tinimbalimo abu'.
16Kuasa nu Tumpu nukabuhukmo nu to bansa-bansa;
ka' kakuasan-Nyo anu tinalasanggomo aijo' nukabuhukmo nu to tomu-tomundo' iwi-iwi',
17de Tumpu po'ule'mo mompotinjo Sion,
ka' po'ule'mo otoa na katalasanggoan-Nyo.
18Nu hongomo na do'a nu mian anu palesayamo hi ia aijo'mo mian anu talalomo hondo sinusa',
ka' nu talimamo na do'a nu aha.
19Tulismo iwi-iwi' na palabuatan nu Tumpu
da nubasa' nu lee' to anu aiya mae i ahop,
da bansa anu ma'isa pe'e pinohampe
timbali mompuji' Ia.
20Tumpu aita' mae i tampatnyo anu matangkas montoa mae mo uuka,
aita' mae i suluga', nu toa mae nu Tumpu na dunia
21da nuhongo na potatae nu mian anu tinalungku'mo lewa' mohehengakon kasala'an,
ka' mompobebasmo mian anu nohumpakmo hukuman osilakai.
22Sahingga sanggonyo obebakonmo kiijo' i Sion,
ka' Ia lewa'mo o puji' kiijo' i Yerusalem.
23Tempo'nyo to bansa-bansa ka' to kala-kalaja'an sinihukmo
da monsombahmo Tumpu.
24Tumpu nompato'imo kahosonanku tempo'nyo aku daagi' olitau,
ka' nongkodo'imo umunku.
25Lantas aku notataemo, “O, Tumpu boli mongala nyawangku
i pohintonga'an nu kantumuu'anku.”
O, Tumpu, Belento tumuu' sampe toka sidu-sidutu',
26 #
Ibr. 1:10-12
naipuan mae Belento nompotimbalimo dunia;
langit suele lima nu Belento na nompotimbali.
27Iwi-iwi' aijo' mingkot, panyo Belento na sabole-boleh ahi' daagi';
iwi-iwi' aijo' maluso'mo susumo baju'.
O'alinmo nu Belento susumo baju' anu pinmo,
lantas iwi-iwi' mahu'mo.
28Panyo Belento na satataapnyo ahi',
kantumuu'an nu Belento madi' ko ka'ahenannyo.
29To ana-anak makumpu mami tumuu' madi'mo ko anu mompoposia,
ka' saja'mo madi' ko anu mompoposia kalana i unomo nu ponjaga'an nu Belento.
Currently Selected:
MAZMUR 102: LAILOE
Highlight
Copy
Compare
Share
Want to have your highlights saved across all your devices? Sign up or sign in
