MAZMUR 101
101
Palajanjian nu samian na tomundo'
1Mazmur i Daud.
Aku monyanyiakonmo kanonongan ka' ka'adilan,
hi Belento, O, Tumpu, na nyanyian anu bau pompuji'ku!
2Aku mompasangkilamo kantumuu'an anu madi' ko kasala'annyo.
Hipianje na Belento toka mae hi belengku?
Aku tumuu'mo susi' i laiganku,
3kalakuan anu ma'idek madi'mo ola ku pojohok.
Ku ka'idekimo na palabuatan nu mian anu moteba'mo na kapalesaya'annyo,
ka' madi'mo moninggalo' hi aha.
4Aku madi'mo mombau anu tageo'
ka' madi'mo maninggalum i kalakuan anu ma'idek.
5Mian anu lewa' mompobau-bau anu madi' totu'u maumo nu pohowini hi mian sangga'at
ku pateimo.
Mian anu mombuulakon butongnyo ka' saja' mingkinyonyoa da molingkudui sangalu
madi' ola ku pojohok.
6Ku ka'ima'i na mian anu tulu-tulutan hi Tumpu;
aha timbali jojoong i laiganku.
Mian anu tumuu' madi' ko kasala'annyo atina' na
timbali mombau anu ku palentahkon.
7Anu sola mongakali balang nu mian madi' timbali jojoong i laiganku;
mian anu baleko' madi' moko ala mompaha ahop tiba aku.
8Sansinaa toka sansinaa na aku lewa' mompatei
to mia-mian anu ma'idek na kinyonyoa i uno nu lipu' aiya.
Iwi-iwi' na mian anu nombaumo han anu ma'idek
ku pateimo da madi'mo ko anu jojoong i uno nu kota' nu Tumpu.
Currently Selected:
MAZMUR 101: LAILOE
Highlight
Copy
Compare
Share
Want to have your highlights saved across all your devices? Sign up or sign in
