NEHEMIA 12
12
Daputan nu sanggo nu aha, to ima-imam ka' to mia-mian nu aha Lewi
1Aiya na to ima-imam ka' to mia-mian nu Lewi anu ninsusule'mo mae lengkat i Babel pinomboan aha tiba i Zerubabel anak i Sealtiel ka' suele tiba i Imam Daka' Yesua. 2-7To ima-imam.
I Seraya, i Yeremia, i Ezra,
i Amarya, i Malukh, i Hatus,
i Sekhanya, i Rehum, i Meremot,
i Ido, i Ginetoi, i Abia,
i Miyamin, i Maaja, i Bilga,
i Semaya, i Yoyarib, i Yedaya,
i Salu, i Amok, i Hilkia, ka' i Yedaya.
Ahamo aiya na to kapa-kapala nu imam daagi' tempo'nyo i Yosua. 8To mia-mian nu Lewi.
Anu mongkapalai manyanyi nyanyian pontalima kase hi Tumpu: i Yesua, i Binui, i Kadmiel, i Serebya, i Yehuda ka' i Matanya.
9Mian anu manyanyi monyanyiakon nyanyian bau pontaami: i Bakbukya, i Uni, ka' to sanga-sangalunyo anu aha sa'anakan mae.
Lee' i Imam Daka' Yesua
10Aiya na tatu-tatusannyo nu lee' i Imam Daka' Yesua: i Yesua, i Yoyakim, i Elyasib, i Yoyada, 11i Yonatan, i Yadua.
To kapa-kapala nu imam
12-21Aiyamo na daputan nu sanggo nu to kapa-kapala nu imam tiba aha mae sa'anakan tempo'nyo i Yoyakim i hangkatmo binau Imam Daka':
| Imam | Aha sa'anakan mae |
|---|---|
| i Meraya | i Seraya |
| i Hananya | i Yeremia |
| i Mesulam | i Ezra |
| i Yohanan | i Amarya |
| i Yonatan | i Melikhu |
| i Yusuf | i Sebanya |
| i Adna | i Harim |
| i Helkai | i Merayot |
| i Zakharia | i Ido |
| i Mesulam | i Gineton |
| i Zikri | i Abia |
| … | i Minyamin |
| i Piltai | i Moaja |
| i Samua | i Bilga |
| i Yonatan | i Semaya |
| i Matnai | i Yoyarib |
| i Uzi | i Yedaya |
| i Kalai | i Salai |
| i Heber | i Amok |
| i Hasabya | i Hilkia |
| i Netaneel | i Yedaya |
Daputan nu auwan nu aha to ima-imam tiba to mia-mian nu Lewi
22Daputan nu sanggo, nu to tu'a-tu'anyo nu auwan, kona hi aha mian nu Lewi ka' auwan nu aha to ima-imam tinulismo daagi' tempo'nyo to Ima-imam Daka' haha aiya: i Elyasib, i Yoyada, i Yohanan tiba i Yadua. Nontulis aijo' ola tinoka hi Darius tempo'nyo ia daagi' nompalentah salaku tomundo' nu Persia.
23Panyo mongkona mae aha, to tu'a-tu'anyo, nu sa'anakan mae aha mian nu Lewi tinulis ola sampe tinoka hi Yonatan makumpu i Elyasib.
Kalaja anu binagi-bagimo i Laigan nu Tumpu
24I Hasabya, i Serebya, i Yesua, i Binui tiba i Kadmiel na mongatun aha to mia-mian nu Lewi da binagi-bagi toto santompuk. Minsan mohumpak kalaja aha ohua' na tompukannyo, anu mompuji' Tumpu ka' montalima kase hi ia mobolobosan montuluti susumo anu ingatunmo i Tomundo' Daud Posaihon nu Tumpu Allah aijo'.
25To mia-mian anu monjagai sabatan daka' Laigan nu Tumpu anu binee'an kalaja monjagai salipi' pompo'una'an posadiaon mantu anu o kaan koko sabatan daka' Laigan nu Tumpu aijo'mo: i Matanya, i Bakbukya, i Obaja, i Mesulam, i Talmon ka' i Akub.
26Aha aijo' tinumuu' daagi' tempo'nyo i Yoyakim anak i Yesua ka' makumpu i Yozadak ka' tempo'nyo i Gubernur Nehemia ka' i Imam Ezra anu pande hondo aijo' i Atulan nu Tumpu.
I Nehemia nolame'akonmo pagan mesen nu kota' kalana tinimbalimo
27Salatan pagan mesen nu kota' kahanda'mo olame'akon, to mia-mian nu Lewi pinahalagamo na aha anu jojoong pa' iyaya mae da hingga-hinggat molame'akon lamean aijo' ka' monyanyiakon bau pontalima kase ka' mule' musik gambus ka' kasapi. 28Sahingga sinihukmo na to panya-panyanyi aha mae to au-auwan nu mian Lewi, anu lengkat mae i da'erah kajojoongan nu aha anu madi' majo'on lengkat i Yerusalem, kabai anu lengkat mae i to kota-kota' anu madi' majo'on lengkat i Netofa. 29Lengkat mae i Bet-Gilgal, Geba tiba Asmawet. 30To ima-imam ka' aha to mia-mian nu Lewi haha aijo' nombaumo adat momposusi' butong nu aha lapas aijo' ahamo mian da'isan, ka' mule' iwi-iwi' na sabatan daka' ka' pagan mesen nu kota'.
31Pinoitangkumo na to pola-polaya' nu Yehuda da minsasawe' mo mokiita' i pagan mesen ka' mongatunmo ohua' na tompukannyo nu mian anu oponjoo' ka' mojiji' na tuminjo montikubi kota' ka' manyanyi bau pompuji' ka' pontalima kase hi Tumpu Allah.
Tompukannyo anu momona tuminjo mojiji' aita' i pagan mesen, lumajang koa-koanan mompanjolongi mokiijo' i Sabatan Daka' anu mamba pongalinan Duhehe. 32I Hosaya lumajang montuntuni to panya-panyanyi, anu mombatuki ia sambahagian na to pola-polaya' nu aha Yehuda. 33-35To ima-imam lumajang montuntuni aijo' aha, ka' mompuhi tolompet: I Azarya, i Ezra, i Mesulam, i Yehuda, i Benyamin, i Semarya tiba i Yeremia. Ka' aha mule' suele binatukan i Zakharia anak i Yonatan ka' makumpunyo i Semaya. Daagi' ko pa' aha sangkuka na mompolee' mae nu aha aijo'mo: i Matanya, i Mikha, i Zakur, atina'mo aha mae sa'anakan i Asaf. 36Aitu mae i hiku nu aha anu lumajang montuntuni aijo'mo to mia-mian anu bubu' aha mae sa'anakan, aijo'mo: i Semaya, i Azareel, i Milalai, i Gilalai, i Maai, i Netaneel, i Yehuda tiba i Hanani. Aha iwi-iwi' nontoongi pakakas musik susumo anu lewa' nukuti' i Tomundo' Daud, posaihon nu Tumpu Allah. I Imam Ezra, anu pande-pande hondo i Atulan nu Tumpu Allah aijo', lumajang mamba momona hondo aita' hi mian anu nojiji'mo na i lumajang. 37Salatan tinokamo i Sabatan Daka' mamba i Uee anu Mintipuha, aha nonsiopo'akonmo ka' nindakomo nontulu ojan nokiita' i kota' i Daud moliu-liu laigan i tomundo Daud, lantas po'ule'mo namba nombalikakon i pagan mesen anu ko Sabatannyo Daka' mamba i Uee sasu kabete'an nu kota'.
38Tompukan nu to panya-panyanyi sa'angu' anu sasu kowi, ka' aku suele namba hingga-hinggat tiba sambahagian na mian da'isan. Kami nojiji' na namba nontulu Laigan tangka-tangkas anu lewa Oposuni apu lantas tinokamo i Pagan mesen Bola-bola. 39Lantas kami nontulumo Sabatan Daka' Efraim, Sabatan Daka' anu mana-manau'mo, Sabatan Daka' mamba pongolian ikan, Laigan tangka-tangkas Hananeel ka' Laigan tangka-tangkas Mea sampe tinoka i Sabatan Daka' nu Domba, Kami i lumajang nojiji' aijo', madi'mo i lumajang salatan tinokamo koko Sabatan Daka' anu bau Ponjaga'an aijo', koko Laigan nu Tumpu.
40Jadi aha ohu-ohua' na tompukan nu panyanyi haha aijo' tinokamo koko Laigan nu Tumpu.
Ka' sangga'at mule' anu misa' polaya' na naninggalum i tompukanku, 41suele mule' nombatuk na to ima-imam anu mompuhi tolompet. Aha atina'mo: i Elyakim, i Maaseya, i Minyamin, i Mikha, i Elyo'enai, i Zakharia ka' i Hananya; 42anu i lumajang nontuntuni aha, i Maaseya, i Semaya, i Eleazar, i Uzi, i Yohanan, i Malkia, i Elam ka' i Ezer. Anu nongkapalai to panya-panyanyi i Yizrahya.
43Sinaa aitu manjoo' hondo na koloban anu sinombahkon hi Tumpu. Mian da'isan binalame-lame'mo kalana Tumpu Allah nompobilahimo kantumuu'an nu aha. To bou-boune ka' suele to ana-anak hingga-hinggatmo nolameanmo, ka' elok nu aha, ka' mule' taligala nu aha mau majo'onmo daagi' kahongoan.
Anu pinotataapmo, na anu saja' obee' de monsombahmo Tumpu i Laigan nu Tumpu
44Tempo'nyo aitu daagi' ko to pia-piangkuka na mian binee'anmo kalaja monjagai iwi-iwi' na salipi' anu pongisian apa-apaa na anu obee'mo nu mian bau kapalaluan i Laigan nu Tumpu, tibamo anu osombahkon hi Tumpu anu inga-ingala na sambagian i sampulu' na bahagaian na isi nu ale' anu momona ingala i taun aijo'. Aha anu binee'an kalaja monjagai aijo' tionyo molimu' anu nubee' nu mian aijo', lengkat i iwi-iwi' na ale' anu madi' majo'on i to kota-kota'. Anu nubee' mae nu mian haha aijo' obee' hi to ima-imam ka' hi to mia-mian nu Lewi, susumo anu ingatunmo i Atulan nu Tumpu. To mia-mian nu Yehuda mongadati hondo to ima-imam ka' to mia-mian nu Lewi haha aijo', 45#1Taw. 25:1-8, 26:12 kalana ahamo na mompojalan atulan momposusi' hi to mia-mian ka' mule' atulan pomposusi' sangga'at anu pinalentahkonmo nu tumpu Allah. To mia-mian anu mompahaikakon musik ka' aha anu monjagai Sabatan Daka' Laigan nu Tumpu suele ahi' mule' mombau kalaja nu aha susumo koonyo nu atulan i Tomundo' Daud, ka' i Salomo anaknyo anu momo'ane. 46Salatanmo pe'e tempo'nyo i Tomundo' Daud ka' anu pande hondo i musik aijo'mo i Asaf, to panya-panyanyi nonyanyiakonmo nyanyian bau pompuji' ka' pontalima kase hi Tumpu Allah. 47Tempo'nyo daagi' i Zerubabel ka' suele mule' tempo'nyo daagi' i Nehemia, iwi-iwi' na mian da'isan Israel mombee' palasombahkon bau pomposukup anu opalalui sansina-sinaa nu to panya-panyanyi ka' anu monjagai Sabatan Daka' Laigan nu Tumpu. Mian da'isan nombee'mo palasombahan samata-mata kona hi to mia-mian nu Lewi ka' to mia-mian nu Lewi suele mombee'i to ima-imam bahagian anu tinantukanmo.
Currently Selected:
NEHEMIA 12: LAILOE
Highlight
Copy
Compare
Share
Want to have your highlights saved across all your devices? Sign up or sign in
