YEREMIA 4
4
Ilagamo da balatobatmo
1Tumpu notatae, “O mian Israel, de belemiu mongka'oho' mae minsusule' hi beleng-Ku. Alin pe'e mae na pilogot anu Ku ka'ideki aijo', ka' tulu-tulutanmo ahi' hi beleng-Ku. 2De belemiu basumpa' i uno nu sanggong-Ku ka' belemiu tumuu' ahi' sahondo-hondonyo, adin ka' madi' mombau kasala'an, saba' iwi-iwi' na bansa momoitamo mae hi belengku da Ku balakati na aha, ka' aha mompuji'mo mae Aku.”
3 #
Hos. 10:12
Tumpu notatae hi aha mian anu jojoong i Yehuda tiba Yerusalem, “Kalajamo na tano' nu belemiu anu ma'isa kinalaja; boli monsu'an bibit itampat anu nu tumuu'i nu hemput anu ko hii'nyo. 4Toongi na palajanjian nu beleyum tiba Aku, Tumpu nu beleyum ka' posadiamo na butong nu beleyum da bau kapalaluan-Ku o belemiu anu jojoong i Yehuda tiba Yerusalem. De madi' ahi', saba' tambuha'-Ku saidi' mae tahahumo ka' montoyo'imo susumo apu anu madi'mo opoko ala opatei maumo ahi' pa' hihe. Iwi-iwi' aijo' mongkonamo butong nu beleyum kalana palabuatan nu beleyum ma'i-ma'idek aijo!”
Yehuda otumbuhimo
5Puuhimo na tolompet isongko-songko na lipu'!
Poloboo'mo nasa-nasa.
Palentah na mian anu jojoong i Yehuda tiba Yerusalem
popalaimo lako' mamba ikota-kota' anu ko bentengnyo.
6Potiju' na jalan mamba i Sion, puge'nyo nu Tumpu,
palia-lia'mo popalai boli ola momohokot.
Tumpu mompotokamo mae balaa'
ka' kahansunan anu daka' hondo lengkat mae isasu utara.
7Sumomo ahi' singa anu nosabatmo lengkat mae ipinaninsulukannyo
sumo aijo'mo mule' nambamo na anu sola' mohopu'i bansang-bansang anu tokamo mae kahanda' monsilakaimo Yehuda.
Kota-kota' nu Yehuda singkapmo hansun
jadimo tampat anu madi'mo nu jojoongi nu mian.
8Mokonyo aijo' haangmo ka' tando'imo
pompusokmo hude kalung salaku tanda ko anumo sinilaka.
Kalana tambuha' nu Tumpu anu kinosuhu-suhutmo
ma'isa mule' naga'a lengkat mae i Yehuda.
9Tumpu notatae, “Toka isinaa aijo'to tomu-tomundo'tiba to mia-mian anu kopangkatnyo madi'mo daagi' moko ala mombau apa-apaa; to ima-imam langkakatanmo ka' mule' to nabi-nabi' tolokengkengmo.”
10Lantas aku notataemo, “Tumpu Anu Matangkas na Kuasanyo, Belento nongakalimo mian nu Yehuda tiba mian anu jojoong i Yerusalem! Belento notataemo, koonto saidi' mae ko kadameanmo, padahan uuka aiya nyawa mami opateimo nu bajak.”
11Tempo'nyo tokamo mae mian nu Yehuda tiba mian anu jojoong i Yerusalem mohumpak mo lele koonyo mombun anu mapanas lengkat mae ipadang tampat anu mateges hau-haunyomo tobung mamba hi aha. Mombun aijo' misa' mombun biasa anu ola molahabakon ota', 12panyo mombun anu makansang hondo anu toka mae atas palentah nu Tumpu da mombee'imo hukuman hi aha mian anu palesayamo hi Ia.
Yehuda tinumbuhanmo nu sampobali'
13Soba toa sampobali tinokamo mae sumomo ahi' kundom. Kareta nu aha anu bau pahampate sumomo ahi' tombusisi', ajahan nu aha lebe malia' nulingkudui na bonyia nu mahap. Ado silakamo na kita! Kita mohopu'mo!
14O Yerusalem alinmo na palabuatan anu ma'idek anu lengkat ikinyonyoa nu beleyum da beleyum oposalamatmo. Sampe toka hipian na kopinnyo na pikilan toto ide-idek haha aijo' daagi' opo una' nu beleyum i uno nu kinyonyoa nu beleyum?
15Lengkat mae ikota' Dan, ka' mule' lengkat mae ibungkutnyo nu Efraim tinokamo mae na mian anu sinai mae ka' nomboamo mae lele anu ma'idek. 16Aha nompo ingatmo bansa-bansa ka' nompoto'imo mian anu jojoong ikota' Yerusalem, tukoonyo nu aha to sampo-sampobali' hau-haunyomo mae mamba lengkat mae ilipu' anu majo'on. Aha molo aisje mae nu ais nu pahampatean kona hi aha kota-kota' nu Yehuda. 17Ka' montumbuhimo Yerusalem susumo mian anu monjagai ale'. Iwi-iwi' aijo' jadi saidi' mae kalana bansa Yehuda notomuhukmo hi Tumpu. Tumpu notataemo.
18O Yehuda posi beleyumo na nompotoka mae balaa' aijo' hi posi butong nu beleyum. Bau-baunyo nu kantumuu'an nu beleyum tiba palabuatan-palabuatan nu beleyum nonsaduakonmo iwi-iwi' na kansalasala'an aijo' anu nonsusukmo kinyonyoa nu beleyum.
I Yeremia sinusa'mo na mompotutugakon mian anu palesayamo hi Tumpu Allah
19Sinansalamo hondo na kinyonyoangku,
madi'mo ku poko ala montahan kasansala'an.
Aku madi'mo moko ala monsabaanakon butongku
sulengku nangada'mo i uno nu saha'anku,
kalana ihongongkumo na tolompet ingumonyi'mo,
tiba ais nu pahampatean nayontokmo mae.
20Balaa' me saja' tinoka mae
nohansunimo songko-songko na lipu'.
Monti-montiik ahi' kemahku ingideanmo,
hudenyo iwi-iwi' pinaha bea-beakmo.
21Sampe toka hipian na aku tionyo monsakisi
mian mahampate taha-tahahumo?
Sampe toka hipian na tionyo aku mohongo
onyi' nu tolompet anu talalomo na onyi'nyo?
22Tumpu notatae, “Ponga' hondo na mian anu palesayamo hi beleng-Ku aijo'
aha madi'mo nonsumbu' Aku.
Aha sumomo ahi' to ana-anak anu mabongon hondo
madi' ahi' ko anu nupisumbu-sumbu' maumo ola sangkiding.
Pinandemo hondo ipalabuatan anu ma'idek,
ka' madi'mo nonsumbu' palabuatan anu ma'ima'.”
Anu tinoa na balaa' tokamo mae
23Sasu aiya idunia tinanggalakonku,
ka' tinoangku ilongkangmo ka' kinantisanmo,
sasu mokiita' ilangit sinindangku,
paya', madi'mo najingka.
24Tinoangku na bungkutnyo tiba puge'nyo anu toto tangka-tangkas
talalomo ahi' na ginayu'an.
25Tinoangku madi'mo kino manusianyo,
sadangkan pe'e tomonsi' singkapmo ilumahap iwi-iwi'.
26Tano' anu molumba' nategesmo ka' nanggasmo
to kota-kota' singkapmo ihansun,
kalana Tumpu notambuha'mo hondo
hi mian anu palesayamo hi Ia.
( 27Tumpu nompoto'i kooNyo songko-songko na dunia saidi' mae timbalimo padang tampat anu mateges panyo Ia madi' ahi' monsilakaimo iwi-iwi'.)
28Tano' humangmo,
langit pikatmo hondo.
Tumpu notataemo,
ka' madi'mo mongabali na anu tinanga'an-Nyomo.
Ia nontantukanmo kaputusan
ka' madi'mo daagi' tolosule' mau ola sumo pala nu tengke.
29Ihongo na suludadu anu nonsake'i ajahan ka' anu mompana', talalomo hondo ihengge',
sahingga nonsaduakonmo toto samian nopalaimo hahu-hahunsa'an.
Sinin na kuhat pininsoopanmo nu aha,
puge'nyo nu batu pinoliba'anmo nu aha.
Songko-songko na kota' iliingmo,
madi'mo daagi ko anu jojoong ikiijo'.
30O Yerusalem beleyum
pinala'ianmo ka' madi'mo daagi' moko ala mombau apa-apaa!
Daagi' apaa na gunanyo mompusok baju' momea'
ka' mompakei nu mosoni' tiba salaka,
ka' mule' monjohiti mata nu celak?
Palasuma na beleyum mompokopiani butong nu beleyum,
kalana to mia-mian anu monsindua'i beleyum madi'mo daagi' mongka'ima'i beleyum.
pakalaus mule' kahanda'mo nu patei nu aha na beleyum.
31Ihongongkumo na mongkadede'akon
sumomo boune anu kahanda'mo monganak;
sumomo langkoyang anu ai-aituje na monganak,
sumo aijo'mo na haang nu Yerusalem anu binusokmo na mingkinyonyoa.
Limanyo maha kaweanmo ka' ia mompele-pele'mo,
“Silakamo na aku – aku nu pateimo nu sampobali'!”
Currently Selected:
YEREMIA 4: LAILOE
Highlight
Copy
Compare
Share
Want to have your highlights saved across all your devices? Sign up or sign in
