KOLOSE 4
4
1 #
Ef. 6:9
To Utu-utus anu tinimbali tuan! O palentah ahi' adi-adin ka' obau hodi-hodi' na kinyonyoa hi to posa-posaihon miu. Soba tutugi kalana komiu suele daagi' ko samian na tuan i suluga'.
To poki-pokinde'
2Tionyo ahi' komiu saja' tapakun na balado'a ka' saja' sadia ka' montalima kase hi Tumpu. 3Odo'akon suele na kami, da Tumpu mombee'i mae kami kasampatan anu ma'ima' na mombebakon lele mongkona lahasia i Kristus. Kalana han aijo', sahingga aku uuka aiya pinosoopmo i uno nu talungku'. 4Balado'a da aku moko ala montalangkan lahasia aijo' sahingga manasa hondo susumo anu memang sahondo-hondonyo.
5 #
Ef. 5:16
I uno nu poboboan miu tiba to mia-mian anu madi' palesaya pande-pande ahi' na komiu tumuu', ka' opake iwi-iwi' na kasampatan ma'i-ma'ima'. 6Hahan anu otaloakon miu aijo' tionyo ahi' saja' momposanang kinyonyoa ka' nu ka'ima'i nu mian. Tionyo ahi' osumbu' miu mosia na sabenannyo komiu montaami hahan anu nu pokilawa nu mian.
Pontudui sulat ka' salan do'a
7 #
Kis. 20:4, 2Tim. 4:12 #Ef. 6:21-22 I Tikhikus, Utusto anu oka-okalibosi momposumbu'je hi komiu iwi-iwi na apaa anu tinimbalimo hi belengku. Ia tulu-tulutan na nokalajamo, nosangalu tiba kami nombau kapentingan nu Tumpu. 8Aku nonsaimo ia namba hi komiu, da komiu monsumbu' han mami, sahingga komiu madi'mo molibos. 9#Flm. 10-12 I Onesimus mambaje hingga-hinggat tiba i Tikhikus; ia samian anu nolengkat mae atina' i gampa miu. Ia mian anu tulu-tulutan, sahingga kami mongkalibosi ia. Ia ka' i Tikhikus mompoto'ije hi komiu iwi-iwi na anu tinimbalimo i tampatku aiya.
10 #
Kis. 19:29, 27:2, Flm. 24, Kis. 12:12, 25, 13:13, 15:37-39 I Aritarkhus, anu i uno nu talungku' hingga-hinggat tiba aku, nompakatu salan do'a hi komiu. Sumo aitu mule' na i Markus mototominsan ka' i Barnabas. (Pinotuunmo na kaleba hi komiu da o labot na ia, de ia tokamo itina' hi komiu.) 11Salan do'a suele lengkat mae hi Yesus anu osa-osanggohi Yustus. Lengkat mae hi to mia-mian nu Yahudi anu pinalesayamo hi Tumpu Yesus, ola aha totolu' na anu uuka aiya mokalaja tiba aku mompojalan kalaja anu lengkat mae hi Tumpu. Aha nontulungimo mae aku totu-totu'u.
12 #
Kol. 1:7, Flm. 23 Salan do'a lengkat mae hi Epafras. Ia suele lengkat mae atina' i gampa miu. Ia posaihon i Kristus Yesus anu saja' tapakun mondo'akon komiu. Ia nompoitamo hi Tumpu sabole-bole da kapalesaya'an miu timbali mahoson ka' komiu totu-totu'u timbalimo otaha'imani, da sahondo-hondonyo na kinyonyoa miu tulu-tulutan i pongka'oho' nu Tumpu. 13Pinosi toangkumo memang na ia nokalajamo totu-totu'u kalana kapentingan miu, ka' bau kapentingan nu to mia-mian i Laodikia ka' i Hierapolis. 14#2Tim. 4:10,11, Flm. 24 I Dokoten Lukas, anu oka-okalibosinto, ka' i Demas nompakatu salan do'a hi belemiu.
15Potokakon na salan do'a mami hi to Utu-utus Kristen i Laodikia; ka' hi Nimfa, ka' hi jama'at anu mogreja i laigannyo. 16Opoko basa' na sulat aiya hi komiu o usahakon da suele aijo' obasa'akon hi jama'at Laodikia. Sumo aitu mule' komiu tionyo ahi' mombasa' sulat aiya anu opakatuje mae lengkat i Laodikia toka hi komiu. 17#Flm. 2 Ka' poto'i hi Arkhipus, “Sabole-bole obau na kalaja anu binee'mo hi komiu salaku bau pontuluti palentah nu Tumpu.”
18 Salan do'a lengkat hi belengku, i Paulus. Posi aku na nontulis bagian aiya. Boli okolilimi mae na aku, daagi' i uno nu talungku'!
O'amalakon da Tumpu mombalakati komiu.
Tabea' mami, I Paulus 12
Currently Selected:
KOLOSE 4: LAILOE
Highlight
Copy
Compare
Share
Want to have your highlights saved across all your devices? Sign up or sign in
