2 TAWARIKH 32
32
Mian nu aha Asyur nontumbuhimo mae Yerusalem
(2Raj. 18:13-37, 19:14-19,35-37, Yes. 36:1-22, 37:8-38)
1Salatan noko baumo na i Tomundo Hizkia hahan anu momponyata' ia tinulu-tulutanmo hi Tumpu, i Samherib tomundo nu Asyur nontumbuhimo Yehuda. Ia nontikumo to kota-kota anu ko bentengnyo, ka' nompalentahmo suludadunyo da mompatundu'mo. 2Salatan sinumbu'mo i Hizkia taalu' i Sanherib ko kahanda'mo montumbuhi Yerusalem, 3-4ia tiba to mia-mian anu ko pangkatnyo ka' suludadu anu toto tangka-tangkas na pangkatnyo nomposa'angu' mo pikilan da tampat-tampat anu ko ueenyo anu i sambiha' nu kota opaha tabuhi da to mia-mian nu Asyur madi' mohumpak uee de aha tokamo koko Yerusalem. Manjoo' hondo na mian anu pinalentah namba nontabuhi mata nu uee anu mo'ili mosabat lengkat mae i kota. 5Lantas i tomundo nompokopianimo kota da mahoson, pagannyo mesen pinokopianan, nompotinjomo laigan anu toto tangka-tangkas aita' i pagan mesen ka' mule' nombau sangga'at i sambiha'nyo nu kota. Ka' mule pinokopianannyomo na benteng anu binaumo i tano' anu tinambun sasu kabete'an i bahagian kota Yerusalem anu momonanyomo binau. Ia mule' nompalentahmo da mombau talombo' ka' kanta oponjoo'. 6Ia nohangkatmo to sulu-suludadu anu toto tangka-tangkas na pangkatnyo da mongkapalai to momo'ane iwi-iwi' anu i uno nu kota' ka' nompalentahmo aha da sihuk mae itanah lapang i ahop nu Sabatan daka' nu kota. Lantas pinoto'inyomo hi aha, 7“Pohoson na kinyonyoa ka' palesaya totu-totu'u boli mabuhuk hi tomundo Asyur kabai hi suludadunyo. Kita na lebe mahoson molingkudui aha kalana kita na lebe manjoo'. 8Ia ola kalana montaha'imani kahosonan nu manusia, panyo kita ko Tumpu Allah-nto na montulungi ka' mahampate monsangaja'i kita.” Salatan nohongomo potatae nu tomundo nu aha aijo', mian da'isan binaanimo.
9Lapas aijo' madi' pinin tempo'nyo i Sanherib tiba suludadunyo daagi' kiijo' mae i Lakhis, ia nonsaimo mian namba hi Hizkia ka' hi aha mian nu Yehuda anu jojoong i Yerusalem mompoto'i potuunonnyo sumo uuka, 10“Aku i Sanherib tomundo nu aha Asyur, kahanda' mompokilawa apaa na sababnyo sahingga belemiu talalomo-binaani na jojoong i Yerusalem, anu hau-haunyomo tinikumo mami aijo'. 11Pa' pinoto'imo i Hizkia tukoonyo Tumpu Allah nu belemiu na mompobebas belemiu da boli okuasai mami? Boli mompalesaya, kalana ia ola mongakali belemiu. Ia ola mompojohok belemiu da mate nu ohop ka' mate nu megot. 12Iamo na nongidei tampat-tampat ponsomban ka' to mezbah-mezbah ponsomban Tumpu, lantas nonsai mian nu Yehuda ka' Yerusalem monsombah ka' mompapui kamangian ola i sa'angu' na mezbah. 13Pa' madi' osumbu' nu belemiu apaa na anu binaungkumo ka' mompolee'ku hi to bansa-bansa sangga'at? Ma'isa toho' to pilo-pilogot nu bansa sangga'at nompobebas bansanyo da boli nukuasai i tomundo Asyur! 14Ihe na anu aijo' hi aha toho'mo nombau han aijo'? Pilogot nu belemiu madi' moko ala momposalamat belemiu! 15Boli mompojohok tomundo nu belemiu aijo' mongakali ka' mompoponga' belemiu! Boli opalesaya na ia! Kalana madi' toho' pilogot maumo pa' bansa iya mae na moko ala mompobebas bansanyo da madi' kinasusa'an nu tomundo Asyur. Tantu sumo aitumo na pilogot nu belemiu aijo' suele madi' moko ala mompobebas belemiu!”
16Daagi' manjoo' na potatae sangga'at anu tinaloakonmo nu mian Asyur anu sinai mae aijo', aijo'mo potatae bau pompopo'ambang Tumpu Allah ka' pompopo'ambang i Hizkia, posaihon nu Tumpu aijo'. 17I Tomundo Asyur mule' nontulismo sulat anu mompisala'i Tumpu, Tumpu Allah anu nusombah nu mian Israel. Sumo uuka na onyi' nu sulat aijo', “To pilo-pilogot nu iwi-iwi na bansa sangga'at madi' moko ala mompobebas bansanyo da madi' ku kuasai, sumo aijo' mule' pilogot i Hizkia madi' moko ala mompobebas bansanyo da madi' ku kuasai.” 18To mia-mian anu sinai mae nu aha Asyur haha aijo' nolobo'akonmo iwi-iwi' aijo' ipotatae nu aha Ibrani, bau pompopobuhuk nu aha da bolimo baani na to mia-mian nu Yerusalem anu aita' i pagan mesen nu kota da dengke na aha mompatundu' kota aijo'. 19Aha montaloakon sumo aijo' au' aitu Tumpu Allah anu osombah i Yerusalem pokakana susumo to pilo-pilogot nu bansa sangga'at aijo'mo to pato-patong anu nubau nu manusia.
20Sahingga binalado'amo na i tomundo Hizkia tiba i Nabi Yesaya anak i Amos. Aha nongkakaasemo nomoita tulung hi Tumpu Allah. 21Lantas sinaimo nu Tumpu na nabi samian nompatei to sulu-suludadu nu aha Asyur ka' mule' to sulu-suludadu anu toto tangka-tangkas na pangkatnyo nu aha Asyur haha aijo'. Kalana talalomo hondo na'ambang na i tomundo Asyur sahingga ia ninsusule'mo i lipu'nyo. Daagi' kino sansinaan ia hau-haunyo kiijo' i laigan nu pilogotnyo, pa' aha sangkuka na anaknyo tinokamo mae nompatei ia nu bajak.
22Sumo aijo' na balu-balu'nyo Tumpu nompobebas i Tomundo Hizkia ka' mian anu jojoong i Yerusalem da madi'mo nukuasai i Sanherib tomundo nu Asyur ka' sampo bali' nu aha sangga'at. Binee'anmo nu Tumpu kantumuu'an anu ma'ima' na aha ka' madi'mo ko kalaja'an sangga'at anu mompaha ohani mompoposia aha.
23Manjoo'mo na mian toka i Yerusalem momboa anu osombahkon hi Tumpu ka' palasen anu obee' hi Hizkia, sahingga mulai aitu ia ingangga'anmo nu iwi-iwi' na bansa.
Panyakit anu nongkona i Hizkia ka' mule' ia sinombongmo
(2Raj. 20:1-3,12-19, Yes. 38:1-3, 39:1-8)
24Tempo'nyo aitu na i Tomundo Hizkia nasakitmo. Panyakitnyo tinadokmo hondo sahingga ia kinoboli' sinilakamo. Ia binalado'a mo lantas binee'anmo nu Tumpu tanda da osumbu' saba' ia daagi' ma'alin. 25Panyo kalana ia sinombongmo, ia madi'mo nontalima kase hi Tumpu kalana na'alinmo na ia. Kalana aitu tinambuha'anmo nu Tumpu na Yerusalem ka' Yehuda. 26Panyo ahennyo i Hizkia ka' to mia-mian nu Yerusalem nangakumo kasala'an, sahingga tempo'nyo i Hizkia daagi' tutuu' hukumannyo aijo' madi'mo pinokona hi aha.
Kakaya'an ka' katalasanggoan i Hizkia
27I Tomundo Hizkia kinayamo hondo ka' iwi-iwi' na mian nongangga'imo ia. Ia nombaumo pa' sangkuka na salipi' pompo'una'annyo kakaya'annyo aijo'mo: mosoni', salaka, batu mainan, to lampa-lampa, kanta ka' to bala-balang anu mahan na olinyo sangga'at. 28Ia ko to guda-gudang pompo'una'annyo isi nu ale' sumo: gandum, anggur, ka' lanya' nu zaitun; ka' mule' to pangku-pangkun nu sapi', ka' to domba-dombanyo anu manjoo' hondo aijo'. 29Ka' mule' ia nombaumo manjoo' hondo na kota'. Kakaya'an anu binee'mo nu Tumpu Allah hi ia nolabi-labimo. 30I Tomundo'mo Hizkia aijo' na nongompok mata nu uee nu Gihon ka' ingiliakonnyo namba i kota' Yerusalem pinojalannyo i pipa i uno nu tano'. Iwi-iwi' na anu binau i Hizkia aijo' saja' tinimbali. 31Ka' tempo'nyo to mia-mian anu sinai mae lengkat i Babel tinoka nompokilawa mosia ka' po'ule' na'alin, kalana ia na'alin aijo' memang okahelani hondo, Tumpu nompojohokmo i Hizkia mosi batanga' da o uji' na kinyonyoanyo.
I Hizkia madi'mo nompalentah
(2Raj. 20:20-21)
32Sisikon sangga'at mongkona i Tomundo Hizkia ka' han ia mongka'ima'i Tumpu tinulismo i uno nu kitab Anu Montutuhakon apaa na pinoto'i nu Tumpu Allah Hi Nabi Yesaya Anak i Amos, ka' i kitab Sisikon nu to Tomu-tomundo Yehuda ka' Israel. 33I Hizkia sinilakamo, lantas i lamunmo i bahagian pindakoan i tano' pinolamunan to tomu-tomundo. Iwi-iwi' na mian nu aha Yehuda ka' Yerusalem nombee'mo apa-apaa bau tanda anu daka' hondo salaku pongadati ia tempo'nyo i sinilakamo. I Manasye anaknyo momo'ane na tinimbali tomundo' nombolosakon ia.
Currently Selected:
2 TAWARIKH 32: LAILOE
Highlight
Copy
Compare
Share
Want to have your highlights saved across all your devices? Sign up or sign in
