2 TAWARIKH 31
31
Ba'agama po'ule'mo pinokopianan i Hizkia
1Salatan lamean ilapasmo, mian da'isan iwi-iwi' nambamo i batu-batu kota' nu Yehuda lantas nohobo'akonmo tugu nu pilogot, mompahahobo'akon, iwi-iwi' na patong anu pinotinjo ponsombaan Pilogot boune Asyera, ka' nongideimo iwi-iwi' na mezbah ka' tampat anu lewa' ponsomban pilogot. Sumo aijo' mule' na aha nombau tampat sangga'at i da'erah Yehuda, ka' suele i da'erah Benyamin, Efraim ka' Manasye. Lapas aijo' aha ninsusule'mo i tampat nu aha toto samian.
2I Tomundo Hizkia po'ule'mo nohangkat gombuan nu to ima-imam ka' mian nu Lewi ka' pinosi bebee'an kalaja na aha. Anu nu kalaja nu aha aijo'mo: monsombahkon koloban anu opotunu, ka' koloban anu bau pompodame, mongatun anu monsombah i Laigan nu Tumpu, ka' mompuji' ka' mule' montalima kase hi Tumpu iyaya mae na tampat anu kiijo' i Laigan nu Tumpu. 3#Bil. 28:1–29:39 Binatang, anu i tomundo posi potuu'onnyo binee'nyomo pa' sangkuka na opalalui na okolobanakon anu opotunu de subumo ka' de mamalomo ka' mule' koloban anu osombahkon i sinaa nu Sabat, i lamean molame'akon Bitu'on Bu'ou ka' mule' i lamean anu molame'akon sangga'at susumo anu tinulismo i uno nu kitab atulan nu Tumpu.
4 #
Bil. 18:12-13, 21 Ka' mule' i tomundo nompalentahmo da mian anu jojoong i Yerusalem momboa mae anu osombahkon, anu tinantukanmo bau bagi nu to ima-imam ka' aha mian nu Lewi, da aha timbali mokalaja totu-totu'u mongatun kalaja i Lagian nu Tumpu susumo anu tinulismo i uno nu atulan nu Tumpu. 5Kalana palentah aijo' binebakonmo, mian nu Israel nomboamo mae i Laigan nu Tumpu apa-apaa na anu binee'mo nu aha aijo'mo isi nu ale' nu aha anu momona ingala, aijo'mo: labu, anggur, lanya' nu zaitun, juu' nu uwani', ka' isi nu ale' sangga'at. Ka' mule' aha suele nomboamo mae sambagian anu ingala i sampulu' na bagian na halata' nu aha. 6Iwi-iwi' na mian anu jojoong i to kota-kota' nu Yehuda nomboamo mae sambahagian na potuu'on nu aha anu ingala i sampulu' na bagian na sapi', ka' domba nu aha, ka' mule' manjoo' hondo na balang sangga'at lantas sinombahkonmo nu aha iwi-iwi' hi Tumpu Allah nu aha. 7Apa-apaa na anu binee'mo nu aha nontampu'unimo mae binoa nu aha i bitu'on kototolu'nyomo ka' sabole-bolemo mae tinoka na aha nomboa sangkutnyo tinoka i bitu'on kopopitu'nyomo. 8Salatan tinoamo na konjo'nyo apaa na anu binee'mo nu aha aijo', i Tomundo Hizkia ka' to mia-mian anu ko pangkatnyo nompuji'mo Tumpu ka' nompuji'mo mian da'isan aha mian Israel, mian anu pinalesayamo hi Ia. 9Salatan i tomundo nombisalakonmo hi to ima-imam ka' hi mian nu Lewi apa-apaa na anu binee'mo nu mian, 10I Imam Daka' Asarya lee' mae i Zadok notataemo, “Salatanmo pe'e mian da'isan nomboamo mae anu osombahkon haha aijo' i Laigan nu Tumpu, kami madi'mo kinakulangan i anu o kaan, panyo nolabimo sahingga daagi' manjoo' na kaanon mami anu pinosadia. Iwi-iwi' aijo' i humpak mami kalana binalakatanmo nu Tumpu na mian anu pinalesayamo hi ia.”
11I Tomundo nompalentahmo, sahingga aha nomposadiamo pa' sangkuka na gudang koko Laigan nu Tumpu, 12lantas ingisimo nu aha iwi-iwi' apaa na anu binee'mo nu mian ka' sambahagian mule' na anu ingala, i sampulu' na bahagian, iwi-iwi' aijo' pino'isimo i gudang haha aijo'. Aha mian nu Lewi samian sanggonyo i Konanya, binee'an kalaja monjagai, ka' i Simei utusnyo ise' na suele i hangkat montulungi ia. 13Aha mule' nongkapalai 10 na mian nu Lewi sangga'at anu binee'an kalaja aijo'mo: i Yehiel, i Azazya, i Nahat, i Asael, i Yerimot, i Yosabad, i Eliel, i Yismakhya, i Mahat, tiba i Benaya. Iwi-iwi' aijo' i hangkat kalana nontuluti apaa na anu pinoto'imo i Tomundo Hizkia ka' i Imam Daka' Azarya. 14I Kore anak i Yimna, mian nu aha Lewi anu tinimbalimo kapala nu anu monjagai Sabatan Daka' sasu Kabete'an Laigan nu Tumpu, binee'anmo kalaja labot montalima apa-apaa na anu nubee' nu mian anu osombahkon hi Tumpu lantas mombagi-bagiakon. 15I to kota'-kota' sangga'at anu kajojoongan nu to ima-imam, i Kore nu tulungi nu to mia-mian nu Lewi sangga'at aijo'mo: i Eden, i Minyamin, i Yesua, i Semaya, i Amarya, tiba i Sekhanya. Balang anu o kaan aijo' obagi pokakana hi aha bubuu' tulunan nu aha bansa Lewi, mau anu langkai'mo kabai anu daagi' Olitau otoa i kalaja anu nubau nu aha ka' otoa i gombuan nu aha. 16Iwi-iwi' na to momo'ane anu umun nu aha tolumpulu'mo na taun mokiita', anu obee'imo kalaja mobolo-bolos sansinaa toka sansinaa i Laigan nu Tumpu, suele obee'i bagian toto samian otoa i kalaja anu nubau nu aha ka' mule' otoa i gombuan nu aha. 17To ima-imam anu aha sa'anakan mae pinosi daputanakon, ka' mian nu Lewi anu umunnyo 20 mo na taun mokiita' pinosi daputanakon otoa ikalajanyo anu nubau nu aha ka' mule' otoa i gombuan nu aha. 18Aha iwi-iwi' dinaputanakonmo tiba to ana-anak ka' bengkele' nu aha, ka' mian sangga'at anu daagi' hi aha salaigan, kalana aha suele otuntut sabole-bole mombau kalaja anu tinantukanmo tionyo nubau nu aha anu samata-mata mokalaja anu osombahkon hi Tumpu. 19Lee' mae i Harun na to ima-imam anu jojoong iyaya mae na kota ka' iyaya mae na padang anu madi' majo'on i kota' haha aijo' binee'anmo kalaja mombagi-bagiakon anu o kaan hi iwi-iwi' na to momo'ane anu minsoop hi auawan nu to ima-imam ka' ka' hi batu-batu mian anu dinaputanakon na tulunan nu aha Lewi.
20I songko-songko na Yehuda, pinojalanmo i Tomundo Hizkia na ka'adilan, ka' kajujunan ka' momposanang kinyonyoa nu Tumpu Allah-nyo. 21Apa-apaa na anu tinanga'annyomo obau, pinoko ala nyomo binau kalana kapentingan nu Laigan nu Tumpu ka' mule' montuluti to atu-atulan nu Tumpu, binaunyomo nu kinyonyoa totu-totu'u kalana ia totu-totu'u mongka'ima'i Tumpu Allah-nyo.
Currently Selected:
2 TAWARIKH 31: LAILOE
Highlight
Copy
Compare
Share
Want to have your highlights saved across all your devices? Sign up or sign in
