1 TESALONIKA 5
5
Posadiamo kalana Tumpu tokamo
1To Utu-utus madi' palalu kami montulis sulat toka hi komiu, hipian na katantuan nu tempo'nyo, hahan aijo' timbalimo. 2#Mat. 24:43, Luk. 12:39, 2Ptr. 3:10 Kalana posi komiu monsumbu'mo totu-totu'u te Sinaa Katokaan nu Tumpu aijo', toka sumo anu buling toka pihi. 3De mian motatae, “Iwi-iwi' aman ka' madi' ko anu mombau hengge',” sahingga aitumo na tempo'nyo anu madi' osumbu-sumbu' nu aha, nutokaimo nu bala, ka' madi' ko samian pe'e na anu moko popalai. Han aijo' toka madi' osumbu-sumbu', sumo mongoa'i sakit monganak kona hi samian na boune anu mompohampemo. 4Panyo komiu misa' mian anu tumuu' i uno nu pintung, sahingga sinaa aijo' mompotolokengkeng komiu sumo katokaan nu anu mombuling. 5To Utu-utus iwi-iwi' atina'mo na mian anu tumuu' i uno nu jingka. Kita misa' mian anu tumuu' i uno nu kapintungan, kabai anu ibahagianmo nu anu pinihimo ka' pinintungmo. 6Kalana aijo' kita madi' timbali sahoyo-hoyotnyomo sumo mian sangga'at. Kita tionyo basadia ka' pikilanto tionyo matantu. 7Tempo' nu pihi mian hoyot, ka' tempo'nyo nu pihi mule' mian timbali malangu. 8#Yes. 59:17, Ef. 6:13-17 Panyo kita aiya to mia-mian anu pinosoopmo i sinaa anu majingka; kalana aijo' pikilanto tionyo matantu. Kita tionyo tataap palesaya hi Tumpu ka' mongkalibosi to mia-mian sangga'at tiba taha'iman ahi' totu-totu'u saba' Tumpu momposalamatmo kita. Aijo'mo na toongon anu monjagai kita i uno nu usaha mongewa ka'idekan. 9Tumpu nompile'imo kita misa' da o hukum, panyo da o posalamat montului Tumpunto i Yesus Kristus. 10Ia sinilaka kalana kita, da de Ia mompo'ule'mo toka – pa' kita daagi' tutuu', pa' kita sinilakamo – kita timbali tumuu' hingga-hinggat tiba Ia. 11Kalana aijo', tionyo ahi' komiu tataap mompaha kakehaakon ka' mompaha poho-pohoson sumo anu binaumo miu uuka aiya.
Sonto-sonto' anu pupuusnyomo ka' salan do'a
12To Utu-utus, opoita mami da sabole-bole komiu mongangga'i to mia-mian anu mokalaja itina' hi komiu; aijo'mo aha anu pinile'anmo nu Tumpu da molaya' ka' mompokinde'i komiu. 13Opalahatikan ka' o'adati hondo, ka' okanonongi kalana monginau' apaa na anu binaumo nu aha. Saja' tumuu' ma'i-ma'ima' i poboboan.
14Opoita mami mule' hi to Utu-utus, pokinde'i ma'i-ma'ima' na mian anu madi' mongka'oho' mokalaja; posanang na kinyonyoa nu mian anu mabuhuk; tulungi na mian anu palalu otulungi, ka' sabaan kona hi mian iwi-iwi'. 15Ojagai da boli ko anu mombalosi ka'idekan nu ka'idekan. Saja' bala usaha mombau anu ma'ima'; samian toka hi sangga'at ka' hi iwi-iwi' na mian.
16Tionyo ahi' komiu saja' lame', 17ka' saja' balado'a. 18I uno nu han iwi-iwi' tionyo ahi' komiu saja' montalima kase, kalana aijo'mo na anu nu ka'ima'i nu Tumpu hi komiu, sumo mian anu tumuu' mosa'angu' tiba i Kristus Yesus.
19Boli mombia-biangakon Roh nu Tumpu. 20Boli osangka dengke na lele anu binee'mo nu Roh nu Tumpu Allah. 21Iwi-iwi' na apaa tionyo o uji', ka' anu ma'ima' tionyo ahi' obatuki. 22Opatikojo'oni iwi-iwi' na ngangahan nu ka'idekan.
23O amalakon da posi Tumpuje na mombee'i kita ka'ima'an, mompotimbali komiu mian anu totu-totu'u tumuu'mo samata-mata hi Tumpu. O amalakon da Tumpu monjagai butong miu, iwi-iwi' mau mule' roh, santuu' kabai pe'e butong miu, sahingga madi' ko ideknyo de Tumpunto i Yesus Kristus mompo'ule'mo mae toka. 24Tumpu anu nolagamo komiu, na nombau han aijo' kalana Ia manonong.
25Do'akon mae na kami, to Utu-utus!
26Mompaha sala-salan do'akon iwi-iwi' nu kalibosan salaku poto utusan nu mian Kristen.
27Kalana kuasa nu Tumpu, ku poita sabole-bole da komiu mombasa'akon sulat aiya hi iwi-iwi' Utus anu sampo palesaya.
28O amalakon da Tumpunto i Yesus Kristus mombalakati komiu.
Tabea' mami, I Paulus 10
Currently Selected:
1 TESALONIKA 5: LAILOE
Highlight
Copy
Compare
Share
Want to have your highlights saved across all your devices? Sign up or sign in
