1 TESALONIKA 3
3
1 #
Kis. 17:15
Ahennyo kalibosan mami madi'mo pinoko tahan. Kalana aijo' kami binapikinmo lebe ma'ima', pinala'ianmo maumo me kami i Atena, 2hau-haunyo aijo' kami nonsaimo utusto i Timotius. Ia samian na posaihon nu Tumpu anu bakalaja tiba kami, da mompolele Lele Ma'ima' mongkona i Kristus. Kami nonsai i Timotius hi komiu, da ia mompohosonakon komiu ka' mongkakeha' komiu da lebe palesaya mule' hi Kristus. 3Tiba jalan anu sumo aijo' madi' ko samian pe'e itina' hi komiu na anu tolo sule' kalana saja' mongoa'i kasansala'an-kasansala'anto anu sumo aiya. Posi komiu monsumbu'mo saba' kasansala'an-kasansala'an anu sumo, aijo' ninsoopmo i uno nu tanga'an nu Tumpu kona hi kita. 4Tempo'nyo kami daagi' hingga-hinggat tiba komiu, kami nompoto'imo hi komiu momonanyo, saba' kita tionyo mongoa'i sansala. Ka' aijo' totu-totu'u tinimbalimo; posi komiu nonsumbu'mo. 5Mokonyo aijo' aku nonsaimo i Timotius, kalana aku mongka'oho' hondo monsumbu' mosia na kamajuan miu i uno nu han palesaya hi Kristus. Aku bata-bata dumo Ibilis lako' monggoda komiu, sahingga iwi-iwi' na lawe mami ola palasuma.
6 #
Kis. 18:5
Uuka i Timotius ninsusule'mo mae ka' nompotokamo hi kami lele anu moko lame' mongkona mosia na komiu palesaya hi Kristus, ka' mompaha kali-kalibosi. Ia nompoto'imo hi kami tukoonyo komiu saja' montutugi hahan anu ma'ima' mongkona kami i kinyonyoa miu. Ka' komiu ko kahanda' mompahakabot tiba kami, pokakanamo sumo kami mule' ko kahanda' mompahakabot tiba komiu. 7Aijo' na sababnyo to utu-utus i uno nu kasusa'an iwi-iwi' ka' kasansala'an mami, kami ingindeeke'mo nu lele anu lengkat mae hi komiu. Palesaya miu hi Kristus nomposanangmo kinyonyoa mami, 8sahingga uuka kami nongoa'imo totu-totu'u daagi' tutuu', asan komiu tataap tuminjo mahoson mosa'angu' tiba Tumpu. 9Palias na kodaka'nyo na kami montalima kase hi Tumpu, kalana iwi-iwi' na kalame'an anu ingoa'anmo mami i ahop-Nyo kalana komiu. 10Sinaa ka' pihi okakase mami hi Ia nu kinyonyoa anu totu-totu'u da posi kami na singkabot tiba komiu da mompahaposampa' apaa na anu okahanda'i miu da palesayamo hi Kristus susumo anu sahondo-hondonyo.
11O amalakon hi Tumpu Tuumanto ka' Tumpunto, i Yesus mombee'i kasampatan hi kami da singkabot tiba komiu! 12O amalakon hi Tumpu da mompotimbali komiu lebe saja' mongkalibosi samian ka' samian, sahingga kalibosanum ko pintu-pintuangnyo, pokakana sumo kalibosan mami hi komiu. 13Tiba jalan anu sumo aijo' Tumpu mompohosonje kinyonyoa miu, sahingga komiu susi'mo ka' madi' ko alunyo i ahop nu Tumpu Tuumanto, de Tumpunto i Yesus tokamo hingga-hinggat tiba iwi-iwi' na mian anu Iamo na tumpu-Nyo.
Currently Selected:
1 TESALONIKA 3: LAILOE
Highlight
Copy
Compare
Share
Want to have your highlights saved across all your devices? Sign up or sign in
