Matius 25
25
Pandiriꞌ noniuꞌ i hampuluꞌ duo anaꞌntowowalo
1“Ane hupaꞌ huliꞌ Anaꞌ Manusiaꞌ, poparentana Pueꞌ Ala hibali pandiriꞌ hieꞌe: hampuluꞌ anaꞌntowowalo notungkai mampekau modupaꞌ tomaꞌani to nipohamoko. Hori-horihi mangkomi palitara. 2Limohi to buhaꞌ pekiri, hei limohi to hawaꞌi buhaꞌ pekiri. 3Anantowowalo to limo to hawaꞌi buhaꞌ pekirire, mangkomihi palitara, angkana hawaꞌi mampopelobi minyaꞌra,#25:3 minaꞌ Tempo tiꞌo, toaꞌ mopakeꞌ minaꞌ ka wuaꞌ saitu i palitara. 4hei anaꞌntowowalo to limo to buhaꞌ pekiri, mangkomihi palitara hei mangkomihi woꞌo minyaꞌ i butoloꞌ to hingkiꞌ ropopotambai minyaꞌ palitara. 5Tomaꞌani to nipohamoko morue mpuꞌu honiꞌi hupaꞌ horiana hangkololeꞌomohi anaꞌntowowalo tiꞌo, hei koꞌukoana leꞌomohi lekiꞌ-lekiꞌra.
6Hampolumbu wini, hangkaꞌ-hangkaꞌ romo uwaꞌ toaꞌ to mekoꞌalo mewowoi, notiꞌi, ‘Tomaꞌani to nipohamoko hupaꞌmo! Humeimokei, idupaꞌmokei.’ 7Kaliuꞌ meꞌarohi mpuꞌu anaꞌntowowalo to hampuluꞌ tiꞌo, haduo-haduohi mampatimomo palitara. 8Anantowowalo to hawaꞌhi buhaꞌ pekiri tiꞌo merapiꞌhi minyaꞌ pe awara to buhaꞌ pekiri, rotiꞌi, ‘Elo, ipaꞌanika wongkenaꞌ minyaꞌmi hangkiuꞌ, alaꞌ palitangki hingkiꞌ pideꞌmo.’
9Rohoniꞌ anaꞌntowowalo to buhaꞌ pekiri tiꞌo, rotiꞌi, ‘Hawaꞌi wadi! Noloumokei mehili pe topobaluꞌ-baluꞌ minyaꞌ. Hawaꞌi intu ganaꞌ kipakeꞌ ane kidolaꞌ womoꞌi.’ 10Molaimohi mpuꞌu anaꞌntowowalo to hawaꞌi buhaꞌ pekiri tiꞌo nolou mehili minya'. Kolentuꞌara mehili, hupaꞌmo tomaꞌani to nipohamoko. Anaꞌntowowalo to limo to buhaꞌ pekiri tiꞌo, mekahi pe tambi posusaꞌa moꞌawa hante tomaꞌani to nipohamoko. Uko tiꞌo, wambaꞌ niwitimo.
11Hawaꞌi morue katoꞌo, hupaꞌmohi anaꞌntowowalo to hawaꞌi buhaꞌ pekiri. Mewowoihi ka howali, rotiꞌi, ‘Tua! Iweaꞌkika wongkenaꞌ wambaꞌmio!’
12Angkana mehoniꞌ tomaꞌani to nipohamoko, notiꞌi, ‘Hawaꞌkei kubahaꞌ.’ ”
13Nopotutu hi Yesu pandiriꞌ hieꞌe, Notiꞌi, “Mewaliꞌ hangangaa timomokei nturusi, alaꞌ hawaꞌkei ibahaꞌ hiwaꞌimbo kohingkiꞌ hupaꞌne Anaꞌ Manusiaꞌ.”
Pandiriꞌ noniuꞌ i roduo hawiꞌ to modoto hante to lohe
(Luk. 19:12-27)
14“Ane hupaꞌ huliꞌ Anaꞌ Manusiaꞌ, poparentana Pueꞌ Ala hibali pandiriꞌ hieꞌe: Haduo tuana moliwo hingkiꞌ nolou pe kota to moꞌela. Handoaꞌi tene molai, io mowowoi hawiꞌna hei nopaꞌanihi doiꞌ. 15Hori-horihi nopaꞌanihi motuntuni pebiaꞌra. Haduo nopaꞌaniki limo sabu doiꞌ bulawa,#25:15 limo sabuna doiꞌ bulawa I lali wiharo Yunani: limo talenta. Ihaꞌna haꞌanu talenta hibali hante harona haduo toaꞌ ane majama hampuluꞌ limo ntoꞌa lobi. haduo rosabu, hei haduo woꞌo hasabu. Uko tiꞌo, molaimo. 16Hawiꞌ to nopaꞌani limo sabu doiꞌ bulawa tiꞌo, loliu mampopodumbuꞌ doiꞌ tiꞌo nopakeꞌ mobaluꞌ-baluꞌ hei pahua anaꞌna, mewaliꞌ nohuamo mpuꞌu anaꞌne limo sabu woꞌo. 17Hatoꞌo woꞌo hawiꞌ to nipaꞌani rosabu doiꞌ bulawa pahua woꞌo anaꞌna rosabu. 18Angkana hawiꞌ to nipaꞌanilu hasabu nolou mokoweꞌ woiꞌ nopowuni doiꞌ to nopaꞌaniki tuana.
19Morue katoꞌo, mahuliꞌmo tuare hei nowowoimohi hawiꞌne. Ikohupaꞌralu hawiꞌne, nopeꞌitanokimo hohumbo konipopodumbuꞌne doiꞌna. 20Hawiꞌ to nopaꞌani limo sabu doiꞌ bulawa mangkomi pe tuana hampuluꞌ sabu, notiꞌi, ‘Tua, to ipaꞌanikiꞌa hampiha limo sabu, hei hieꞌemo woꞌo anaꞌna, limo sabu.’
21Notiꞌi tuana, ‘Moromiꞌ mpololeke hapo to iwali. Mewaliꞌ, nokomi kotungkuꞌmu ijama to monangkoꞌ, kupoꞌohiko i jama to madori. Humeimoko moꞌawa hante aku i lali komotanaꞌ-tanaꞌ.’
22Hawiꞌ to nipaꞌani rosabu doiꞌ bulawa hupaꞌ woꞌo, notiꞌi, ‘Tua, to ipaꞌanikiꞌa hampiha rosabu, hei hieꞌemo woꞌo anaꞌne, rosabu.’
23Notiꞌi tuane tiꞌo, ‘Moromiꞌ mpololeke hapo to iwali. Mewaliꞌ, nokomi kotungkuꞌmu ijama to monangkoꞌ, kupoꞌohiko i jama to madori. Humeimoko moꞌawa hante aku pe lali komotanaꞌ-tanaꞌ.’
24Uko tiꞌo, hupaꞌmo woꞌo hawiꞌ to nipaꞌani hasabu, notiꞌi, ‘Tua, kubahaꞌ ingko haduo toaꞌ to mohiaꞌ. Ibahaꞌlu moroa wuaꞌne hantaro handoꞌio ingko to mehuꞌa! 25Alaꞌ morokaꞌa pe ingko, iomo horiana kuwuni doiꞌma pe lali woiꞌ. Mewaliꞌ, hieꞌemo doiꞌma. Kupopahuliꞌmo.’
26Notiꞌi tuane tiꞌo, ‘Kodakeko mpololeke hei loheko woꞌo majama! Ibahaꞌlu aku to moroa wuaꞌne hantaro handoꞌio aku to mehuꞌa. 27Mewaliꞌ, mahamporeꞌi hinaꞌ hawaꞌi ipepaꞌaniki doiꞌ tiꞌo pe toaꞌ ntaniꞌna, hingkeꞌna io to mowuliori doiꞌka? Ane kehatoꞌoꞌi koꞌipopodumbuꞌne, hinewoꞌena kekutorimomo huliꞌ doiꞌka hante anaꞌna!’ 28Notiꞌi womo tuane tiꞌo pe hawiꞌna to haduona, ‘Iroa doiꞌ to uwaꞌ i io, hei ipaꞌaniki pe hawiꞌku to mampopoꞌanaꞌmo limo sabu doiꞌ bulawa, 29alaꞌ toaꞌ to nipoꞌohi hante hapo to nipaꞌanikiꞌi, hingkiꞌ nipaꞌaniki womo hingkeꞌna notetambai. Angkana toaꞌ to hawaꞌi nipoꞌohi, kehapoꞌi hangkiuꞌlu to uwaꞌ i io, bateꞌna hingkiꞌ niroa huliꞌ. 30Hei hawiꞌ to hawaꞌi modumbuꞌ, itubemolukei moꞌela pe lali komokorindiana. Itoꞌo io hingkiꞌ meꞌola hei maporiꞌ mpololeke nohori.’ ”
I ando pobutusi, Anaꞌ Manusiaꞌ hingkiꞌ mampohohida toaꞌ
31 #
Dan. 7:13-14
Nopololiu hi Yesu lolitaNe pe topeguruNa, Notiꞌi, “I tempona Anaꞌ Manusiaꞌ hupaꞌ huliꞌ, manobaꞌ tuwuꞌNe hei maroho mpololeke kuasaꞌNe. Io hingkiꞌ moꞌawa lekiꞌ-lekiꞌna malaꞌeka, hei Io hingkiꞌ mahura i pahura kodatuaNa to manobaꞌ. 32Lekiꞌ-lekiꞌna roboꞌ i duniaꞌ hingkiꞌ nirampuhi i hinaroNa hei hingkiꞌ Nodolaꞌhi mewali merontibura, hibali topolambaꞌ mampohida gimba hante bekeꞌ. 33Toaꞌ to mampetuntui peleihana Pueꞌ Ala nipandiriꞌ hibali gimba to Nopopahura tinaꞌ i kuanaNa, hei toaꞌ to hawaꞌi mampetuntui peleihana Pueꞌ Ala nipandiriꞌ hibali bekeꞌ to Nopopahura tinaꞌ i koiriNa.
34Hei Datu tiꞌo hingkiꞌ mampatiꞌikihi to tinaꞌ i kuanaNa, ‘Humeimokei to Nobarakati UmoꞌKu! Mekahimokei pe lali poparentaKu. Itoꞌo uwaꞌ peꞌohaꞌa to Kupatimomokikei umbiꞌ ka pewalina duniaꞌ. 35Alaꞌ i tempoKu bilora, ipopopangkaꞌAkei. MangkumaroꞌA, ipopaꞌinuꞌAkei. TempongKu mewali tolori, itorimoꞌAkei. 36Hawaꞌi uwaꞌ baduꞌKu, ipaꞌaniꞌAkei baduꞌ. I tempoKu hawaꞌi polido, ipokuliꞌAkei. Kolentuꞌangku nitarungkuꞌ, iloloꞌoꞌAkei.’
37Hingkiꞌ mehoniꞌhi toaꞌ moromiꞌ i pampeꞌelena Pueꞌ Ala, rotiꞌi, ‘Pueꞌ, hiwaꞌimbo kiꞌokiꞌKo bilora hei kipopopangkaKo, ba mangkumaroKo hei kipopaꞌinuKo? 38HiwaꞌimboKo hupaꞌ mewali tolori, hei kipotoloriKo? HiwaꞌimboKo kiꞌokiꞌ hawaꞌi uwaꞌ baduꞌMu, hei kipaꞌaniKo baduꞌ? 39Hiwaꞌimbo hawaꞌko polido hei kipokuliꞌiKo, ba i lali petarungkuꞌa, hei kiloloꞌoKo?’
40Hei hingkiꞌ nohoniꞌhi Datu, notiꞌi, ‘Hingkeꞌna ibahaꞌkei: hapo to iwalikei i tempomi mosulungi halali-halalingKu to merima-rima tuwuꞌra, hibalimo woꞌo Aku to isulungimokei.’
41Uko tiꞌo, hingkiꞌ Notiꞌikihi pe toaꞌ to tinaꞌ i koiriNa, ‘Polaimokei ka hinarongKu, ingkei to buntoꞌmo! Mekahimokei pe lali api to mamua nturusi, to nipatimomokimohi Belisiꞌ hei lekiꞌ-lekiꞌna malaꞌekana, 42alaꞌ i tempoKu bilora, hawaꞌAkei ipopopangka. MangkumaroꞌA, hawaꞌAkei ipokuliꞌi. 43DongkaꞌA, hawaꞌAkei itorimo. Hawaꞌi uwaꞌ baduꞌKu, hawaꞌAkei ipaꞌani baduꞌ. MohakiꞌA, hawaꞌAkei ipokuliꞌi. Kolentuꞌangku nitarungkuꞌ, hawaꞌAkei iloloꞌo.’
44Hingkiꞌ rohoniꞌ woꞌo, rotiꞌi, ‘Pueꞌ, hiwaꞌimbo kiꞌokiꞌKo bilora ba mangkumaro ba mewali tolori, ba hawaꞌKo mebaduꞌ, ba hawaꞌKo polido, ba nitarungkuꞌ, hei hawaꞌKo kisulungi?’
45Hei hingkiꞌ nohoniꞌhi Datu, ‘Hingkeꞌna ibahaꞌkei: nokomi kohawaꞌna isulungikei toaꞌ to merima-rima tuwuꞌre, palaihana, Akumo woꞌo to hawaꞌi isulungikei.’ ”
46Nopotutu hi Yesu lolitaNe, Notiꞌi, “Lekiꞌ-lekiꞌna toaꞌ to kodake tiꞌo hingkiꞌ nihukuhi wute nantolou-louna, angkana toaꞌ to moromiꞌ i pampeꞌelena Pueꞌ Ala hingkiꞌ pahuahi kotuwuꞌ to wolaꞌ to hawaꞌi mokoꞌukoa.”
Currently Selected:
Matius 25: LAILJE
Highlight
Copy
Compare
Share
Want to have your highlights saved across all your devices? Sign up or sign in
2017 Indonesian Bible Society (Lembaga Alkitab Indonesia)
