Matius 24
24
Hi Yesu mampololita kohingkiꞌ mokerona Tambina Pueꞌ Ala
(Mrk. 13:1-2; Luk. 21:5-6)
1Uko mololita, hi Yesu mampolihi Tambina Pueꞌ Ala. TopeguruNahi mangkododungkuiꞌI hingkeꞌna rotidoꞌkiꞌI komarangane hante komarohona tambi tiꞌo. 2#Ibr. 9:11-15; 1Ptr. 3:18; Mi. 3:12; Yer. 26:18Notiꞌikihi hi Yesu, “Iꞌokiꞌmokei lekiꞌ-lekiꞌne tiꞌo. Hingkeꞌna ibahaꞌkei: lekiꞌ-lekiꞌna tiꞌo hingkiꞌ mokero. Hawaꞌi uwaꞌ howeꞌ haꞌanu watu to hingkiꞌ melobi i peꞌohaꞌana.”
Pepongkana komaporiꞌ ikohandoaꞌana tene tutu duniaꞌ
(Mrk. 13:3-13; Luk. 21:7-19)
3Uko tiꞌo, molaimo hi Yesu hante topeguruNa nolou pe biri Saitu. Kolentuꞌana hi Yesu mahura hadoduoNa, noloumohi topeguruNe meꞌitano pe Io, “Guru, hiwaꞌimbo Tambine Pueꞌ Ala hingkiꞌ nikero hibali to Itiꞌi hingkenia?” Hei meꞌitano womohi, rotiꞌi, “Hapo tandaꞌne kohingkiꞌ hupaꞌMu hei hapo tandaꞌne kotutuana duniaꞌ?”
4Nohoniꞌ hi Yesu, “Majaga-jagakei, hingkeꞌna hawaꞌkei nipokonawuꞌ, 5alaꞌ woriꞌ toaꞌ hingkiꞌ hupaꞌ hei mantiꞌi koꞌiora Datu Topohompoꞌ, hei woriꞌ toaꞌ to hingkiꞌ ropokonawuꞌ. 6Hingkiꞌ ihorikei topoponiꞌ, hei hingkiꞌ ihorikei woꞌo kareba i imbo-imbolu uwaꞌ to moponiꞌ, angkana inioꞌkei morokaꞌ. Lekiꞌ-lekiꞌna tiꞌo bateꞌna hingkiꞌ mewali {alaꞌ nopokonontomo Pueꞌ Ala}. Angkana lekiꞌ-lekiꞌna tiꞌo handoaꞌi tene tempona kotutuana duniaꞌ. 7Toharoboꞌ hingkiꞌ moponiꞌ hante toharoboꞌ to ntaniꞌna, kodatua hingkiꞌ moꞌewa kodatua to ntaniꞌna, hei i imbo-imbolu hingkiꞌ uwaꞌ tempo kobilora hei luanoko. 8Lekiꞌ-lekiꞌna tiꞌo hangkoꞌlu pepongkana. Komaporiꞌ tiꞌo hibali komaporiꞌ to nohori towoweꞌe to hingkiꞌ moꞌanaꞌ hei komaporiꞌna tiꞌo hingkiꞌ tetambai tene komakajane.
9I tempo tiꞌo, nokomi petuntumi pe Aku, roboꞌ-roboꞌna i humanele duniaꞌ hingkiꞌ mokabiriꞌkei. Hingkiꞌ nipeweikei pe topoparenta, hingkeꞌna nipoperima-rimakei hei nirokoꞌkei. 10Woriꞌ toaꞌ hingkiꞌ mosapuaka petuntura pe Aku. Uwaꞌ to hingkiꞌ mampewei halali hampepoꞌohira pe poniꞌra, hei woriꞌ toaꞌ to hingkiꞌ momepokoiꞌ. 11Hingkiꞌ hupaꞌhi woꞌo woriꞌ nabi to hingkiꞌ mampomonawuꞌ woriꞌ toaꞌ. 12I tempo tiꞌo, hingkiꞌ tetambai kokodakere toaꞌ, wute hamboaꞌmo uwaꞌ komarimara i hangko awara. 13Angkana toaꞌ to motiko nturusi pepoꞌohira pe Aku wute i kotutuana, hingkiꞌ noposalamaꞌhi Pueꞌ Ala. 14Ane Kareba Moromiꞌ noniuꞌ i poparentana Pueꞌ Ala ropekarebaikimo i humanele duniaꞌ, hei toaꞌ i lekiꞌ-lekiꞌna roboꞌ pahorimo, honiꞌi hupaꞌ kotutuane duniaꞌ.”
Hi Yesu mampololita komaporiꞌ to makaja to hingkiꞌ mewali
(Mrk. 13:14-23; Luk. 21:20-24)
15Nopololiu hi Yesu lolitonane, Notiꞌi, “Hampiha, nabi Daniel mampololita kohingkiꞌ uwaꞌna ‘Tokodake to Mampomokero’ to hingkiꞌ mokokomaꞌi Tambina Pueꞌ Ala. (Hihimo to mobasa lolita hieꞌe, hangangaa nopekiri moromiꞌ hapo palaihane!) Ane iꞌokiꞌkei to notungkai Daniel tiꞌo metotiꞌi i Tambina Pueꞌ Ala, 16aginamo toaꞌ to meꞌohaꞌ i woiꞌ Yudea mengkatuwuꞌhi mehilai nolou pe biri. 17Toaꞌ to kolentuꞌana mahura meꞌohaꞌ i dopiꞌ to marante, hampoliꞌmokei mekahi pe lali tambimi moroa hapo-hapo. 18Toaꞌ to kolentuꞌana i kineteꞌ, hampoliꞌmokei lebaꞌ mahuliꞌ nolou pe bolaꞌ moroa baduꞌmi. Hangangaa kaliuꞌmokei mehilai! 19Hingkiꞌ maporiꞌ mpololeke rohori towoweꞌe to mehinonaꞌi hante to mepoꞌomiꞌ anaꞌna. 20Mekokaekei pe Pueꞌ Ala hingkeꞌna ando pehilaihami tiꞌo inioꞌ i tempo pokoꞌura ba i ando penombaha. 21#Dan. 12:1I tempo tiꞌo, hingkiꞌ hupaꞌ komaporiꞌ to makaja mpololeke to handoaꞌi tene kahampiha mewali mepongka ka pewalina duniaꞌ wute-wute hinewowoꞌena, hei hawaꞌi woꞌo uwaꞌ to hingkiꞌ mewali hatoꞌo i ando to hingkiꞌ hupaꞌ. 22Angkana tempo komaporiꞌ tiꞌo hawaꞌi hingkiꞌ nopomorue Pueꞌ Ala, alaꞌ ane Nopomorueꞌi, hawaꞌi uwaꞌ howeꞌ haduo to hingkiꞌ salamaꞌ. Angkana alaꞌ komarimaNa pe toaꞌ to Noꞌuwiꞌ, iomo horiana hawaꞌi Nopomorue tempo komaporiꞌ tiꞌo.
23I tempo tiꞌo, ane uwaꞌ to mampatiꞌikikei, ‘Ele, hieꞌemo Datu Topohompoꞌ!’ Ba ‘Hintumo humei!’ Inioꞌ ipoꞌohikei, 24alaꞌ hingkiꞌ hupaꞌ tempone toaꞌ mepomonawuꞌ to mantiꞌi koꞌioramo Datu Topohompoꞌ, ba to mantiꞌi koꞌioramo nabi. Hingkiꞌ mowalihi tandaꞌ kuasaꞌ hante tandaꞌ to mekohohokoi, hingkeꞌna mampomonawuꞌhi woriꞌ toaꞌ. Hingkoweꞌ toaꞌ to noꞌuwiꞌ Pueꞌ Ala mewali toaꞌNa, hingkiꞌ nihohongkeꞌhi nipokonawuꞌ. 25Lekiꞌ-lekiꞌna tiꞌo Kutiꞌikimokei umbiꞌ hingkeꞌna ane mewalimoꞌi, hawaꞌkei hingkiꞌ nipokonawuꞌ.
26Mewaliꞌ, ane uwaꞌ to mampatiꞌikikei, ‘Datu Topohompoꞌ uwaꞌ i popada lori,’ inioꞌkei nolou! Ane rotiꞌi, ‘Datu Topohompoꞌ uwaꞌ i tambi, i kamaraꞌ to tewowuni’, inioꞌ nipoꞌohiꞌi! 27Alaꞌ ane hupaꞌ huliꞌ Anaꞌ Manusiaꞌ, hingkiꞌ tongawa mpololeke kohupaꞌNe. Hingkiꞌ roꞌokiꞌ i humanele duniaꞌ, hibali wanta wiaꞌ to mehupaꞌ i motoꞌando hei mewanta wute-wute i kotompuha ando. 28Ane pangkiꞌkei woriꞌ tinti kokao hirampu, ibahaꞌkei koꞌuwaꞌne to mahi itoꞌo. Hatoꞌo woꞌo, hingkiꞌ mombaha mpololeke kohupaꞌne huliꞌ Anaꞌ Manusiaꞌ hei nobahaꞌ lekiꞌna toaꞌ.”
Hi Yesu mampololita kohingkiꞌ hupaꞌNa huliꞌ
(Mrk. 13:24-32; Luk. 21:25-33)
29“Ane liumoꞌi tempo komaporiꞌ tiꞌo,
‘ando hingkiꞌ mabaliꞌ mewali mokorindi,
wula hamboaꞌmo hingkiꞌ mewanta,
hei betueꞌ hingkiꞌ monawuꞌ ka laniꞌ.
Pueꞌ Ala hingkiꞌ modua lekiꞌ-lekiꞌna to uwaꞌ i laniꞌ.’ (Yes. 13:10; 34:4)
30I tempo tiꞌo, hingkiꞌ mehupaꞌ tandaꞌ i laniꞌ to mopalaiha kohupaꞌnamo Anaꞌ Manusiaꞌ, hei lekiꞌ-lekiꞌna roboꞌ i duniaꞌ toaꞌna hingkiꞌ meꞌolahi. Katoꞌo hingkiꞌ pangkiꞌhi Anaꞌ Manusiaꞌ i womboꞌ kini mengkohou humei ka laniꞌ. Hingkiꞌ mombaha mpololeke kuasaꞌNe hante komanobaꞌNa tuwuꞌNa. 31Torompeꞌ hingkiꞌ nitowuiꞌ nipokobue, hei Anaꞌ Manusiaꞌ hingkiꞌ morumbaꞌ malaꞌeka-malaꞌekaNa ako morampu toaꞌ to noꞌuwiꞌ Pueꞌ Ala mewali toaꞌNa ka humanele duniaꞌ, mepongka ka motoꞌando wute i kotompuha.”
Kohupaꞌna huliꞌ Anaꞌ Manusiaꞌ nipandiriꞌ hibali loti ara
32Uko tiꞌo, notiꞌi hi Yesu pe topeguruNa, “Ipoꞌilalikei hapo to hingkiꞌ Kupoturuꞌkikei ka loti ara. Ane iꞌokiꞌkei daꞌane mepuhuꞌ leaꞌ hei mepongka motaweꞌ, ibahaꞌmokei kohingkiꞌ hupaꞌne tempo poko ando. 33Hatoꞌo woꞌo, ane iꞌokiꞌkei pewaline lekiꞌ-lekiꞌna to Kupowutekikei hingkenia, ibahaꞌkei hamboaꞌmo morue kohingkiꞌ hupaꞌne Anaꞌ Manusiaꞌ. 34Tuꞌu mpololeke to Kutiꞌikikei: lekiꞌ-lekiꞌna to Kutiꞌi hingkenia bateꞌna hingkiꞌ mewali ikohandoaꞌana tene mahi lekiꞌ-lekiꞌna toaꞌ to tuwuꞌ tempo hieꞌe. 35#Mas. 119:89; Yes. 40:8; Mas. 102:25-27; Yes. 51:6Laniꞌ hante duniaꞌ hingkiꞌ uko, angkana lolitangKu bateꞌna uwaꞌ nturusi wute nantolou-louna.”
36“Angkana ando hante jaa kopewalina tiꞌo, hawaꞌi uwaꞌ toaꞌ to pobahaꞌ. Hingkoweꞌ malaꞌeka to uwaꞌ i suruga, hawaꞌi woꞌo robahaꞌ. Hei AnaꞌNa Pueꞌ Ala hawaꞌi woꞌo Nobahaꞌ, bateꞌnalu UmoꞌKu to pobahaꞌ.
Hangangaa majaga-jagakei mampekau kohupaꞌna huliꞌ Anaꞌ Manusiaꞌ
(Luk. 17:26-30, 34-36)
37Hapo to mewali i tempona nabi Nohoꞌ hampiha, hingkiꞌ mewali woꞌo i ando kohupaꞌna huliꞌ Anaꞌ Manusiaꞌ. 38#Pwl. 7:1-12I tempona nabi Nohoꞌ tuwuꞌ tene i duniaꞌ, ikohandoaꞌana tene duniaꞌ nolobuꞌi uwai, manusiaꞌ mangka, maꞌinu, hei mepahamokohi. Hatoꞌo kotuwuꞌra wute tempona nabi Nohoꞌ mekahi pe lali duanga to kodeꞌ. 39Nolobuꞌimohi uwai, hongkoꞌ wae robahaꞌ hapo to mewali. Hatoꞌo woꞌo kolembeꞌre toaꞌ i tempona Anaꞌ Manusiaꞌ hingkiꞌ hupaꞌ huliꞌ pe duniaꞌ. 40I tempo tiꞌo, ane uwaꞌ roduo toaꞌ majama i kineteꞌ: haduo hingkiꞌ niroa hei haduo nipolihi. 41Hatoꞌo woꞌo ane uwaꞌ roduo towoweꞌe to kolentuꞌara mabuhu: haduo hingkiꞌ niroa hei haduo ropolihi. 42Iomo horiana Kutiꞌi: hangangaa majaga-jagakei, alaꞌ hawaꞌkei ibahaꞌ hiwaꞌimbo Pueꞌ hingkiꞌ hupaꞌ!”
Kareba pandiriꞌ noniuꞌ i haduo tumpu tambi to majaga-jaga
43“Hangangaa ipoꞌilalikei pandiriꞌ hieꞌe: Ane kenobahaꞌi umbiꞌ tumpu tambi hiwaꞌimbo kohingkiꞌ hupaꞌne topanako, bateꞌna majaga-jaga, hawaꞌi hingkiꞌ nopotedehi mekahi pe lali tambina. 44Hatoꞌo woꞌo ingkei: hangangaa majaga-jagakei nturusi, alaꞌ hawaꞌkei ibahaꞌ hiwaꞌimbo kohingkiꞌ hupaꞌne huliꞌ Anaꞌ Manusiaꞌ.”
Pandiriꞌ noniuꞌ haduo hawiꞌ to mampopatengkaꞌ nturusi jamana
(Luk. 12:41-48)
45“Ipoꞌilalikei pandiriꞌ hieꞌe: uwaꞌ haduo hawiꞌ to pobahaꞌ mampekiri hei to nopoꞌohi tuana. Io nohini tuana motadulakoi hawiꞌ ntaniꞌna hei morewahi pangkara ando-ando. 46Ikohupaꞌna tuana, morasiꞌ mpololeke hawiꞌna tiꞌo ane nohuaꞌi tuana kolentuꞌana mampopatengkaꞌ jamana. 47Hei Kutiꞌikikei: hawiꞌ tiꞌo bateꞌna hingkiꞌ nohini tuana mewali to morewahi lekiꞌ-lekiꞌna lumana.
48Angkana hohumbo ane hawaꞌi moromiꞌ waliane hawiꞌ tiꞌo? Hingkiꞌ notiꞌi i lalina, 49‘Tuaku hawaꞌi hingkiꞌ hantouꞌ mahuliꞌ!’ Katoꞌo hingkiꞌ nopemolukamo mokondo hangko hawiꞌne, honiꞌi mangka hante maꞌinuluhi nturusi moꞌawa hante toaꞌ to malanu. 50Angkana, hawaꞌi nobahaꞌ kohingkiꞌ hupaꞌne tuana i ando hei i jaa to hawaꞌi nobahaꞌ-bahaꞌ. 51Hawiꞌ tiꞌo hingkiꞌ pahua pehuku to makaja hei nitube pe peꞌohaꞌana toaꞌ to mampetomoromiꞌ. Itoꞌo, hingkiꞌ meꞌolahi hei maporiꞌ mpololeke rohori.”
Currently Selected:
Matius 24: LAILJE
Highlight
Copy
Compare
Share
Want to have your highlights saved across all your devices? Sign up or sign in
2017 Indonesian Bible Society (Lembaga Alkitab Indonesia)
