PILOTIMUA̒TA 26
26
Kema lo Eeya
(Pilot. 36:8-38)
1“Pohutua mao̒ kema ola-U̒ monto mopuulo pata kaingi lineni moa̒aluti, hilewo wolo lambuto himba wahue̒nte, lailoumu wau meela. Hewola mao̒ kaingi boito wolo gambali malai̒kati opolipio̒. 2Timii̒du pata musi tutuuwauwa tuu̒udio, hayai̒o mopulaa dulo meeteri wau tanggalio dulo meteri. 3Limo lopata kaingi musi wumbutalo mowali ngolayahu, wau limo lopata wewolio musi pohutuolo odito olo. 4Pohutua mao̒ abitalio monto kaingi wahue̒nte tobiihu oluo lo layahu boito, 5limo lopulu abito to timii̒du layahu. 6Pohutua mao̒ limo lopulu kaito hulawa u mohumbutao̒ layahu duuduluo boito alihu mowali potuwauwolo.
7Duo̒lo watopo Kema boito pohutua mao̒ mopulaa tuwau lopata kaingi monto lambuto batade. 8Timii̒du pata musi tutuuwauwa tuu̒udio, hayai̒o mopulaa totolu lo meeteri wau tanggalio dulo meeteri. 9Limo lopata musi wumbuta mao̒ mowali ngolayahu, wau wolomo pata wewolio musi pohutua mao̒ odito olo. Wumbuto u olomio musi piu̒wola duluo u molau̒be towimbihu talu lo Kema. 10Popohulia mao̒ limo lopulu abito tobiihu layahu u bohulio wau limo lopulu abito tobiihu layahu u oluolio. 11Popohulia mao̒ limo lopulu kaito monto polunggu wau pokaita mao̒ to abito boito alihu layahio duuduluo boito mowali potuwauwola mowali watopo lo Kema. 12Ngoputu lopata kaingi ulebelio yito huna molau̒be towimbihu dibalaka lo Kema. 13Oleebe lokaingi ngotanggalo limo lopulu losenti ngohayao̒ Kema musi polulia mao̒ molau̒be biihu Kema boito.
14Pohutua mao̒ dulo tau̒bu towimbihu bulemengo Kema, tuwau monto walito himba ulai̒ u tilumba lou̒ meela wau tuwau poli monto walito moa̒aluti.
15Pohutua mao̒ popoo-ngawaa̒alo Kema utihu-tihula motulidu monto ayu aakasia. 16Timii̒du pongawaa̒ langgatio wopato meeteri wau tanggalio wolomo pulaa wolomo senti. 17To timii̒du pongawaa̒ opatoo̒ mohelu duluo u ngopange, tilinggula popoo-ngawaa̒alo boito mowali wumbutalo mowali tuwau wolo uwewo. 18To wimbihu huliaalio lo Kema, pohutua mao̒ dulopulu pongawaa̒, 19wolo wopato pulu wumbatio monto talaa̒, duluo towalungo lotimii̒du pongawaa̒ duo̒lo patoi̒o duuduluo. 20To wimbihu tilayo lo Kema, pohutua mao̒ dulopulu pongawaa̒ 21wolo wopato pulu wumbatio monto talaa̒, duluo towalungo lotimii̒du pongawaa̒. 22To wimbihu dibalaka lo Kema to ambahu otolopa, pohutua mao̒ wolomo pongawaa̒ 23wau dulo pongawaa̒ duo̒lo tutu-tutuulio. 24Popoo-ngawaa̒alo lotutulio boito musi powumbutolo towimbihu oa̒atio, tulusi demola wimbihu yitaatio. Oluo lo pongawaa̒ umohutu mao̒ tutulio musi pohutuwola wolo pohuli boito. 25Oditolio ngoa̒amilalo woluo mohelu walu pongawaa̒ wolo mopulaa wolomo wumbato, duluo towalungo lotimii̒du pongawaa̒.
26Pohutua mao̒ mopulaa limo ayu bulawahu monto ayu aakasia, limo ode popoo-ngawaa̒alo tobiihu tuwau lo Kema, 27limo duo̒lo biihu uwewo, wau limo poli duo̒lo biihu Kema wimbihu dibalaka ambahu otolopa. 28Ayu bulawahu u tohuungio musi pohuliyalo ngoilanggato ngoilambito lo pongawaa̒, monto huudio ode huudio lo Kema boito. 29Pongawaa̒ lo Kema wau aa̒a-yuwaalo bulawahu boito musi woludelo wolo hulawa. Papaa-tedeyaalo u polahangi aa̒a-yuwaalo boito musi pohutuwola monto hulawa. 30Potihula mao̒ Kema boito modudua̒ lanjana u pilotunu-U̒ mai olemu toitaato hui̒dee botie.
31Pohutua mao̒ sulambe ngopota lohuhebu monto lineni moa̒aluti u hilewo wolo lambuto himba wahue̒nte, lailoumu wau meela. Kalawowa mao̒ kaingi boito wolo gambali malai̒kati opilipio̒. 32Pontayanga mao̒ kaingi lohuhebu boito towolihi lo ayu aakasia mohelu wopato uwolu-wolude hulawa wolo kaito hulawa wau pohuliyolo toitaato wumbato talaa̒ mohelu wopato. 33Podutua mao̒ kaingi boito towalungo jeejeri lokaito towatopo Kema. To dibalaka lokaingi boito musi podutuwalo Bulua Daantia utua-tuanga botu duluo boito. Kaingi boito momua̒a Huwali Leidaa̒ Mantali monto Huwali Leidaa̒ Laba-labaalo mantali. 34Podutua mao̒ tau̒bu Bulua Daantia toitaato bulualio. 35Meja lodewo musi potambatia mao̒ to bulemengo Huwali Leidaa̒ Laba-labaalo mantali to wimbihu tilayo, wau oa̒ato tohe to wimbihu huliaalio todelomo Kema boito.
36Pohutua mao̒ podehu ode huhebu lo Kema monto kaingi lineni moa̒aluti u hilewo wolo lambuto himba wahue̒nte, lailoumu wau meela, pilakea wolo kalawo. 37Duo̒lo podehu boito musi pohutuwola wolihi mohelu limo monto ayu aakasia uwolu-wolude wolo hulawa wau powumbutolo wolo limo kaito hulawa. Pohutua mao̒ wumbato mohelu limo monto polunggu duo̒lo wowoo-lihiyaalo boito.”
Currently Selected:
PILOTIMUA̒TA 26: LAIGOR
Highlight
Copy
Compare
Share
Want to have your highlights saved across all your devices? Sign up or sign in
