PILOTIMUA̒TA 25
25
Dewo duo̒lo Kema lo Eeya
(Pilot. 35:4-9)
1 Eeya lotahuda odelei Musa, 2“Ahuliilo mao̒ taulo Isirai̒lu, modelo mai dewo ode Olau̒. Tatoonu tau̒moliyoo̒ hilaalio, musi modelo mao̒ dewo 3debo odelo: hulawa, talaa̒ wau polunggu; 4kaingi lineni u moa̒aluti, kaingi lambuto himba wahue̒nte, lailoumu, wau meela, kaingi monto lambuto batade 5walito himba ulai̒ u tilumba lou̒ meela, walito moa̒aluti, ayu aakasia, 6winulo ode tohe, ramba-ramba ode winulo upacala wau ode damahu umoonu, 7hidala-dalaala botu polioto u ilaatulu to epod wau tau̒bu duhelo li Iimamu Daa̒. 8Ahuli mao̒ bangusa boito mopo tihulo kema tuwau ode Olau̒, alihu Wau̒ mowali motibiluloa̒ tohuungi mongolio. 9Kema wau pohi wimumutio musi pohutuo mao̒ limongolio modudua̒ lanjana u mapilotunu-U̒ mai olemu.”
Bulua Daantia
(Pilot. 37:1-9)
10“Pohutua mao̒ bulua tuwau monto ayu aakasia u hayai̒o ngohetuto mopuulo senti, tanggalo wau langgatio wolomo pulaa wolomo senti meeteli. 11Woludi mao̒ wimbihu delomio wau bulemengio wolo hulawa tutu wau pohutua mao̒ biihio monto hulawa. 12Duo̒lo ayu pohulihelo pohutua mao̒ wopato pateda hulawa wau poa̒ita mao̒ to oa̒atio wopato, wau dulo pateda totimii̒du biihio. 13Pohutua mao̒ olo huhulihelio monto ayu aakasia wau woludi mao̒ uito wolo hulawa, 14lapatao̒ potuwota mao̒ ayu lo huhulihe boito ode delomo patedalio to timii̒du biihio lobulua boito. 15Ayu pohulehelo boito musi debo woluo todelomo papaa-tedawaalo boito, wau diila mowali yinggilolo. 16Lapatao̒ todelomo bulua boito musi dutuwomu mao̒ botu duluo wolo papaa-lentaalo u mawohi-U̒ mai olemu.
17Pohutua mao̒ tau̒bu bulua boito monto hulawa tutu, u hayai̒o ngohetuto mopuulo senti wau tanggalio wolomo pulaa wolomo senti. 18Pohutua mao̒ duluo malai̒kati opolipio̒ monto hulawa u dilupa, 19tuwau totimii̒du huudio lotau̒bu bulua boito. Duduuluolo malai̒kati opolipio̒ boito musi powaliyolo ngotayade wolo tau̒bio, 20wau pohutuolo tinggai tataalua wolo polipio̒ ubua̒-bua̒adu toitaato bulua boito. 21Dutua mao̒ dulobotu todelomo bulua boito wau popohulia mao̒ tau̒bio toitaatio. 22To tambati boito Wau̒ mamo dunggaya wolemu, wau monto yitaato lotau̒bio, towolota lo malai̒kati opolipio̒ duluo boito, yio̒ mawohiya-U̒ mai butoo̒o-U̒ duo̒lo bangusa lo Isirai̒lu.”
Meja ode roti pohinta
(Pilot. 37:10-16)
23“Pohutua mao̒ meja tuwau monto ayu aakasia u hayai̒o walu lopulaa walu losenti, tanggalio wopato pulaa pato losenti. 24Woludi mao̒ wolo hulawa tutu, wau popohulia mao̒ lesi hulawa tuwau tobiihio pali-palito. 25Pohutua mao̒ biihu meja ngotanggalo pitu apingo losenti wau wohia mao̒ enggadelio hulawa tobiihio pali-palita boito. 26Pohutua mao̒ pateda wopato monto hulawa wau popohulia mao̒ uito totutulio wopato to oa̒atio, totili lobiihio. 27Pateda boito hunalio polahangi ayu pomulihelio, alihu meja boito mowali potaalolo. 28Ayu pohulihelo boito musi pohutuolo monto ayu aakasia wau woludela wolo hulawa. 29Pohutua mao̒ pipii-nggeyaalo, mamaa-nggowaalo, gigii-ntiyaalo wau momoo-kuwaalo u podewowalo taluhu lo angguru. Ngoa̒amila powimumuto meja boito musi pohutuolo monto hulawa tutu. 30Meja boito musi dutuolo totalu lo Bulua Daantia, wau toitaato meja boito musi laito dapa-dapato roti pohinta.”
Oa̒ato tohe
(Pilot. 37:17-24)
31“Pohutua mao̒ oa̒ato tohe monto hulawa tutu. Wumbato wau didihimalio musi pohutuolo monto hulawa dilupa; bubuu-ngawaalo pake, leituwoto toyungo wau kolopaalio musi mowali tuwau wolo wumbato wau didihimalio. 32To didihima boito musi pohutua mao̒ tango wolomo, tango totolu totimii̒du biihio. 33Totimii̒du tangolio musi pohutua mao̒ pake debo odelo totolu bunga badam wolo toyungo wau kolopaalio. 34To didihimalio musi pohutua mao̒ pake debo odelo wopato bunga badam wolo toyungo wau kolopaalio. 35To walungo lotimii̒du pange lotango boito musi pohutuolo ngotoyungo. 36Ngoilanggubu oa̒ato tohe boito wolo totoo-yungowalo wau tataa-ngolio musi pohutuolo monto hulawa ngoputu udilupa belesi. 37Pohutua mao̒ pitu tohe to oa̒ato tohe boito wau popohulia mao̒ odito rupalio tilinggula tinelio motinelo ode talu. 38Pohutua mao̒ pakaakasi u mopo belesi tumbu lotohe wau bakilio olo monto hulawa tutu. 39Pomakea mao̒ tolo pulaa limo lokilo hulawa tutu u mohutu oa̒ato tohe boito wolo totoonulalo powimumutio. 40Poo̒dahai mao̒ alihu oa̒ato tohe boito pohutuolo moo̒ baaya u pilotunu-U̒ mai olemu toitaato hui̒dee botie.”
Currently Selected:
PILOTIMUA̒TA 25: LAIGOR
Highlight
Copy
Compare
Share
Want to have your highlights saved across all your devices? Sign up or sign in
