PILOTIMUA̒TA 22
22
Wuu̒du pasali lou̒ moluloo̒ uiluhi
1“Tatoonu tamotao̒ sapi tuwau meaalo himba lapatao̒ mongoloto meaalo mopotali mao̒, musi moluloa̒ao̒ timii̒du sapi tuwau wolo sapi mohelu limo wau timii̒du himba tuwau wolo himba mohelu wopato. 2-4Tio musi moluloo̒ balangi u tilao̒lio. Wonu tio diila owolo-wolo, tio lohihilao mapo taliilio odelo wato u moluluo̒ balangi u matilao̒lio. Wonu u tilao̒lio boito debo odelo sapi, kolodai meaalo himba, wau odungga totau boito donggo tumu-tumulo, tio musi moluloo̒ timii̒du binatangi tuwau wolo bibiahe mohelu duluo.
Wonu tou̒ hui ngotaalio lo tamootao̒wa owau̒palio todelomo bele tuwau, lapatao̒ tio ilopatea yila-yilateelo mao̒, yi taa u lomate olio yila-yilateelo mao̒ boito diila ototala. Bo wonu sua̒li boito motoduo tou̒ dulahu, yi taa u lomate olio yila-yilateelo mao̒ boito anggapuolo ototala.
5Tatoonu tamo poluli mao̒ lo bibiahio mongaa huo̒yota to halabolulio meaalo to ilengi lo anggurulio, lapatao̒ binatangi boito monao̒ ode utoonulo mao̒ wau mongaa tilapulo halabolu lotaa wewo, yi taa ohuu̒wo lo binatangi boito musi momayali mao̒ moluloo̒ uiluhi wolo tilapula ulebe mopioheo̒ monto halabolu meaalo ilengi lo anggurulio lohihilao.
6Tatoonu tamohutu tulu to halabolulio lohihilao lapatao̒ tulu boito umalapo ode halabolu lotaa wewo wau moo̒ pobu tunggula maahu pale udonggo hibutua mai, meaalo bulihu pale u boheli tilotobio mai, yi taa u helo polei̒tao̒ tulu boito musi momayali moluloo̒ uiluhi.
7Humayaalio woluo taa u akolo molahu mao̒ balangi pohangato debo odelo doi meaalo balangi ohalaga. Bo lapatao̒ u pilopo hangatio boito tilao̒ lotau lonto belelio. Wonu tamootao̒wa boito otaahua, yi tio musi momayali mao̒ poo̒oluo piu̒wa. 8Bo wonu tamootao̒wa boito diila ilodungga, yi taa u hepilopo hangatalio boito musi deloolo ode tambati poi̒baadatialo, wau mota teto tio musi motadia deu̒ tio diila lotao̒ balangi upilopo hangatio mao̒ olio.
9To timii̒du pobuutola pasali lohaku, diila otaawa pasali lo sapi, kolodai, himba, pakeyangi meaalo boli wolo wambai̒o u mooli lapatao̒ muli odungga, yi tau-tauwalo tamongaku odelo taa ohuu̒wolio musi deloolo ode tambati poi̒baadatialo. Taa u poilaalo mai lo Allahu Taa̒ala odelo taa u ototala, musi momayali mao̒ poo̒oluo piu̒wa to taa ohuu̒wolio.
10Humayaalio ngotaalio molaala kolodai, sapi, himba meaalo bibiahe u wewolio haku lo timongotalio. Lapatao̒ bibiahe boito mate, pilalia meaalo yilambato musu, lebe-lebe pomao̒ diaalu sakusiilio. 11To delomo sua̒li boito tio musi monao̒ mota ode tambati poi̒baadatialo wau motadia domi tanggulo Eeya deu̒ tio diila lotao̒ bibiahe u mapilo malacaya mao̒ olio. Wonu tio memangi diila helotao̒ uito, yi taa ohuu̒wolio musi momanta mao̒ ooluhi boito, wau taa u lomiyaheo̒ boito diila palalu momayali moluloo̒ u yiluhi. 12Wonu bibiahe boito tilao̒ lo taawewo, yi taa u helo miyaheo̒ musi momayali moluloo̒ u yiluhi ode taa ohuu̒wolio. 13Wonu bibiahe boito dilangapo lo binatangi u mongantau, taa u lomiyaheo̒ musi mopo biloheo̒ lalaa-bitowaalo lo tulalio odelo bukuti to taa ohuu̒wolio, diila palalu tio momayali moluloo̒ u yiluhi duo̒lo binatangi boito.
14Wonu tahingota-ngotaawa mobuloto bibiahe tuwau lapatao̒ bibiahe boito pilalia meaalo yilate tou̒ taa ohuu̒wolio diaaluo totambati ui̒lowalia mai boito, yi talo bulotao̒ boito musi momayali moluloo̒ u yiluhi. 15Bo wonu uito lotoduo mai tou̒ taa ohuu̒wolio woluo teto, talo bulotao̒ diila palalu momayali moluloo̒ u yiluhi, wonu bibiahe boito bibiahe hepo sewalio, ooluhilio otau̒be lo onggosi loseuwa.”
Wuu̒du pasali lo osusila wau ibaadati
16“Tatoonu tamomiyo tadulahu ngota tadiipo otilantahu u motuluhe pee̒-pee̒enta wolio, musi momayali tonelio wau monika mao̒ olio. 17Bo wonu tiyamolio diila mopoluasi mao̒ talolai̒ boito monika wolo walai̒o, talolai̒ boito musi momayali mao̒ ode liyamolio boito doi ngojumula tonelo ode ngotaalio lowalao̒ tadulahu.
18Timii̒du taabua tamohutu sihiri musi pateelo mate-mateelo mao̒.
19Taa u mohule wolo binatangi musi pateelo mate-mateelo mao̒.
20Tatoonu tamopodewo bake ode ila-ila wewo ngopohia ode ola-U̒, Eeya, musi hukuu-maniyola mate.
21Diila mao̒ podeehe meaalo mohutu udiila aadili ode tau deli; eelai mola omoo̒omolu timongoli olo tau deli to Masiri. 22Diila mao̒ pohutua tahi jaandawa meaalo walao̒ tadidu otiilo otiyamo lou̒ tohila-hilaamu. 23Wonu timongoli mopoo̒ leetoo̒ olimongolio, Wau̒, Eeya mamo dungohe olimongolio wonu timongolio mongiibodu mei̒ tulungi to ola-U̒. 24Wau̒ mamoluka mai wau momate mateelo mao̒ olimongolio todelomo popaatea, tilinggula mongo dile limongoli mowali janda, wau mongo walau̒mu mowali didu otiyamo.
25Wonu timongoli mopo bulotao̒ doi ode taa mosikini ngota towolota lo bangusaa-U̒, diila mao̒ pohutua debo odelo tamootagia biloli u mohile wolo moo̒ohuu̒ bungalio. 26Wonu timongoli mohama jumba lotaa wewo odelo pongaku to biloliilio, jumba boito musi pohualingao̒ limongoli tou̒ dulahu diipo tumolopa, 27sababu kaingi boito yito haku utuwa-tuwaulo u moo̒patu batangalio. Wonu diila pohuwalingo mao̒ ode olio, donggo wolo poli umusi pomakelio duo̒lo pohuloto tou̒ motuluhu? Wonu tio mongiibode mei̒ tulungi to ola-U̒, yi Wau̒ mamo dungohe olio sababu Wau̒ odehu hilao.
28Diila mao̒ potadia Allahu Taa̒ala wau diila mao̒ polaa̒nati tauwa lo bangusaamu.
29To wakutu utilantu, podewowalo mai ola-U̒ ngotayadu monto tilapula lo palemu, taluhu anggurumu wau winulo jaitunimu.
Wuduwalo mai ola-U̒ mongo walau̒mu talolai tamohuhula daa̒, 30wau olo sapi ulai̒ wau himba ulai̒ ubohulo pilotutu mai. Hulii mao̒ bibii-natangiyalo boito motitolaa to oliilolio ngotilonggadu pituhui mola, lapatao̒ wudua mai ode ola-U̒ todulahee u owalulio.
31Timongoli umati-U̒, sababu uito penu boli binatangi wolo olo u dilangapo lo binatangi mongantau, diila mowali tamelo limongoli tapulio; wohia mao̒ uito ode aa̒a-pulaalo.”
Currently Selected:
PILOTIMUA̒TA 22: LAIGOR
Highlight
Copy
Compare
Share
Want to have your highlights saved across all your devices? Sign up or sign in
