PILOTIMUA̒TA 21
21
Dudelo lou̒ mopohutu mai wato
(Tin. 15:12-18)
1Lapatao̒ Eeya lotahuda mao̒ odelei Musa, “Wohia mao̒ to taulo Isirai̒lu wuu̒du botie: 2Wonu timongoli motali wato ngota lo bangusaamu lohihilao, tio musi mokalaja duo̒lomu ngotilonggadu wolomo taunu mola. Totaunu opitulio tio musi lopatolo wau diila palalu momayali mao̒ wolo-wolo. 3Humayaalio tio donggo bohulotau tou̒ mowali watomu, yi dilelio taabua diila mowali moduduo̒ tou̒ tio lumuwalo. Bo humayaalio tio malonika tou̒ lowali watomu, dilelio mowali moduduo̒ pee̒-pee̒enta wolio. 4Wonu tituanilio moponika mao̒ olio wolo taabua ngota, lapatao̒ tio loo̒tapu walao̒, yi dilelio wau walai̒o boito yito haku lituanilio, wau diila mowali moduduo̒ wolo wato boito tou̒ tio lopatolo. 5Bo humayaalio wato boito mopo biloheo̒ deu̒ tio motolia̒ngo todilelio, mongo walai̒o, wau tituanilio, wau diila mohuto lopatolo, 6yi tituanilio musi modelo mao̒ olio ode tambati poi̒baadatialo. Mola teto wato boito ahuli mao̒ timihula motidenela tohuhebu meaalo towolihi lohuhebu tambati poi̒baadatialo, wau ti tituanilio musi molooa̒ao̒ bulonga lowato boito. Yi tio mamowali watolio ngotupa lo tutumulio.
7Wonu taabua ngota lo Ibrani potali mao̒ odelo wato liyamolio, taabua boito diila lopatolo lapatio mao̒ wolomo taunu mola, oditolio hihiihede wolo wato talolai̒. 8Wonu tio diila moo̒sanangi oli tuanilio u oniyati monika olio, yi tio musi muli potali mao̒ tomongo dulaa̒lio. Taabua boito diila mowali potali ode tau deli, sababu tio mapilo hutulio lou̒ diila aadili lituanilio tadiila moe̒ela dantilio. 9Wonu bolo tahingota-ngotaawa motali mao̒ wato taabua u powaliilio dile lowalai̒o, yi wato taabua boito musi pohutua mao̒ debo odelo walai̒o lohihilao. 10Wonu walao̒ talolai̒ boito muli monika, tio debo owajibu u mongohi mao̒ ua̒alo wau pakeyangi wau ngoa̒amila haku debo odelo biasa todilelio tabohulio. 11Wonu tio diila mopoo̒polu mao̒ uwajibu boito, tio musi molopatao̒ dilelio boito lou̒ diila mololimo doi potoloto.”
Wuu̒du pasali lohuhutu diila motota lou̒ odehu hilao
12“Tatoonu tamomate taa wewo tunggula mate musi hukuu-maniyola mate. 13Bo wonu tio momate lou̒ diila sangaja wau diila omakusudu momate mateelo mao̒, tio mowali mopolahi batanga ode tambati tuwau umaa potunuwo-U̒ olemu, wau mola teto tio moo̒tapu poti duo̒lalo. 14Bo wonu tahingota-ngotaawa moingo wau wolo sangaja momate taa wewo mate-mateelo mao̒, lapatao̒ tumeteo̒ ode mesba-U̒ u moo̒tapu poti duo̒lalo, tau boito musi hamaalo monto mesba wau hukuu-maniyola mate.
15Tatoonu tamomate oliyamo meaalo oliilolio musi hukuu-maniyola mate.
16Tatoonu tamopo tetea̒a tahingota-ngotaawa, musi hukuu-maniyola mate, diila otaawa tau boito mapilo taliilio meaalo donggo woluo tobelelio.
17Tatoonu tamo laa̒nati oliyamo meaalo oliilolio, musi hukuu-maniyola mate.
18Wonu todelomo polohulua tuwau tahingota-ngotaawa momate taa wewo wolo botu meaalo wolo baa̒alio, bo diila momate olio mate-mateelo mao̒, tio diila hukuu-maniyola. Wonu taa upilate boito tunggula musi meibalato akiibati lou̒ pilatelio boito, 19bo lapatao̒ mowali mobongu mai wau muli monao̒ poli wolo tunggudu, taa u helomate olio boito musi morawati mao̒ olio tunggula moluli wau moluloa̒ao̒ uiluhi ngotilonggadu tio mongongoto.
20Tatoonu tamomate watolio talolai̒ meaalo taabua tilinggula watolio boito tulusi yilate, musi hukuu-maniyola. 21Bo wonu wato boito diila mate todelomo ungohui meaalo duuhui mola, tituanilio boito diila hukuu-maniyola. Ooluhi u ilolasawa-Lio sababu iloolia lowatolio boito debo odelo hukuumani ode olio.
22Wonu dengolo lota mongo lolai̒ donggo hipoloo-hulua wau tala ngota towolota limongolio loo̒ topotala to taabua ngota ombodaa̒ tilinggula tio ileenggila, bo diila helo dutolo towimbihu uwewo, yi tau boito musi momayali mao̒ dinta ngojumula u pilohile wolo moo̒ohuu̒ lodilelio talolai wau ilakoloa lomongo hakimu. 23Bo wonu taabua boito topotala ulebe mobuheetao̒, yi hukuumani duo̒lo ololeeto boito yito nyawa tuwoliyala lonyawa, 24mato towoliyala lomato, dungito towoliyala lodungito, uluu̒ towoliyala lo uluu̒, oa̒ato towoliyala lo oa̒ato, 25pali mopobu towoliyala lopali mopobu, matango towoliyala lomatango.
26Tatoonu tamomate mato lowatolio tunggula pitoo̒, musi lopatolo wato boito odelo potoloto duo̒lo matolio. 27Wonu tahingota-ngotaawa momate watolio tunggula moboli dungitio, wato boito musi lopatolo odelo potoloto duo̒lo dungitio boito.”
Titihula lomongo taa ohuu̒wo
28“Wonu sapi ulai̒ tuwau molunge tahingota-ngotaawa tunggula mate, sapi boito musi pai̒yola lobotu tunggula mate, wau tapulio diila mowali tamelolo, bo taa ohuu̒wolio diila tahukuu-maniyola. 29Wonu sapi ulai̒ boito mabiasaalio hemolunge, wau taa ohuu̒wolio mapilopo eelao̒, bo diila modaha mao̒ binatangi boito, lapatao̒ wonu bolo sapi ulai̒ boito molunge tahingota-ngotaawa tunggula mate, yi binatangi boito musi pai̒yola lobotu mate-mateelo mao̒ wau taa ohuu̒wolio olo musi hukuu-maniyolo mate. 30Bo wonu taa ohuu̒wo losapi boito luasiyalo momayali mao̒ potoloto, tio musi momayali ngoolo mao̒ daatalio upilohile wolo moo̒ohuu̒ u motolotao̒ nyawalio. 31Wonu tapilate yila-yilateelo mao̒ boito ngotaalio lowalao̒ talolai̒ meaalo taabua, pohu-pohutu wuu̒du boito olo. 32Wonu tai̒lopatea yila-yilateelo mao̒ boito ngotaalio lowato talolai̒ meaalo taabua, yi taa ohuu̒wo losapi boito musi momayali mao̒ tolo pulu doi talaa̒ to taa ohuu̒wo lowato boito, wau sapi musi pai̒yola lobotu tunggula mate.
33Tatoonu tamohama tau̒bu monto ali tuwau meaalo mongau̒de ali wau diila molau̒beo̒, lapatao̒ sapi tuwau ulai̒ meaalo kolodai modehu mola ode delomio, 34taa ohuu̒wo lo ali boito musi momayali poluloo̒ mao̒ uiluhi ode taa ohuu̒wo lo bibiahe boito, bo tio mowali mohama mao̒ bibiahe u mailate boito ode batangalio. 35Wonu sapi ulai̒ lo tahingota-ngotaawa momate mateelo mao̒ sapi ulai̒ lotaa wewo, taa ohuu̒wolio duduulotalo boito musi mopotali mao̒ bibiahe udonggo tumu-tumulo boito wau molayadeo̒ doilio. Timongolio olo musi molayadeo̒ tapu lo bibiahe uilate boito. 36Bo wonu mai̒lotaawa mao̒ deu̒ sapi ulai̒ boito mabiasa hemo lulengo wau taa ohuu̒wolio diila helodaha mao̒, tio musi moluloa̒ao̒ mao̒ wolo sapi ulai̒ u donggo tumu-tumulo, wau mowali mohama mao̒ bibiahe u mailate boito ode batangalio.”
Currently Selected:
PILOTIMUA̒TA 21: LAIGOR
Highlight
Copy
Compare
Share
Want to have your highlights saved across all your devices? Sign up or sign in
