PILOTIMUA̒TA 20
20
Opulu lopalenta
(Tin. 5:1-21)
1Lapatao̒ Allahu Taa̒ala helo bisala mai, wau uti-utieelo tataahe-Lio, 2“Wau̒lo Eeya Allahu Taa̒ala limongoli tahe lodelo olimongoli yilumualao̒ lonto Masiri tambati pilowatolio olimongoli.
3Diila mao̒ polubo ila-ila wewo. Tubowaalo Wau̒ wambao̒.
4Diila mao̒ pohutua ode batangamu bui̒ u penu boli debo odelo wolo uwoluo tohulungo, tohuta meaalo todelomo taluhu to walungo huta. 5Diila mao̒ polubo bui̒ debo odelo uito, sababu Wau̒lo Eeya Allahu Taa̒ala limongoli, wau Wau̒ diila motohilaa potutuu-wauwolo penu boli wolita. Tau-tauwalo tahi polonua̒wa ola-U̒, hukuu-maniyo-U̒ demola wali otolulio wau opatio. 6Bo Wau̒ mopo bilohei ponu-U̒ ode helihu-lihua wali mai lotau-tauwalo tahipo tolia̒ngowa ola-U̒ wau modungohe palentaa-U̒.
7Diila mao̒ polanggula tanggulu-U̒ wolo laatao̒ laatao̒, sababu Wau̒, Eeya Allahu Taa̒ala limongoli, mohukuumani mai penu boli tatoonu tamomake tanggulu-U̒ lou̒ talatala.
8Polameyaalo dulahu Saabati wau hulumatia mao̒ dulahee boito. 9Wolomo hui mola wohi-U̒ mai olimongoli u mokalaja, 10bo todulahee u opitulio yi todulahee u tolomodu pohuheliyalo ode ola-U̒. Todulahee boito diaaluo penu boli ngotaa mao̒ tamowali mokalaja, mopio timongoli, meaalo mongo walau̒mu, mongo watomu, bibiahumu meaalo tau deli tahi biluloa̒wa tolipumu. 11To delomo wolomo hui mola, Wau̒, Eeya, helo powali mai dunia, hulungo, deheto, wau totoonulalo uwoluo todelomio, bo todulahee u opitulio Wau̒ lohuheli. Uitolo sababuulio Wau̒, Eeya lobalakati mai dulahu Saabati wau lopo tolomodu mao̒ duo̒lo batanga-U̒.
12Hulumatia mao̒ tiyamo wau tiilamu, alihu timongoli moa̒ahu wau otutumulo hayahaya tolipu u mawohi-U̒ mai olemu.
13Diila mao̒ pomate mate-mateelo mao̒.
14Diila mao̒ pojina.
15Diila mao̒ potao̒.
16Diila mao̒ pongohi sakusi paluti pasali lotaa wewo.
17Diila mao̒ potohilaa halata lotaa wewo: belelio, dilelio taabua, mongo watolio, bibiahio, kolodailio, meaalo penu boli wolo u mililikiilio.”
Owoohe taulo Isirai̒lu
(Tin. 5:22-33)
18Tou̒ tau-tauwala loo̒dungohe bulonggodu wau tingohu torompeti, wau loo̒onto ilato wau hui̒dee u opoloo̒, timongolio mahulu-huluhelio yiloohe wau tilimihulao̒ helo tilaminga mota. 19Uali mongolio odelei Musa, “Yio̒lo wambao̒ tamo bisala mai to olami, ami mamo dungoheo̒; bo diila mao̒ Allahu Taa̒ala tamo bisala mai to olami, de ami mate.”
20Tametao̒ lei Musa, “Diila mao̒ oohe, Allahu Taa̒ala dungga-dungga mai bo mai mohimontala olimongoli alihu timongoli debo modungohe o-Lio, wau diila odusa.” 21Bo tau-tauwalo boito debo hitihula helo tilaminga mota, wau bo tei Musa wambao̒ talo himbideo̒ heengo modio̒lomo totambati owoluwo lo Allahu Taa̒ala.
Wuu̒du pasali lomesba
22 Eeya lomalentao̒ olei Musa u lopoo̒taa tobangusa lo Isirai̒lu, “Timongoli maloo̒onto woloolo mola Wau̒, Eeya, helo tahuda mai olemu lonto hulungo. 23Diila mao̒ pohutua duo̒lo batangamu bubuu-iyaalo talaa̒ meaalo hulawa u tuboo limongoli ngopohia Wau̒. 24Pohutua mao̒ ode ola-U̒ mesba tuwau monto huta, lapatao̒ podewowalo teto himba wau sapi limongoli duo̒lo bake yilalango wau bake lo polodame. To timii̒du tambati u tantuwo-U̒ mao̒ olimongoli odelo tambati u poi̒baadatialo ode ola-U̒, Wau̒ mamei dungga mai wau mobalakati olimongoli. 25Wonu timongoli mohutu mao̒ ola-U̒ mesba tuwau monto botu, diila mao̒ pohutua uito monto botu u pilaahati, sababu wonu timongoli momake pahaati u momuongo botu, yi mesba boito diilalo mowali pomake ode ola-U̒. 26Diila mao̒ pomongu mesba u molanggato tilunggula musi pia̒atolo wolo tutuua̒du, alihu diila mao̒ oontonga wimbihu wawau̒mu udiila patuti biloheelo.”
Currently Selected:
PILOTIMUA̒TA 20: LAIGOR
Highlight
Copy
Compare
Share
Want to have your highlights saved across all your devices? Sign up or sign in
