Rut 1
1
Elimelec wanaihni balna Moab yakat
1-2Israel pasyak wihta balna manah tunan kakawadai mani yakat, yuhlakna dai kidika pāni yakat. Kaput laih Judá sauni yakat pa as ayangni Betlehem yakat al as sakdai ayangni laih Elimelec, bahang kidika alni, ma as as Moab sauni yakat kiwi yalahna dai. Witing yalni Noemí karak uinadai, dawak walanibis balna bu karak, Mahlón dawak Quelión balna kidika. Witingna bitik laih Efrateo#1 Cr 4:4. balna dai; yuldarangkat Betlehem#1.1-2 Betlehem ayangni ūk kidika laih Efrata. kaupak. Kaput laih Moab yakat uiwi watwi yalalahna dai.
3Yakat dauna Elimelec, Noemí alni dai kidika, kaput laih witing alas kalahna, walanibis ahal bu kidika karak. 4Usnit kat wawahma balna dai kidika Moab yayalni balna karak kalduduna; yayal kidika as ayangni laih Orfa, dawak ūk kidika laih Rut. Kurih salap bayakwakat 5Mahlón dawak Quelión balna dai kidika bik dadauna, dawak Noemí dai kidika alas kalahna ilpni as bik dis, walanibis balna dawak alni bik dis.
Noemí dawi Rut karak Betlehem yakat uina
6Mani as kat Noemí Moab yakat yul as dakana Dawan yaklauwi witing tawanni yakat minikun talna, bahang yuh dai kidika dawak bayakkiuna. 7Bahang nawatwi kiunin kulna Judá yakat unisah yayal balna yakarak kalpakwi, kaput laih panina kaupak dawi kalahwi uina; 8kaunah ta pasyakat diyulna:
—Nawatta ūmana kau yawanauh. Dawan yaklauwi yamni manayamna karang, manna lawa yang akat yamni yāyamnamana kapat, dawak walakibis balna yakat bik yamni diyamnamana dai kapat, 9dawak watwi manawak al dutanama, ūmana bik duta kulnamnalak awanama.
Usnitkat Noemí yaklauwi dilaihwi umna mahka kaldakwi kalalahwa bahang, kaunah witingna kakaidana 10dawak kalyuyulna:
—¡Dikah! ¡Yangna man karak yawanaki ki sauma yakat!
11Noemí watwi yulwasdana:
—Yawanauh walakibis yayal balna, ¿aisyamta yang karak kiunin kultamanah? Yang walakibis ahal baisa ūk disyang manna karak kaldunamna. 12Ūmana kau nawatta yawanauh. Yang uman muihbarak kalnayang, wattik al dutik walabis yakna atnik. Kaput al dutik walabis yaknik sip karang kat, 13¿manna tahatanamayah walanibis balna kidika muihbararak kakalwak manna kalduna atnamna? ¿Manna al dutas data kidika tahanamnayah? Dikah walakibis yayal balna, kaput atnin laih awaski. Dawan yaklauwi wauhnin tapalhni as yasihna, kaunah baisa tapalhni karang manna dalani wauhtanang manatalki kat.
14Witingna watwi kakaidana. Witni kat Orfa laih unisah yal yakat umwi dawi mahka kiuna, kaunah Rut laih witing karak watnadai. 15Kaput laih Noemí kalyulna:
—Talah mumabin laih mahka sauni kau nawatwi kiwi, dawak daniwan balna kau bik. Man bik yawah witing karak.
16Kaunah Rut yaklauwi nangnitlana:
—¡Yayulwinih madana atnik, dawak bik man kaupak daktik alahwinik bik! Yawaki man angkat yawama yakat, dawak bik man angkat yalahma yakat yang bik yakat yalahki. Man tawanma kidika yang tawanki karang, man Papangma kidika yang Papangki karang. 17Dauki ki man angkat dauma yakat, dawak dukih yawi yakat yanuna atnin. ¡Dawan yaklauwi wah yana karang parasni palni man kaupak datik alahwaki kat, dauki manah laih takat!
18Noemí talna, Rut yaklauwi rahm palni kalyulwa kidika, bahang kaput laih watwi kalyulwas danadai nawatwi kiunin yulni kidika, 19kaput laih albupak ta yakat kalahwi lapakwi uina, Betlehem kat.
Betlehem yakat uiwi kakana kat, muih balna kidika bitik kulninna sat sat kukulna tawan kidika bitik. Yayal kidika laih yuyulwadai:
—¿Adika awasyah Noemí?
20Kaunah witing yaklauwi nangnitnalana:
—Baisa Noemí#1.20 Hibru kau Noemí tanka laih damni kidika laih yang diki. yayuyulwinih, kaunah yayultanauh Mara#1.20 Hibru kau Mara tanka laih tapalhni. kat Papang parasni nuhni duwa kidika yaklauwi tapahlni manah yabangna. 21Akaupak alahwik yawanayang tingki yakat dibuhng, kaunah waralaih aiwayang tingki pāni manah, kat Dawan yaklauwi kaput kulna dai bahang. ¿Ais yamta Noemí yatimanah, Dawan parasni bitik duwa kidika yaklauwi dutni yakat yahana kidika, dawak kulnin bukna lani manah?
22Kaput laih Noemí nawatwi kaina dai Moab kaupak Rut karak, Moab muihni. Betlehem yakat uiwi kakanadai, bahang kidika mani balna yakat kidika plawar minik babahwadai.
Currently Selected:
Rut 1: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998