Proverbios 1
1
Proverbios praisni kidika
1Salomón yulni balna,#1 Re 4:32; Pro 10:1; 25:1. Devid walanibis, Israel kingni, 2kulnin lani duwa kidika laih:
sinsni tuhni#Jm 1:5; 3:13-17. kidika muih yakat yulnin dawak sumalnin bik,
ilp kalawak amanglanin yul sins lani duwa balna kidika,
3sumalwa kidika lan kalnin, dawak sins duyang atnin,
la kat atnin, barangni dawak papus yakat papatni atnin;
4wawahma di amanglalawas balna yakat sins dunin,
sins kidika dianin dawak di tanka walwi talnin kidika bik.
5Sins duwa kidika laih kulnin sirihni ki, dawak dakawi,
kaput laih sins tuhni kidika baisa duwi
6sins duyang balna yuyulwa kidika amanglanin kat,
dawak yul balna, sampla dawak yul malni balna.
7Sins tuhni kidika laih Dawan yakat rispik kalanin;#Job 28:28; Sal 111:10; Pro 9:10; 15:33.
tapadadas balna sins tuhni kidika dauh kukulwi,
dawak sumalwa kidika bik.
Wawahma yakat yul sumalwi
8Walakibis, papangma yul masumalwa kidika dakah,
dawak nanangma yul masumalwa kidika ruhmwinih,
9man namangyakat di yaksihni as karang:
alah as kapat dawak kraun as kapat.#Pro 6:20-21.
10Muih dudutni balna kidika alas mayuldang atwakat,
¡walakibis, dawinih!#Sal 1:1.
11Sip kat mayuyulwarang: “Yangna karak aiwah;
ting yamdi malni kau laihnin dini ādarang
muih dutni yamwas kidika bayakwak inin.
12Ahal dutni yayamwas kidika sangka daldarang
sihm daunin yaklauwi dahlwa kapat sau-ū yakat kakawakat.
13Ritsni balna satni bitik dudarang,
¡maūki kidika buhng dādarang, di maldi pudi!
14Aiwa suerte dutaman kidika wayahyakta yangna karak,
dawak yangna bitik lalahkina kidika man bik dutah.”
15¡Kaunah walakibis witingna karak kiwinih!
Ta dutni kaupak nai alahwah,
16witingna laih sirihni ahawi dutni yamnin manah;
¡muih ani utuhnin kidika sirihni yayamwi!#Is 59:7; Rom 3:15.
17Laihnin dini malnikau ahawa kidika yamnin awasbik yayamwi
uhu balna bik sipki talninna,
18kidika ahalni balna, laihnin dini malni kau ahana yakat
witingna silp bubukwarang ki,
dawak sangninaka kidika yamadangni yakat ahawi.
19Witingna manah dukih diawa balna kidika laih kaput dahn kakalwi:
witingna manah dikih diawa kidika yaklauwi iwi.
Sins tuhni yaklauwi kiunin maiyulwa kidika
20Tapas balna yakat;
sins tuhni kidika dinit yulwak dakakawi;
21dūr balna yakat yulni balna kidika sumalwi;
tawan nuhni paskau muih mahni kalududuhwa yakat:#Pro 8:1-3.
22“Wawahma di amanglatasmana kidika, sarahni yulyang
dawak tapadadas balna,
¿di amanglawas atnin kidik dukih manawa kidika mampat datanamayah,
dawak bik dukih manawa kidika yaktanamayah
sarahni yultamana kidika kaupak,
dawak bik di amanglanin dukih manawas kidika?
23Dakanauh, dutni balna barangni yamnin yultayang kidika
yang spiritki manah bungdaki;
yang kulnik kidika namangnakaki.
24Yang lawik manayulnayang aiwanamna,
kaunah manna yang yulki dakasmana,
25Nawatnikauh laih, yul sumaltayang kidika ruhmta danamana;
dukih manawaski barangni ātayang kidika.
26¡Dutni wauhnin kidika kaiwarang kat araki!
¡Sarahni manayulki, muihsak dautanangkat yamaduta
27manna mamatna yakat yamadunin dawak pāt kidika kaiwarang kat,
isning abahlnin dawak, kulnin kaidinin bik,
wing purwi kaiwi di daukalwa kapat!
28“Kidika mani yawaltanama, kaunah nangmatnalatas awaki;
yawaltanama kaunah yayaktas awanama;
29kat sins tuhni kidika dauh kultamana bahang,
Dawan yakat risnipik kalakih manawas bahang.
30Yul sumaltayang kidika dukih manawas ki,
dauh kultamana barangni ātayang kidika.
31¡Yamtamana kidika yulni laih wauhtanama!
¡Dutni yamtamana kidika laih manasuhna karang!
32Di amanglawas kidika yaklauwi dihiwi,
tapadadas balna laih kulninna abahlwa kidika dihiwi.
33Kaunah yadakawarang kidika, kulnin aslah sangka karang,
yamadangni as bik yamaduwas karang.”
Currently Selected:
Proverbios 1: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998