Números 1
1
Sinaí yakat Israel balna ayangnina ahana
1Kurih bu laihwi bayakwak, waiku bu kidika kawakat ma tatuna yakat, Israel muihni balna Egipto kaupak kalalahna kurih as minit kau apis duwa dai yakat, Dawan yaklauwi Sinaí kauhnimak walang yakat kiuna, Moses yakat, Papang karak kalpaknin ūni labanni yakat, dawak aput kalyulna:
2“Israel muihni balna bitik ayangnina ātanauh,#Nm 26:1-51. sulanina balna kau, dawak walaninabis balna kau bik, kaput laih amanglana atnin ayangnina kidik, dawakat ahal ampus kidika ba bik 3kurih 20 duduwa minitkauh kalbaunin sip muihni balna kidika. Ayangnina ātanauh kalbauyang balna ayangnina ahawa kaput, Aarón yaklau 4dawak sulani balna paskaupak papang balna as as bik ilp mananawak. 5Adika ki tanituna muihni balna ayangnina, witingna yaklau ilp mananawarang kidika:
“Rubén sulani kaupak: Elisur, Sedeur walanibis.
6“Simeón sulani kaupak: Selumiel, Zurisadai walanibis.
7“Judá sulani kaupak: Naasón, Aminadab walanibis.
8“Isacar sulani kaupak: Natanael, Zuar walanibis.
9“Zabulón sulani kaupak: Eliab, Helón walanibis.
10“José walanibis balna sulanina kaupak: Elisama, Amiud walanibis, Efraín kaupak; dawak Gamaliel, Pedasur walanibis, Manasés kaupak kidika.
11“Benjamín sulani kaupak: Abidán, Gedeoni walanibis.
12“Dan sulani kaupak: Ahiezer, Amisadai walanibis.
13“Aser sulani kaupak: Pagiel, Ocrán walanibis.
14“Gad sulani kaupak: Eliasaf, Reuel#1.14 Reuel: grik kau ulna kidika laih kaput yulwi. Hibru kau laih Deuel (kaput bik 2:14; 7:42; 10:20 kidika balna yakat bik). walanibis.
15“Neftalí sulani kaupak: Ahira, Enán walanibis.”
16Adika tunan muihni balna walwi yakna dai Israel muihni balna paskaupak witingna sulanina kat kat tunan kana atninna. 17-18Waiku bu kawak ma tatuna yakat, Moses dawi Aarón karak kalpakwi kidika ahalni balna Papang yaklauwi yakna balna dai kidika dawakat muih balna bitik bik uduhwi ayangnina āwi kukulna dai, wanaihnina balna kat sulanina balna kat ayangnina ahana dawak kaput bik, kurih 20 kaupak minitkauh duduwa muihni balna, kalbaunin sip balna bitik ayangnina ahana dai, 19Dawan yaklau Moses yakat amput yamnin kalyulna kaput yayamna dai. Adika ayangnina ahana kidika laih Sinaí kauhnimak walang yakat yayamna dai.
20-21Muih ayang bitik ahana, ahal kurih 20 kaupak minitkauh duduwa balna bitik ahana usnit kat, muih manah aput kalahna dai:
Israel walanibis barakni Rubén sulani balna manah, muih ahal 46,500 dai kalbaunin sip balna manah.
22-23Simeón sulani balna yakat kulna kat muih 59,300 dai.#1.22-23 Akat dawak S.d. yakat bik hibru wauhnitaya kidika sihm yulni balna kidika yulwi S.d. 20-21 yakat yulwa balna kidika, akat laih kidika yulni kidika yakpamna isi yulwi talna atnin yulni.
24-25Gad sulani balna yakat kulna kat muih 45,650 dai.
26-27Judá sulani balna yakat kulna kat muih 74,600 dai.
28-29Isacar, sulani balna yakat kulna kat muih 54,400 dai.
30-31Zabulón sulani yakat kulna kat muih 57,400 dai.
32-35José sulani balna yakat kulna kat muih 40,500 dai Efraín sulani kaupak, dawak Manasés sulani kaupak laih muih 32,200 dai.
36-37Benjamín sulani balna yakat kulna kat muih 35,400 dai.
38-39Dan sulani balna yakat kulna kat muih 62,000 dai.
40-41Aser sulani balna yakat kulna kat muih 41,500 dai.
42-43Neftalí sulani balna yakat kulna kat muih 53,400 dai.
44Adika kaput kalahna dai Moses, Aarón dawak Israel taninatuna balna 12 witingna sulanina balna#1.44 Witingna sulanina balna: grik kau ulna kidika laih kaput yulwi. Hibru wauhnitaya yakat laih adika yulni kalahwas ki. dawak walaninabis balna pasyakat bangkauna kalpakwi muih ayangnina ahana dai kidika: 45Israel balna kurih 20 kaupak minit kauh duduwa balna kalbaunin sip kidika, 46laih 603,550 bitik kaput kalahna dai.
Libait balna ais yamninna papakna kidika
47Libait balna laih muihninabararak balna ayangnina ahawi kukulna yakat ayangnina āwi kukulwasdai. 48Kat Dawan yaklauwi Moses yakat kalyulna dai: 49“Israel balna ayangnina ahana yakat levita sulani balna laih kulnam awaski. 50Levita balna laih, holi pāni kidika witingna tingnina yakat ānaman karang, kidika pasyakat di ais ais dunin dini balna kidika bitik. Holi pāni kidika pa ūk kau duwi kiunin karang kat, dunin dini balna kidika bitik witingna tingnina yakat karang. Kaput bik kidika pāni yaihnit yakat ūnina labanni awaih papakna karang. 51Holi pāni kidika pa ūk kau duwi kiunin karang kat, witingna yaklau dutwi pa ūk yakat dukiwi dulauwi yamninna karangki, angkat uiwi panina duduwarang pāni yakat. Muih pini as holi pāni yaihnit yakat kiwarang kat, daunin yakat wirlana karangki. 52Israel ūk balna kidika laih, kalbauyang muihni amput kaput uiwi panina duduwarang ki witingna ūnina labanni kat kat, dawak bik planinakin dinit kat kat. 53Levita balna laih holi pāni yaihnit yakat awaih ūnina labanni pakwi maintatalwarang, kaput laih Dawan kulnin daukalwas karang Israel balna niningna yakat.”
54Israel balna laih Dawan yaklau Moses yakat amput yamnin kalyulna kaput yayamna dai.
Currently Selected:
Números 1: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998