Miqueas 1
1
Papang la yamwarang kidika Samaria minit yakat
1Adika yulni, Papang yaklauwi kalsihna, Moreset pāni kaupak al as ayangni Miqueas dai yakat, bahang niningkana Samaria dawak Jerusalén yulni, kidika mani balna yakat Jotam,#2 Re 15:32-38; 2 Cr 27:1-7. Acaz#2 Re 16:1-20; 2 Cr 28:1-27. Ezequías,#2 Re 18:1—20:21; 2 Cr 29:1—32:33. bahang witingna kidika king kakawa dai Judá yakat.
2Tawan balna bitik manna adika dakanauh,
sau muihni balna bitik, yamni dakanauh:
Dawan, witing ūni holi kidika kaupak,
witing witnis karang manna namangna yakat.
3Papang yalahwa pāni kaupak yaklauwi kalahwarang,
dawak asang balna tuna munah lapakwi kaiwarang.
4Man kalma dinit yakat asang balna kidika arwarang,
sihm balas kuhpau yakat āna kapat,#Sal 97:5.
dawak sau langni balna kidika sahwi kalahna karang bu,
sihm was parasni murwak sau daklawa kapat.
5Adika balna bitik laih Jacob tawanni kulnin dutni kidika yulni
Israel muihni balna dutni yayamna yulni.
¿Angkat sakyah Jacob kulnin dutni duwa kidika?
¡Samaria tawanni yakat sakki!
¿Dawak angkat sakyah, Judá daniwan dauh panina balna kidika?
¡Sihm Jerusalén yakat sakki!
6Kidika bahang Papang yulwi:
“Samaria tawanni nuhni kidika yamtingkat bahwi dis dawarangki,
kidika pāni laih di dis ahni manah dawarang ki wain dahna atnin.
Sau langni yakat tawan nuhni kinipala balna kidika raki,
dawak rahni balna ukna kidika kuhryaktik lāih daki.
7Witing daniwan dauh wayani balna kidika bahwi bikis dawarang,
dawak busna daninawan panina saran kidika#1.7 Daninawan panina saran balna kidika: kaput ulna kidika yamni kapat ki. Hibru kau laih prisant dini balna (minit lauwi kalana kapat ki) al suhl suhl warkni yamwa kidika. bitik busyamwarang.
Kat kidika dini laih, kalduwi payahwi lalah yayakwa kidika kau yayamna bahang,
dawak kalduwi payahwi lalah yayakna kidika sihm wattik kidika yakat wirlaki.”
Miqueas kaidana
8Kidika bahang aidaki kulnik bukna nuhni karak,
kidika bahang kalpas manah, dawak wahdis likawaki,
dawak sarahtik aidaki, chacal kapat
dawak sihm uhu nuhni walanibis siuhwa kapat.
9Kat Samaria witing di kalina kidika laih kalyamnin dini awaski:
Judá yakat bik kallaihna,
dawak bik Jerusalén kat bayakwi kiwi laihna ki,
tawan nunuhni paskau yang tawanki yalahwa kidika.
10Adika diyulwinih, Gad muihni balna yakat,
dawak bik kakaidinih.
Dalawak bukta pihrtanauh Bet-le-afra#1.10 Bet-le-afra: adika laih Hibru yulni, tanka laih sau yahamni. sauni yahamni yakat.
11¡Safir muihni balna, saumana data pa ūk yakat yawanauh,
wahdis asalmana karuk!
¡Zaanán kau yalalahwa balna kidika laih kalalahwas karang!
¡Kaidinin sakki Bet-esel yakat,
dawak manna laih muih as bik tingmanasut lalaihwas karang!
12Marot kau yalalahwa balna kidika dalani wawauhwi,
bahang muihnina yamni kat dakakih diawi,
kat Papang yaklauwi yamna dutni kidika
Jerusalén dūrni kat kiwi kana atnin.
13Manna Laquis muihni balna,
kulnamna dutni dai Israel kapat,
kidika kuduh Sayan dutni yamnadai kidika,
karmana yakat aras kidika sittanauh.
14Moreset-gat kaupak naikau alahwa ban kaput atnin,
Aczib tawanni nuhni kidika,
Israel kingni balna minitna yakat bukwi taihnin as karang.
15Papang yulwi:
“Maresa kau bangmana kidika mana namangna yakat sihki,
kalbauwi muihni dinina dakyakyang as,
dawak Israel paskaupak walwi yakna balna kidika,
Adulam pāni sulihni yakat kiwi kawarang.
16Dawak man, Sayan tawanni nuhni,#1.16 Sayan tawanni nuhni: kaput ulna kidika yamni kapat ki. Adika laih Hibru yulni kau kalahwas ki.
tunama kidika kahrta salaini yamtah,
dalani wauhtaman kidika saini,
dawak bik walamabis balna dalani talaman yulni.
Basma kidika dakta pauni manah datah,
kusma tunan kapat,
kat walamabis balna kidika pa ūk yakat laihwi duwi uiwarang bahang.”
Currently Selected:
Miqueas 1: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998