Salmos 55
55
Laihdang atwi uiwi uiwa muihni kidika minit yulna
Coro sumalniyang kaupak, paswi yakisdinin dini balna kau. Devid yaklauwi sumalna kidika.
1Yang Papangki, mikit yultayang kidika dakah;
kalma dinit yakat buktik yultayang kidika dakas kapat yamwinih.
2-3Yultayang kidika dakah, dawak nangkitlatah;
kulnik kaida pasyakat mayultayang man yakat.
Waihkila dinit yulwa kidika dakingkat yayukwi,
dawak muih dudutni balna sarahwa kidika bik.
Kulnik bukna kidika truktayang;
niking yakat parasni yabauwi.
4Yang ising kidika paski yakat kiri yaklauwi;
daunin yamadangni kidika mikit yakat bukna.
5Yamadunin dutni as yalaihna;
¡yamaduting kat yayukwi!
6Dawak yultayang:
“Yamni karang yang adika buhtuku kapat lawāki dutayang katlaih,
lawik yawik wingkita puhki.
7Lawik pa nai yawaki;
kauhmak wanilang yakat wattik paki duki.
8Sirihni irik yawik maldaki,
wing parasni wauhwi kaiwa kidika kaupak.”
9Dismuktah Dawan, yulnina balna kidika satuk yammuktang sinsnina diswang,
kat yang talayang kalbaunin manah dawak dakwi kalahnin manah,
10dawak pukta madah, tawan nuhni pasyakat awawaihwi.
Witing yakat laih dutni manah dawak malnikau dutni yamnin manah ki;
witing yakat laih dutni manah ki;
11tanipas balna kidika yakat kalbaunin dawak alas yulnin manah ki.
12Waihkila as yaklauwi yauswaski,
bahang kidika yang wauhna atnik;
yang niking kauh yaklauwas ki, dutni yakulwa muihni kidika,
kidika niningkaupak yang maldinik.
13¡Man laih yang karak kaltalyang yamni mayang,
yang karak kaltalyang tanit yamni,
14witing karak Papang uni yakat kaluduhtayangna dai
kaltalyang yamni yangna bahang yulbaunikna,
witing karak muih pasyakat lapaktayangna dai!
15¡Waihkila balna kidika, daunin yaklauwi dilaihwang isningna aiwaskat!
¡Sangka yakauna sau ū pas yakat kakawang,
kat dutni kidika laih witingna isningna yakat sakbahang!
16Kaunah yang Papang yakat parasni yulki;
dawak Dawan yalaihwi yakwarang.
17Dutni yayamwa kidika yulni yultik aidaki
mapiris, matunak dawak pukta bik,
bahang witing yang dikit yultayang kidika dakawarang.
18Kalbaunin paskaupak yalaihwi yakwarang;
sangkika laihwi yakwarang,
nikingkauh yaklalauwa balna kidika mahni karang bik.
19Papang kuduh witing kingkawa kidika ban kaput atnin,
yadakawarang, dawak sau yakat lakmukwarang,
kat witingna laih kulninna kidika satuk wirlalawas bahang
dawak Papang yakat bik yamaduduwas bahang.
20Kaltalyang yamni balna duduwa niningna yakat tingnina dulalauwi;
witingna kaltalyang yamni pranimis yakat yayamwas bahang.
21Yulnina balna kidika turuh taniwas salani kapat tanit yudutni ki,
kaunah kulninna balna kidika laih kalbaunin manah ki.
Dawak yulbabauwa kidika laih tanit yudutni disala kapat ki,
rahm laih awaski kaunah isparah baini kapat ki.
22Man kulta kalbautaman kidika Dawan yakat datah,#Mt 6:25-34; 1 Pi 5:7.
dawak witing yaklauwi parasni mawarang;
dawak bukwas karang
angdik alni witing yulni dakawa kidika.
23yang Papangki,
iyang muihni balna dawak alas muihni balna kidika laih sangka awas karang
sangnika papusbah bik awaskarang;
man lawa yamtangkat sau ū tuhni yakat bukwarang,
kaunah yang laih man yakat kulnik ātik dutayang.
Currently Selected:
Salmos 55: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
