Salmos 51
51
Papang, mikun yatalah yang akat
Coro sumalniyang kaupak. Devid salnimo, Prapit Natán yaklauwi bilna usnitkat Betsabé karak dutni yayamna kidika yulni.#Sam 12:1-15.
1Papang dalani dutaman kidika kau, mikun yatalah yang akat;
dawak bik minikun talnin dutaman kidika kau dutki balna usyaktah.
2¡Dutki kaupak yasuhta yaktah!
¡Kaput bik dutki kaupak maisihnidis yadatah!
3Yang amanglatayang kulnik kidika anyang dai;
yang dutki balna kidika kulnik kaupak uswi kalahwas ki.
4Man namang yakat dutni yamnayang, man namang yakat manah,
di dutni yamnayang, man lawa dutni talaman dini kidika.#Sal 32:5.
Kidika bahang man la yamtaman kidika laih barangni ki;
dawak man la yamtaman kidika niningkauh yulnin sip-awas ki.#Rom 3:4.
5Rahm kidika laih yang dutniyang, batahn danayang kaupak;
dawak yang nanangki bānipas kaupak yang dutni muihni yang.
6Di rahm kidika, muih kulnin alas yuyulwas kidika dalani talaman,
dawak kulnik pasyakau sins lani nuhni kidika yānaman.
7Dibasta walapni#Ex 12:22; Lv 14:51; Ez 36:25; Hib 9:13-14,19. kidika kau yasuh'yaktah, dawak yang klin alahwaki;
yasuhtah, bahang kaput laih yang tanit pihni kalki mukus karak dawakat.#Is 1:18.
8Alasna manah yabahngtah,
watta alasna yatah, dalani yanaman kaunah.
9Yang dutki kaupak man mamakpa kidika latah,
dawak dutki balna kidika bitik usta yaktah.
10Papang, ¡yang kulnik yakat ising maisihni dis as atah!
¡Dawak spirit wisamni barangni kidika yatah!#Ez 11:19; 36:26; 2 Kor 5:17.
11Yang kaupak yaklawinih,
dawak spiritma holi kidika bik.
12Yatang kat, laihta yaktaman alasnina kidika dakakuh;
spiritma kulnin yamni kidika kau yalaihta dulautah,
13kaput laih yang lawik kulninna dutni balna yakat man tama kidika niningnakanik
dawak dutni yamyang balna kidika man yakat uina atnin.
14Muih īnin kidika kaupak yalaihta yaktah,
Papang yalaihta yakyang man kidika,
yang unbautinah man barangni kasak man kidika yulna awaki.
15Dawan, tikpas kidika kalatang wakahwang,
dawak tikpas kau man yakat unbauki.
16Kat man laih dukih mawas ki sakripais busna kidika,#Sal 40:6; 50:8-14.
yang laih maki, kaunah man dukih mawa kidika laih awaski.
17Papang yakat minitdis dini kalana kidika laih spiritni dalawa kidika yulni;
¡Papang ruhmwi dawinih, spiritni bahna kidika!#Sal 34:18.
18Sayan yakat yamni kalyamtah, man kulnam yamni kidika kau;
dawak Jerusalén daklana balna kidika watta laihta dulautah.
19Kaput laih sakripais balna kidika duma,
tinglau kau sakripais buswa kidika, dawak minitdis kalawa kidika bik yamni bitik busna karang;
kaput laih turuh almuk kidika sakripais busnin pāni yakat ilna karang.
Currently Selected:
Salmos 51: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
