Nehemías 2
2
Artajerjes yaklauwi Nehemías yakat kalana dai Jerusalén yakat kiuna atnin
1Yang kuduh king sunitak laihyang yang dai, dawakat Nisan wainiku pasyakat ma as dai, Artajerjes king kana kurih muihasluih dai yakat, king yakat wain utuhtik kalatalikyang kat witing yaklauwi yatalna dai kulnik bukna kidika 2dawak yayulwi dakana:
—Uba kulnam bukna kat matalayang, bahang ¿ampat mawih? Siknis dutaman kapat laih awaski, kauna namangyakat dutni as dutaman kapatki.
Kidika minitni yakat yamadunayang, 3dawak king yakat kalyulna:
—¡King, man kidika ban kaput sangka awah! ¿Dawak, yang adika amput kulnik bukna awaskarangyah, yang muihni-bararak balna saunina ū bangkidika tawanni nuhni daukalna, dawak dūrni bik busna kidika?#2 Re 25:8-10; 2 Cr 36:19; Jr 52:12-14.
4—¿Man yulma ais yamnik sipyah? —king yulwi dakana.
Kaput laih Papang makau kisang yak sakyakat witing tingni yakat atik datik 5kalyulna yang, king yakat:
—Agha, king man namang yakat yamni kapat kat, dawak man, muih ilpni yamtaman pasyakat yang bik sakyang kat, king man yakat mayultayang, yasihtang yawakuh Judá yakat, kidika tawanni yakat muihki bararak balna nununa bangkidika yakat, dawak yang lawik laihtik dulautik yamki wattik.
6King witing yaihnit yakat yalni kidika yalahna sakdai, dawak nangkitlana:
—¿Ma yapak kat yawa awamayah? ¿Dawak mampat aiwamayah?
Dawakat yang lawik kalyulnayang aiwinik mani kidika, bahang kaput laih yadawak yawinik kidika sip kulna dai. 7Dawak baisa minit yakat kalyulnayang:
—Man yamni talaman kat wauhtaya as ulta yatang duyawakuh, ma-kawa niningkauh éufrates wasni niningkauh kabamintni balna yakat, kaput laih yadawak yawaki bayaktik, Judá yakat; 8dawak wauhtaya ūk yāma kidika laih, Asaf witing king asangnipas maintalyang muihni yakat uitik kalating pan yāwakat, makatyulnin ūni dūrni kidika yamki, kaput bik tawan nuhni daklana balna kidika bik yamnin, dawak yang āwaki ūni kidika bik yamnin.
Dawak king yaklauwi yana dai kidika bitik, kat yang Papangki yaklauwi dalani yatalwi tingkisut laihwa kidika yakat kultayang bahang.
9Ma kawa niningkauh, éufrates kabamintni balna muhnina yakat yawik king wauhtaya yana dai kidika dianayang, dawak baisa minit yakat yang mainyatalwi uina muihni balna kidika laih kalbauyang muihni balna dai, tatuna duwa muihni kidika laih kalbauyang balna taninatuna kidika dai. 10Horón kau Sanbalat, dawak Tobías, Amón muihni tanituna as dai kidika, witingna dakakana kat kulninna daukalna dai uba, kat muih nuhni as kiuna dai bahang Israel yakat tingnisut laihna atnin yulni.
Daklana dai kidika watwi laihwi dulauwi yamnin warkni
11Witni kat yawik āwanayang dai Jerusalén yakat. Kaput laih ma bās sakyang dai yakat, 12pukta lawanayang, ahal ūk balna karak kalpaktik, kauna di as bik yultasyang, Papang yaklauwi Jerusalén yulni di yamnin yana kidika. Yang di as bik duyawasyang, kauna aras minit yakat di laktik ilwanayang kamanah dai duyawanayang kidika. 13Sihm kidika puknita alahwanayang, langni niningkauh dūrni munah, Waula wasnituna munah, dawak Bubuh ruruhmwa dūrni munah, dawak Jerusalén daklana dai kidika bukna kat laktik talnayang dai, dawak dūrni busna balna kidika bik. 14Usnit kat ban tanityakat yawanayang, was burhwi kalahwa sakkidika dūrni kau yakat, kaput bik laih king witing wasni laihna sakkidika pāni yakat bik; kauna yang aras ilwik yawanayang kidika yakut sip bayaknik-awas dai. 15Baisa payahlawas puksani kat, was murwa kidika munah ilwik yawanayang, kaput laih daklana balna kidika laktik talnayang, usnit kat nawattik aiwik langni niningkauh dūrni munah āwanayang.
16Kabamint balna kidika laih amanglalawas dai, yang angkat yawik aiwanayang kidika, kaput bik, yang ais yamtayang kidika bik amanglalawas dai. Dawak Ju muihni balna yakat bik diyultas yang dai, yuldarang laih sumalyang balna yakat, kabamint tunan muihni balna yakat bik, dawak kaput bik muih balna kidika warkni pasyakat kawi wark yayamwarang balna kidika yakat bik. 17Kaput laih yang diyulnayang:
—Manna yamni amanglatamanah, mayang dutni yakat mayang, Jerusalén adika daukalna, dawak dūrni balna bik busna ki. Yang akat aiwa aslah alahwanangkat, daklana balna dai kidika watdi laihdi dulaudi yamdanang, kaput laih sarahni maiyuyulwas karang.
18Papang minikun talnin duwa kidika kau yamni ilp yana dai kidika, dawak king bik yulni balna yayulna kidika bik diyultingkat dakawi witingna yaklauwi nangkitlalana:
—¡Mahka laihdi dulaudi yamdanang!
Kulnin yamni lani kau biri kulninna dulalauna. 19Kauna Sanbalat, witing Horón kaupak kidika, dawak Tobías witing bik tunan muihni as kidika Amón kaupak, dawak Gesem árabe muihni as witingna dakakana kat sarahni yuyulna, dawak dauhbik ban yuyulna:
—¿Manna tingmana yakat ais duaitamanah? ¿King niningkauh lawinin kultamanapah?
20Kauna yang lawik nangnitnalanayang:
—Papang, makau kisang yakat sakkidika yaklauwi ilp yanawarang. Mayang, witing dini yamyang mayang adika, mahka laihdi dulaudi yamdarang, dawak manna laih kidika pasyakat dismana, dawak rahmmana bik, dawak Jerusalén yakat bik amangmanalalawas ki.
Currently Selected:
Nehemías 2: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
