Matyu 11
11
Jan muih wassiyang yaklaumuih sihna balna kidika
(Lk 7:18-35)
1Jisas witing disainipil balna 12 yakat disumalwi dana usnit kat, kidika kaupak kiuna dai yul balna kidika yulwi sumalna atnin kidika sauni tawanni balna yakat.
2Jan witing silak yakat tuskauna yul dakana dai Jisas ais yamwādai kidik. Bahang witing usnit uiyang muihni balna buas sihna dai 3Jisas yakat kalyulwi dakana atninna rahm witing pa, kainin dai kidika, kidik awaskat muih ūk tani ahawarang pa.
4Jisas yaklau nangnitnalana: “Yawa Jan yakat kalyultanauh ais talamana kidika dawak ais dakamana kidika bik. 5Kalyultanauh muih miniknapa tatalwas kidika tatalwi, lapapakwas balna kidika lapapakwi, pilau muihni balna kidika pilaunina kaupak klin kalalahna, tapanina di dakakawas balna kidika di dakakawi,#Is 35:5-6. dauna muihni balna kidika sangka kakalna dawak muih miniknakunni balna yakat bik laihwi yaknin yulni kidika disumamalwi.#Is 61:1. 6¡Dawak yamni palni ki angdika muihni yang yakat kalni laknin dini yakwas kidika!”
7Witingna uina mani kat, Jisas yaklau Jan yulni sumalna dai, aput yulwinah: “¿Manna ais alahwa talnamanadaih kauhmak wanilang yakat? ¿Tisnak as wing yaklau wauhlakna kat? 8Dawak kaput awas kat, ¿ais alahwa talnamanah? ¿Muih al as asna yamni kana sak kat? Manna amanglatamana asna yamni kakawa balna kidika laih king balna ūnina yakat bangki. 9Witni kat, ¿ais yamna alahwanamanah? ¿Prapit as talna? Agha, rahm palni, muih al as prapit as karak witing kauh nuhni kidika. 10Jan yulni kuduh ulna yakat aput yulwa kidika:
‘Yang yulki yulyang muihni kidika man tamatyakat sihtayang,
tama kidika ridi yamwi mana atnin yulni.’#Mal 3:1.
11Barangni manayultayang, muih ahal balna bitik pasyakat, as bik Jan muih was utuhyang kidika minit yakat awasdai; kaput bik, kisang kau king kanin sauni kidika yakat dibindauh palni kidika kauh nuhni ki witing karak dawakat.
12“Jan muih wassiyang kidika kaina mani kaupak warmani kat, kisang kau king kanin sauni kidika laih di dutni manah kalahwi, dawak parasni duduwa muihni balna kidika laih kidika yakat daukalwi disnin kukulwi. 13Prapit balna bitik dawak lā balna kidika laih king kanin yulni manah sumamalna dai, Jan kaina mani kat;#Lc 16:16. 14dawak adika dini manna dakamana kat, Jan kuduh prapit Elías kainin dai kidika.#Mal 4:5; Mt 17:10-13; Mk 9:11-13. 15Wais balna tapamana dutamana kat, dakanauh.
16“¿Adika muihni balna adika ais karak libitkiyah? Sihm witingna laih muihbinina kat kaltalyang yayamni balna karak kalpakwi muih kalududuhwa pāni balna yakat yakisdi sararahwa kapat ki: 17‘Puhnin dini puhtayangna, kaunah manna laih ubutasmana; kulnin bukna laniwana unbautining bik, kaunah manna aidasmana.’ 18Bahang Jan laih kaina, di kaswas dawak bik di diwas ki, dawak witing laih spirit dutni as duwi atwi. 19Usnit kat muih Walanibis al di kaswa dawak di diwa kidika kaina, dawak witing laih di kasyang dawak di diyang ki atwi, muih balna ayangnina dutni kukulwa dawak Roma dini tunan minit dadakwa muihni balna karak kaltalyang yayamni kidika. Kaunah Papang sinsni lani kidika laih di yamwa balna yakat laih yakwi niningkawi.”
Tawan balna yul dakakawas kidika
(Lk 10:13-15)
20Bahang Jisas witing angdika tawanni balna yakat taldas dini balna kidika mahni kauh yamna dai kat, kidika tawanni balna yakat dibilna dai, kat Papang yakat wiryaklalawas dai kidika yulni. Jisas laih aput yulwadai: 21“¡Corazín mamakun palnih! ¡Betsaida mamakun palnih! Kat manna pasmangna yakat taldas dini balna yamna kidika Tiro yakat dawak Sidón#Is 23:1-18; Ez 26:1—28:26; Jl 3:4-8; Am 1:9-10; Zac 9:2-4. yakauh yamna dai kat laih, uman Papang yakat wiryaklalana karang, praknina bisna kana wan manah yakauna. 22Kaunah manna yakat manayultayang la yamwarang mani yak laih manna yakat wah dutni palni kidika manawarang ki Tiro dawak Sidón muihni balna karak dawakat. 23Dawak Capernaum man laih, ¿kisang kat madulauwarang kultamanh? ¡Tuhni puksani yakat ayawama ki!#Is 14:13-15. Kat man yakat taldas dini balna yamna kidika Sodoma#Gn 19:24-28. yakauh yamna kat laih, kidika tawanni nuhni kidika warmani kat bik ban karang. 24Kaunah manayultayang la yamwarang mani yakat wah kidika laih man namang yakat dutni karang ki Sodoma sauni karak dawakat.”#Mt 10:15; Lc 10:12.
Yang yakat aiwa urupdanauh
(Lk 10:21-22)
25Kidika mani balna Jisas yaklau aput yulna: “Yang Papangki, kisang dawak sau Daniwan, man ayangma nuhni yamtayang, kat sins duyang balna yakat niningnakatasman dai kidika muih miniknakunni balna yakat niningkana man kidika yulni. 26Agha, Papang, kat kaput dukih mawadai kidika yulni.”
27“Yang Papangki yaklau di balna bitik yang tingki yakat awi dana.#Jn 3:35. Rahm kidika laih muih as bik amanglawas ki Walanibis kidika, kaunah Papangni kidika manah amanglawi; dawak muih as bik amanglawas ki Papangni kidika, kaunah Walanibis kidika manah amanglawi dawak Walanibis kidika yaklau niningna kanin kulwa muihni balna kidika kauna.#Jn 1:18; 10:15. 28Yang yakat aiwanauh manna warkmana yakat dawak truknamna dini balna bik manalunglakna kidika, dawak yang lawik manayamting kat urupdanama. 29Manna yakat wark tuniruh arangni kau pan sitwa dini manatayang kidika yulni yuyulwinih, dawak yang kaupak lan alahwanauh, yang laih tahanin lani dawak kulnik buknin lani dutayang kidika; kaput karak manna yakurupdinin lani yaktanama.#Is 30:15; Jr 6:16. 30Kat wark tuniruh arangni kau pan sitwa dini kidika dawak truknin dini manatayang kidika laih ihingni ki.”
Currently Selected:
Matyu 11: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
