YouVersion Logo
Search Icon

Luk 23

23
Jisas Pailat muhni yakat kiuna kidika
(Mt 27:1-2,11-14; Mk 15:1-5; Jn 18:28-38)
1Bitik yaklauwi Jisas kidika Pailat muhni yakat duwi uinadai. 2Witing muhni yakat aput yulwi yulni yayakna dai:
—Adika alni laih mayang manekisan pasyakat di dudutni yamwakat kaltalnayangna. King tanit nuhni yakat tunan minit lautas atniknaki ti, dawak baisa kidika minityakat yulwi witing laih Mesías, king kidika.
3Pailat yaklau kalyulwi dakana:
—¿Manyah Ju balna kingnina?
Witing yaklau nangnitlana:
—Man lawa yulnaman.
4Bahang Pailat yaklau sumalyang balna taninatuna yakat dawak muih balna yakat bik aput diyulna:
—Adika alni akat dutni as bik yaktasyang pāt yakat kalruhmna atnik.
5Kaunah witingna laih baisa baisa parasni yuyulna dai:
—Witing sumalwa kidika karak tawan muihni balna bitik kiri yaklalauwi. Galilea yakat tunan bahna dai dawak waralaih Judea akat yamwi.
Jisas laih Herod muhni yakat kiuna kidika
6Pailat laih kidika yulni dakawi yulwi dakana dai kidika alni kidika Galilea kaupakdai pa. 7Dawak Galilea kaupak ki kalatwi kalyuyulna mani kat, Galilea kabamintni kayang Herod yakat sihpamna dai, kidika mani balna yakat Herod laih Jerusalén yakat sakdai. 8Herod laih Jisas yakat kaltalwi alasna palni kalahna dai, kat ma mahni palni kaltalnin dukih kalana dai, bahang witing yulni yuyulwakat dakana dai dawak di taldas dini as yamwakat talnin kulna dai. 9Yul mahni kalyulwi dakana dai, kaunah Jisas laih di as bik nangnitlawasdai. 10Kidika yakat sumalyang balna taninatuna balna dawak lā sumalniyang balna bik bangdai, witingna laih wat wat yulni yayakna dai. 11Bahang Herod witing solnidado balna karak kalpakwi dutni kalyayamna dai, dawak witing yakat sarahni kaltalwi asna yamni kat ahana dai, sihm king kapat. Usnit kat Herod yaklau watwi Pailat yakat tingni yakat sihna dai. 12Kidika mani laih Pailat dawi Herod karak kaltalyang yamni kalalahna dai, muhnilau laih biri biri kalwaihla dai.
Jisas daunin lani yayamna kidika
(Mt 27:15-26; Mk 15:6-15; Jn 18:38-19:16)
13Pailat laih sumalyang balna taninatuna balna, lā tunan muihni balna dawak tawan muihni balna yakat bik uduhna, 14dawak aput diyulna:
—Witing yaklau yamwakat tawan muihni balna kulninna sat sat kukulwi ti adika alni yang akat duaita yanamana; kaunah yang lawik manna muhmana yakat kalyultik dakanayang dawak witing dutni as bik yaktasyang manna lawa yulni yaktamana kidika kaupak. 15Herod kat bik adika alni dutni as bik yakwaski, kidika yulni nawatwi maisihna. Talnauh, di dutni as bik yamwaski īna atnin. 16Wah kalaki ki dawak usnit kat pri kaldaki ki.#23.16 Ting ulna balna as as yakat laih aput minitlalakwi S.d. 17: Kasnin alasnina mani yakat, Pailat yaklau muih balna yamni talninna kidika yamnindai silak muihni as yakat pri kaldawi.
18Kaunah witingna bitik papatni sarahwi aput yuyulna:
—¡Mayang kidika muihni talnin dukih mayawaski! ¡Barrabás kidika laihta yakta mayatah!
19Adika muihni Barrabás laih tawan nuhni yakat muih muhni yaklauwi muih ina dai kidika yulni silak yakat ahana dai. 20Pailat witing Jisas yakat laihwi yaknin dukih kalana dai kidika, watwi yuldibauna dai; 21kaunah witingna laih baisa parasni sararahna dai:
—¡Pan prihni yakat ilta patah! ¡Pan prihni yakat ilta patah!
22Pailat yaklau wat bās yakat diyulna:
—Bahang ¿ais dutni yamnayah? Yang witing dutni as bik yaktasyang īna atnin. Wah kalatik usnit kat kallaihtik yakki ki.
23Kaunah witingna laih wat wat yuyulwadai pan prihni yakat ilwi pana atnin; bahang wat mahni sarahwi kat dukih diawadai kidika kaput dudunadai. 24Pailat laih kulnin aslah duna dai witingna kalyuyulwa kaput yamna atnin; 25kaput bahang witingna walwi yayakna dai kidika muihni yakat kallaihwi yakna dai, muih al as muih niningkauh yaklauwi muih ina dai kidika, dawak Jisas yakat laih witingna yuyulwa kaput kalyamna dai.
Jisas laih pan prihni yakat ilwi papana kidika
(Mt 27:32-44; Mk 15:21-32; Jn 19:17-27)
26Jisas laih pan prihni yakat ilwi pana duwi uina mani kat, Cirene kaupak al as ayangni Saiman kidika lalaihna dai, witing laih di dahnin pāni kaupak kaiwalikdai, dawak papakwakat pan prihni kidika trukwi duwi kiunadai Jisas dangnit yakat.
27Muih mahni dawak yayal bik mahni kulninna bukwakat kaidi sarahwi usnit uiwi uiwadai. 28Kaunah Jisas ditalwi aput diyulna:
—Jerusalén yayalni balna, yang yulki kakaidinih, kaunah manna yulmana dawak walamanabis balna yulnina aidanauh. 29Kat aput yulnin mani balna kaiwarangki: ‘Angdika muihni yayal balna walabis duninna sip awas kidika, walabis duduwasdai kidika balna dawak walabis mumuhwasdai kidika balna bik kulninna alasna isningnalak karang.’ 30Bahang muih balna kidika laih asang balna yakat aput yuyulwarang: ‘¡Yangna mikitna yakat buktanauh!’, dawak asang wakakahrni balna yakat laih yuyulwarang: ‘¡Yanamaltah!’#Os 10:8; Rib 6:16. 31Kat pan sangka balna yakauna aput yayamwakat, ¿pan dauna kidika laih ais as yayamwas karangyah?
32Dutni yamyang muihni balna bik bu duwi uinadai Jisas yaihnit yakat ilwi pana atnin. 33Pa as ayangni muih tunan wakalni kidika yakat uiwi kakana mani kat, Jisas kidika dawak dutni yamyang muihni balna bu dai kidika bik pan prihni yakat ilwi papana dai, as kidika laih tingnipal niningyakat dawak ūk kidika laih wadahni niningyakat ilwi papana dai. 34[Jisas yaklau yulna: “Papangki dutnina datangkat diswang, kat witingna di yayamwa kidika amanglalawas ki.”]#23.34 Corchete balna paskau kidika laih ting ulna balna as as yakat diski.
Dawak soldado balna kidika laih suerte ruruhmna dai witingna pasyakat Jisas prakni kidika biswi duna atnin yulni.#Sal 22:18. 35Muih balna kidika laih kidika yakat talwabangdai; dawak lā tunan muihni balna kat bik witing yakat sarahni kalyuyulwadai, aput yulwinah:
—Muih ūk balna yakat laih dilaihwi yakna; waralaih witing alas kallaihwi yakwang, rahm witing kidika Mesías Papang kaupak kalwalwi yakna kat.
36Soldado balna kidika bik Jisas yakat sarahni kaltatalwadai. Yaihnit yakat uiwi wain sapahni bayayahwadai, 37aput kalyulwinah:
—¡Man kidika rahm Ju balna kingnina man kat, man alas kallaihta yaktah!
38Dawak tunan yakat ulwi pana kidika laih, aput yulwadai:#23.38 Ting ulna balna as as yakat laih aput minitlalakwi: grik kau, latín dawak hibru kau bik. “Adika ki Ju balna kingnina.”
39Dutni yamyang muihni balna ilwi alalahna duldai kidika kaupak as Jisas niningkauh aput yulwadai:
—¡Man kidika rahm Mesías man kat, man alas kallaihta yaktah dawak yangna yakat bik yanalaihta yaktah!
40Kaunah ūk kidika yaklau witing kaltalyang yamni muihni yakat bilna dai, aput kalyulwinah:
—¿Man laih Papang yamanidutasmahn, man laih sihm kidika wahni dinityakat sakman kidika? 41Mayang laih rahm wauhnin bahang wauhdi, kat mayang laih dutni yamnamayang kidika yulni la kat minitlaudi; kaunah adika alni laih di as bik dutni yamwasdai.
42Usnit kat baisa minitlakwi yulna:
—Jisas, yang yulki ismangkatma king āwama mani kat.
43Jisas yaklau nangnitlana:
—Barangni mayultayang warmani yang karak awama paradais yakat.
Jisas dauna kidika
(Mt 27:45-56; Mk 15:33-41; Jn 19:28-30)
44Ma tunak kaupak ma ulah awar bās kat, sau bitik kidika puksani lakna dai. 45Ma kidika laih yaringni dis danadai, dawak makat yulnin ūni asnina#Ex 26:31-33; 2 Cr 3:14. kidika laih papustihr biswi kalahna dai. 46Jisas laih parasni sarahwi aput yulna dai:
—¡Papangki, man tingma yakat yang spiritki kidika ātayang!#Sal 31:5; Ap.w 7:59.
Dawak kidika yulwi dauna dai.
47Roman kaupak kalbauyang balna taninatuna kidika witing di kalahna kidika talna mani kat, Papang yakat ayangni nuhni yamni aput yulna dai:
—Rahm palni adika alni laih di dutni yamwasdai.
48Muih mahni kidika yakat bangdai kidika witingna di kalahna kidika talwi pasnina bauwīnah nawatwi uinadai. 49Jisas karak kaltalyang muihni balna bitik dawak yayal balna Galilea#Lc 8:2-3. kaupak usnit uiwi uinadai kidika laih, nai kaupak watwi talwabangdai, di balna kalahwa kidika.
Jisas sau ū yakat nununa kidika
(Mt 27:57-61; Mk 15:42-47; Jn 19:38-42)
50-51Muih al as yamni la kat as sakdai ayangni laih José, witing laih Judea tawanni as Arimatea kaupakdai. Witing laih Ju muihni lā tunan muihni balna kidika kaupak as dai. Adika alni José witing Papang kingni lani tahawadai kidika dawak la tunan muihni balna yaklau di yayamna yakat yamni talwasdai kidika, 52Pailat yakat kaltalna kiunadai dawak Jisas muihninuh kidika kalana atnin kalyulna dai. 53Pan prihni kaupak lakna usnit kat, linin asnina dangrina as kau tulwi duwi kipala minityakat pa sulihni as kuhrna kat kidika yakat āna dai, kidika pāni laih baisa muih as bik nunuwasdai. 54Kidika mani laih ridi yamnin mani dai yakurupdinin mani#23.54 Yakurupdinin mani: kidika laih yulwi satadi. tunan bahnin manahdai kidika.
55Galilea kaupak yayal balna Jisas yakat usnit uhuina dai kidika laih, uiwi sau ū kidika tatalna dai, dawak Jisas muihninuh amput ahana dai kidika bik yamni lakwi tatalna dai. 56Ūnina yakat nawatwi uina mani kat, kahnin dini walalapni balna kidika ridi yayamnadai.
Jisas sau ū kaupak yaklauna kidika
(Mt 28:1-10; Mk 16:1-8; Jn 20:1-10)
Yayal balna kidika laih yakurupdinin mani yakat yakururupdana dai, la yakat yulwa kaput,#Ex 20:10; Dt 5:14.

Currently Selected:

Luk 23: SUMU

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy