Luk 22
22
Jisas yakat malni kau laihnin yayamna kidika
(Mt 26:1-5,14-16; Mk 14:1-2,10-11; Jn 11:45-53)
1Plawar pupuhnin dini dis busna kasnin alasnina mani kidika ulisdai, yuldarangkat insal kaiwi bayakna mani alasnina kidika.#Ex 12:1-27; Dt 16:1-8. 2Sumalyang balna taninatuna balna dawak lā sumalniyang balna kaunah, witingna muih balna yakat yamaninaduduwadai kidika, Jisas yakat amput īnin kidika wawalwadai.
3Bahang sitan kidika laih disaipil balna kidika kaupak as Judas Iscariote kalatwadai kidika kulnin yakat kanadai. 4Adika muihni laih sumalyang balna yakat dawak makat yulnin ūni tunan muihni balna yakat bik ditalna kiunadai, dawak witingna yakat diyulna dai witing yaklau amput yamwi Jisas kidika witingna tingnina yakat ānin kidika. 5Witingna laih alasna kalahwi Judas yakat lalah kalanin pramis yayamnadai. 6Dawak witing laih dunin yulna dai dawak amput yamni muih balna tatalwas kat tingnina yakat ānin kidika walna dai.
Dawan masan kasnin dini kasna kidika
(Mt 26:17-29; Mk 14:12-25; Jn 13:21-30; 1 Kur 11:23-26)
7Plawar pupuhnin dini dis busna kasnin alasnina mani kidika laih kiwi kanadai, kidika mani laih insal kaiwi bayakna mani kidika sīp kurih as laihna kidika sakripais yayamwadai. 8Jisas yaklau Pita dawak Jan kidika balna yakwi disihna dai, aput diyulwīnah:
—Manna yawa insal kaiwi bayakna mani masan kasnin dini kidika ridi yamtanauh.
9Witingna yaklau kalyulwi dakakana:
—¿Angkat pāni ridi yamnikna dukih mawih?
10Jisas yaklau nangnitnalana:
—Manna tawan nuhni yakat āwanama mani kat, muih al as was butnin dini as duwi kiwalik kat talnama ki. Witing angdika ūni yakat kawarang kidika kat usnit uita yawanama, 11dawak ū dawan yakat kalyultanama: ‘Maestro yaklau yulwi dakawi: ¿Ūpas daklana angdika yakat yang disaikipil balna karak insal kaiwi bayakna manisan kasnin dini kidika kastanakiyah?’ 12Witing yaklau ū mayakat namangnakawarang ki daklana as yamni yamna sakkat masan kasnin pāni kidika. Kidika pāni yakat di balna kidika ridi yamtanama.
13Witingna laih uiwi kalpapakna dai Jisas yaklau amput diyulna dai kidika kaput, dawak kidika yakat masan kasnin dini kidika ridi yayamnadai.
14Awarni kiwi kana mani kat, Jisas dawak apostel balna karak tibil yakat yalalahna dai. 15Jisas yaklau diyulna:
—¡Yang ampus manna karak kasnik kulnayangdai insal kaiwi bayakna mani masan kasnin alasnina adika baisa dautasyang tanitkauh! 16Kat manayultayang wattik kasnin alasnina yamtas awakiki, mampat mani Papang kingni lani kidika kiwi kawarangkat.
17Bahang tingni yakat sutak as duwi Papang yakat tingkih kalana usnit kat, aput yulna:
—Adika duta manna pasyakat wayahtanauh; 18kat manayultayang wattik wain wasni kaupak ditas awakiki, mampat mani Papang kingni lani kidika kaiwarangkat.
19Usnit kat tingni yakat plawar busna kidika duwi Papang yakat tingkih kalana usnit kat, bahwi witingna yakat diawi aput diyulna:
—Adika ki yang muihki nuhni, daunin tingni yakat āna kidika manna yulmana. Adika yamtanauh yang ayangki usnit yakat.
20Masan kasnin dini kidika kakasna usnit kat sutak kidika bik duwi sihm kaput yamnadai, aput yulwinah:
—Adika sunitak laih yang āki karak wisamni pramis yamna,#Jr 31:31-34. dawak manna yulmana sau yakat utuhna. 21Kaunah waralaih yang akat yalaihwi malni kau pāt yakat yahawarang kidika laih, yang karak tibil yakat sakki.#Sal 41:9. 22Bahang muih Walanibis al kidika laih angdika tani yakat kiunin kalyulna kidika yakat kiwarang ki, kaunah ¡alakaih angdika muihni yaklau malni kau pāt yakat āwa kidika laih!
23Bahang witingna biri biri yulwi dakakana dai wais yaklau malni kau pāt yakat āwarangpa.
Wais kidika kauh tanit nuhnikalkulna kidika
24Disaipil balna kidika laih witingna biri biri kalmuhwi yuyulna dai wais kidika kauh tanit nuhni kalkulnapa kidika yulni.#Mt 18:1; Mk 9:34; Lc 9:46. 25Jisas yaklau diyulna: “Papang yakat kukulwas muihni balna pasyakat laih, king balna kidika taihnin lani karak king kakawi,#Mt 20:25-27; Mk 10:42-44. dawak tunan muihni balna kidika laih yamni yamyang balna dikukulwi. 26Kaunah manna laih kaput atnamna awaski. Nawatkauh, manna pasyakat tanit nuhni kalkulna kidika laih baisa wahmabin kapat atnin ki, dawak tunan duwa muihni kidika laih di yamyang muihni kapat atnin ki.#Mt 23:11; Mk 9:35. 27Bahang, ¿wais kidika kauh tanit nuhni kalkulnayah, tibil yakat di kasna yalahwa kidika kidik awaskat di lakwa muihni kidika? Wirlawakat yang laih manna pasmangna yakat sakyang sihm di yamyang as kapat.#Mt 20:28; Mk 10:45; Jn 13:12-15.
28“Manna laih yang karak mana dai traikitalnin balna pasyakat. 29Kidika bahang, yang lawik sau as manatayang, Papangki yaklau yang yakat yana kapat, 30dawak manna laih yang tikibil yakat kastanama dawak bik ditanama king āwayang sauni yakat, dawak trun balna yakat yalahta Israel sulani balna 12 yakat lanina yamtanama.”#Mt 19:28.
Jisas yaklau yulna Pita yaklaukaltalasyang tarang kidika
(Mt 26:31-35; Mk 14:27-31; Jn 13:36-38)
31Dawan yaklau aput bik yulna:
—Saiman, Saiman, talah sitan yaklau manna yakat manaisihnin yulna kidika manna laih sihm plawar minik mana kapat; 32kaunah yang laih man yulma yulnayang, rahm kulnin lani kidika ban duta atnam. Dawak man laih yang yakat wirlawama mani kat, wanaihma balna yakat ilp diatangkat barangni kulnin lani duduwang.
33Saiman yaklau kalyulna:
—Dawan, yang laih man karak silak yakat yawinik kidika kulnik ridi yamnayang, dawak man karak daunik kat bik.
34Jisas yaklau nangnitlana:
—Pita, mayultayang warmani baisa sakara yulwas kat, wat bās yatalasyang tima ki.
Traini talnin uliswa kidika
35Usnit kat Jisas yaklau kalyulwi dakana:
—Yang manna yakat lalah dis, kasnin dini dis dawak sus bik dis manasihnayang mani kat,#Mt 10:9-10; Mk 6:8-9; Lc 9:3; 10:4. ¿ais di dis manadaih?
Witingna yaklau nangnitlalana:
—Di bitik dutayangna dai.
36Bahang diyulna:
—Waralaih, wirlawakat, wais lalah dawak kasnin dini duwa kat, duaiwang; dawak wais isparah dis kat, minitkau kāwa dini kidika bakanpamwi isparah as bakanwang. 37Kat manayultayang yang muihki yakat kalahwarang ki ulna balna yakat aput yulwa kidika: ‘Dawak muih dudutni balna pasyakat banawi kulna dai.’#Is 53:12. Bahang yang yulki ulna kidika laih bitik kaput kalahwarang ki.
38Witingna yaklau yuyulna:
—Dawan, akat isparah bu bangki.
Dawak witing yaklau nangnitnalana:
—Baisa yulbabauwinih.
Jisas Getsemaní yakat minityulna kidika
(Mt 26:36-46; Mk 14:32-42)
39Usnit kat Jisas laih kalahwi Olib asangni yakat kiunadai, nining yamwadai kaput; dawak disaipil balna kidika laih usnit uiwi uinadai. 40Kidika pāni yakat uiwi kakana mani kat, aput diyulna:
—Manna mamatna yultanauh, trainitalnin yakat buknamna awas yulni.
41Witingna kaupak naikau kalahwi kiwi limbabahwi minityulna dai. 42Aput yulna: “Papangki, man dukih mawakat, adika dinin tapahlni kaupak yalaihta yaktah; kaunah yang kulnik lani laih yamwinih kaunah man kulnam lani yamtah.”
43[Kidika minitni yakat kisang kaupak insal as kai'kalahwi parasni kalana dai. 44Jisas laih wauhnin nuhni pasyakat baisa parasni palni minityulwadai, dawak walahnidana sau yakat tahwa kidika laih sihm ā kapat dai.]#22.44 Corchete balna paskau kidika laih ting ulna balna as as yakat diski.
45Minityulwi yaklauna mani kat, disaipil balna bangdai kidika yakat kiunadai, dawak kulninna bukwi minit bayakwakat kakamana bangkat ditalna dai. 46Aput diyulna:
—¿Ais yulni amabangmanah? Lauwa mamatna yultanauh, traini talnin yakat buknamna awas yulni.
Jisas yakat lalaihna kidika
(Mt 26:47-56; Mk 14:43-50; Jn 18:2-11)
47Jisas laih baisa yulbauwa sakkat, muih mahni uiwi kakanadai. Disaipil balna kaupak as, Judas kalatwadai kidika, tunan duwalikdai. Kidika yaklau Jisas yaihnit yakat kiwi umna dai, 48kaunah Jisas yaklau kalyulna:
—Judas, ¿umna as karak muih Walanibis al yakat malni kau pāt yakat ātamahn?
49Jisas karak bangdai muihni balna kidika witingna di kalahwa kidika talwi Jisas yakat kalyulwi dakakana dai:
—Dawan, ¿isparah karak kalbautanakuh?
50Dawak witingna kaupak as yaklau sumalyang nuhni dini yamyang tapani tingpal niningkauh kidika yakat dakna dai. 51Jisas yaklau kalyulna:
—Kamanah datanauh.
Dawak di yamyang tapani yakat laihwakat yamni kalyamna dai. 52Usnit kat sumalyang balna taninatuna balna yakat, makat yulnin ūni tunan muihni balna yakat dawak muihbararak balna kauna witing yakat laihwi duwi uinin aina dai kidika yakat aput diyulna dai:
—¿Ais yulni manna isparah dawak pan duta aiwanamanah, yang laih sihm muih dutni as yang kapat? 53Yang laih ma bitik yakat manna karak yang dai makat yulnin ūni#Lc 19:47; 21:37. yakat, dawak yalaihtasmana dai. Kaunah adika ki manna awarmana, puksani yaklau taihwa kidika.
Pita yaklau Jisas laih talasyang atna kidika
(Mt 26:57-58,69-75; Mk 14:53-54,66-72; Jn 18:12-18,25-27)
54Bahang Jisas laih laihwi sumalyang nuhni ūni yakat duwi uinadai. Pita laih naikaupak usnit uiwadai. 55Kidika pāni watak papusyakat kuh biwi yaihnit yakat yalalahna dai; dawak Pita bik witingna pasyakat yalahna dai. 56Kidika minitni yakat, di yamyang yal as witing talwakat kuh yaihnit yakat yalahna sakkat, aput yulna:
—Adika muihni bik witing karak likdai.
57Kaunah Pita yaklau talasyang atna, aput yulwinah:
—Yal, yang laih witing amangnilatasyang.
58Usnit kat muih ūk kaltalwi aput yulna:
—Man bik witing kaupak man.
Pita yaklau nangnitlana:
—Dikah, witingna kaupak awasyang.
59Awar as bayakna usnit kat, muih ūk yaklau watwi yulna:
—Rahm palni adika muihni bik witing karak likdai. Baisa kidika minityakat witing laih Galilea kaupak ki.
60Pita yaklau yulna:
—Muih al, yang amanglatasyang ais yulni yultamanpa.
Kidika minitni yakat, Pita laih baisa yulbauwa sak kat, sakara as yulbauna dai. 61Bahang Dawan laih Pita yakat wiryaklawi kaltalna, dawak Pita laih isningkatna dai Dawan yaklau aput kalyulna dai kidika: “Warmani, sakara kidika yulwas tanitkauh wat bās yatalasyang tima ki.” 62Dawak Pita laih kidika kaupak kalahwi dalani palni kaidana dai.
Jisas yakat sarahni kaltatalna kidika
(Mt 26:67-68; Mk 14:65)
63Jisas yakat maintalwabangdai kidika muihni balna laih witing yakat sarahni kaltalwi babauwadai. 64Minikpa balna kidika taihwi kalyulwi dakakawadai:
—¡Yultah wais mabaunayah!
65Dawak witing niningkauh di ūk manas kalyuyulna dai.
Jisas laih lā tunan muihni balnamuhnina yakat kiuna kidika
(Mt 26:59-66; Mk 14:55-64; Jn 18:19-24)
66Payahlana mani kat, Ju muihnibararak balna, sumalyang balna taninatuna balna dawak lā sumalniyang balna kauna kalududuhna dai Jisas kidika lā tunan muihni balna muhnina yakat duwi uina atnin. Kidika yakat aput kalyulwi dakakana dai:
67—Yanayultah, ¿Mesías kidika manyah?
Witing yaklau nangnitnalana:
—Agha manatiki kat, rahm yakultas awanamaki. 68Dawak yulwi dakanin yulni balna manayultik dakaki kat, nangkitlatas awanamaki. 69Kaunah waradika kaupak muih Walanibis al kidika laih Papang parasni bitik duwa kidika tingnipal niningyakat yalahwarang ki.
70Usnit kat witingna bitik kalyulwi dakakana:
—¿Kapat bahang manyah Papang Walanibis al kidika?
Jisas yaklau nangnitnalana:
—Manna lawa yayulnamana yang laih Papang Walanibis yang kidika.
71Bahang witingna yaklau yuyulna:
—¿Ais yulni mayang baisa witnis waldarangyah? Witing silp tinpas kaupak yulwakat dakanamayang.
Currently Selected:
Luk 22: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998