Luk 13
13
Kulnin wirlanin lani nuhni kulna kidika
1Kidika mani yakat muih buas Jisas yakat kaltalna uinadai, dawak kalyuyulna Pailat yaklau Galilea muihni balna ānina dawak didauh balna sakripais yayamna dai kidika ānina karak bahana dai kidika.
2Jisas yaklau kalyulna: “¿Kidika sauni muihni balna dawak Galilea muihni balna kauh uba dutni yayamwa bahang witingna yakat kaput dikalahna kultamanah? 3Yang lawik manayultayang kaput awaski; dawak manna palni Papang yakat wirlawasmana kat, sihm dautanama ki. 4¿Kidik awaskat Siloé yakat kilwi talnin pāni bukwi muih 18 balna yakat ditaihwakat dadauna kidika balna kauh dutni yayamwadai kultamanah Jerusalén yakat yalalahwa balna dai kidika karak dawakat? 5Yang lawik manayultayang kaput awaski; dawak manna palni Papang yakat wirlawas mana kat, sihm dautanama ki.”
Ani damni panan minik dis yulnimalni yulni kidika
6Jisas yaklau adika malni yulni diyulna: “Muih al as ani damni panan as dahna duwadai wainni yamak yakat, dawak kiwi talna dai minik duwapa, kaunah as bik yakwasdai.#Is 5:1-7; Jr 2:21; 8:13. 7Kaput bahang wain yamak maintalwa muihni yakat kalyulna: ‘Talah, kurih bās aiwayang ani damni minik waltik, kaunah sip yaktasyang. Bahang dakpamtah; ¿ais yulni dauh pa pamwasak karangyah?’ 8Kaunah sau maintalwadai kidika muihni yaklau kalyulna: ‘Dawan, adika kurihni manah datah; yang lawik panan sar yakat kuhrtik bubuh puki. 9Kaput laih sip karang miniknin; kaput awas karangkat, dakpamma.’ ”
Jisas yaklau yakurupdinin mani yakatmuih yal as sikninis kaupakyamni kalyamna kidika
10Yakurupdinin mani#13.10 Yakurupdinin mani: kidika laih yulwi satadi. as kat Jisas laih sumamalwa ūni as kau sumalna dai; 11dawak kidika yakat muih yal siknis muihni as sakdai witing laih sikninis kidika kallaihna kaupak kurih 18 bayakna dai. Spirit dutni as yaklau uruni kalyampamna dai, dawak sip barangni kalwasdai. 12Jisas yaklau kaltalna mani kat, kalyulwak kiwakat aput kalyulna:
—Muih yal, sikmanis kaupak uman malaihwi yakna.
13Bahang yal kidika minityakat tingni balna lakna dai, dawak kidika minitni yakat yal kidika laih barangni kalnadai dawak Papang yakat yulbauna dai. 14Kaunah sumamalwa ūni kidika tanituna laih kulnin daukalna dai, kat Jisas yaklau yakurupdinin mani kat yamni kalyamna dai kidika yulni, dawak muih balna yakat aput diyulna:
—Ma tiaskauas bangki wark yamna atnin; kidika mani balna yakat aiwa sikmananis balna kaupak yamni alahwanauh, kaunah yakurupdinin mani yakat laih awaski.#Ex 20:9-10; Dt 5:13-14.
15Dawan yaklau nangnitlana:
—Sins dis muihni balna, ¿manna tumanaruh almuk pan muryang kidika awaskat birimanaku kidika yakurupdinin mani kat uluhtasmanah duyawa was bayahnin? 16Bahang adika yalni laih, witing Abraham sulani kidika dawak adika sikninis yaklau kurih 18 sitna duwadai kidika, ¿ais yakurupdinin mani bahang uluhwas atnindaih?
17Jisas yaklau kidika yulna mani kat, witing niningkauh yaklalauwa balna kidika laih yakasasaldana dai; kaunah muih balna bitik laih alasna kalalahna dai Jisas yaklau di nunuhni balna yamwadai kidika yulni.
Mustat minit yulni malni yulni
(Mt 13:31-32; Mk 4:30-32)
18Jisas yaklau aput bik yulna: “¿Papang king kāwa sauni kidika laih ampatyah dawak ais karak libitnik sipyah? 19Kidika laih sihm muih al as di dahwa pāni yakat mustat minik dahwa kapat ki, dawak barakwi pan nuhni kalwakat tingni balna yakat di lawani balna ūnina yayamwa kidika.”
Plawar pupuhnin dini yulni malni yulni
(Mt 13:33)
20Jisas yaklau aput bik yulna: “¿Papang king kāwa sauni kidika ais karak libitnik sipyah? 21Kidika laih sihm muih yal as plawar duwi plawar pupuhnin dini karak banawa kapat ki, plawar laihna kidika pupuhna atnin yulni.”
Dūr dibindauh kidika
(Mt 7:13-14, 21-23)
22Jisas laih Jerusalén niningyakat kiwi tawan balna dawak tawan binina yakat sumalwi bayakwadai. 23Muih as yaklau kalyulwi dakana:
—Dawan, ¿dilaihwi yakwa muihni balna kidika laih bulahyah?
Dawak witing yaklau nangnitlana:
24—Manna traitala dūr dibindauh munah awanauh; kat manayultayang muih mahni dukih diawarang kaninna kaunah sip kakawas karang. 25Ū dawan kidika yaklauwi dūr putwarang usnit kat, ahni yakat watnamana kidika laih, kalyulta aput yultanama: ‘Dawan, dūr apahtah.’ Kaunah witing yaklau nangmatnalana karang: ‘Manna kidika angkaupak manapa amangmanalatasyang.’ 26Bahang manna laih aput yultanama: ‘Yangna laih man karak kasnayangna dawak dinayangna, dawak man laih yangna takina balna yakat sumalnaman.’ 27Kaunah witing yaklau nangnitnalana karang: ‘Manna kidika angkaupak manapa amangmanalatasyang. ¡Yang kaupak naikau yawanauh, dutni yamyang balna’!#Sal 6:8. 28Kidika yakat aidanama dawak ānamana bik karkstanama,#Mt 22:13; 25:30. talnangkat Abraham, Isaac, Jacob dawak prapit ūk balna kidika bik Papang king kāwa sauni yakat bangkat, dawak manna laih ahni yakat manayakmukna kat. 29Kat tingpal, wadah, ma kilwa dawak ma kāwa niningkaupak muih aiwarang ki, Papang king kāwa sauni yakat yalahwi di kasna atnin.#Mt 8:11-12. 30Bahang muih buas waradika witni yakat balna kidika laih tatuna yakat yaklalana karang, dawak muih buas waradika tatuna yakat balna kidika laih witni yakat yaklalana karang.#Mt 19:30; 20:16; Mk 10:31.
Jisas laih Jerusalén yulnikaida kidika
(Mt 23:37-39)
31Fariseo muihni balna bik buas uikawi Jisas yakat aput kalyuyulna:
—Man akaupak yawah, kat Herod laih maīnin yamwi.
32Witing yaklau nangnitnalana:
—Kidika wasnisala yakat yawa kalyultanauh: ‘Talah, warmani dawak yahan mani sitan balna yakat kangyakki ki dawak siknis muihni balna kidika bik yamni diyamki ki, dawak yahan mani pukwakat saran laihki ki.’ 33Kaunah warmani, yahan dawak payahwak kidika laih takityakat yawaki ki, kat sip awaski prapit as kidika Jerusalén kaupak naikau dauna atnin.
34“¡Jerusalén, Jerusalén, prapit balna yakat itaman kidika dawak Papang yaklau yul trukyang balna masihwakat kipala kau dibahrtaman kidika! ¡Wat yapak man walamabis balna kidika uduhnik kulnayangdai, sihm sakara yal kat lawani dinityakat walanibis balna puwa kapat, kaunah manna laih yultasdanamana dai! 35Bahang talnauh, manna ūmana kidika laih alas watwarangki; dawak manayultayang watta yatalas awanamaki angdika mani manna aput yultanama kat: ‘¡Dawan ayangni duwi kaiwa kidika laih ayangni nuhni yamna karang!’#Sal 118:26.
Currently Selected:
Luk 13: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998