1
Judá dawak Simeón witingna Adonisedec yakat lalaihna
1Josué dauna usnit kat, Israel balna kidika Dawan yakat kalyulwi dakana, sulanina balna pasyakat wais kidika tatuna yaklauwi cananeo balna yakat kalbaunin dai pa. 2Dawan yaklauwi diyulna, Judá kidika tatuna witing kalbaunin ki, dawak Judá yakat kidika sauni kidik kalana karang. 3Kaput laih Judá sulani balna kidika yaklauwi witingna wirahnina Simeón sulani balna yakat diyuyulna uiwi witingna saunina kidika duduwarang usnit kat biriwi ilp diana atnin Simeón balna saunina yulni kalbabauwarang mani kat. Kaput laih Simeón sulani balna kidika agha atwadai aslah kalpakna atnin Judá sulani balna karak, 4-5dawak kaput laih Judá sulani balna kidika yaklauwi cananeo balna saunina yakat uiwi kalbabauna dawak ferezeo balna saunina yakat bik, kaput laih Dawan yaklauwi witingna tingnina yakat āna dai. Bezec pāni yakat tausin salap balna yakat minit bayakna dai bahang kidika pasyakat Adonisedec#1.4-5 Adonisedec: kaput kapat ulna ki, Jos 10:1,3. Hibru kau laih Adoni-bezec. likdai. 6Dawak Adonisedec kidika kirana dai kaunah, uiwi lalaihna, dawak tingni bikisni nuhni kidika dawak kalni bikisni nuhni kidika bik dadakna dai. 7Kaput laih witing yulna dai: “Muhnilau kau yang lawik king 70 tingnina bikis dawak kalnina bikis nuhni kidika daknayang dai, dawak kaput bik laih witingna kidika tikibil dinit yakat di yayahni uhwa kidika anawi kakaswadai. Kaunah waradika laih Papang yaklauwi biriwi yayamwi kidika balna yakat diyamnayang dai kaput.” Dawak Jerusalén yakat duwi uiwak dauna.
Judá yaklauwi dakyakna Hebrón dawak Jerusalén
8Judá sulani balna kidika kalbauwi Jerusalén kidika dakyayakna, dawak muihni balna kidika bitik laih isparah kau ihina dawak tawanni nuhni kidika bik kuhkau bubusna. 9Kidika usnit kat cananeo muihni balna Néguev asangnipas kau dawak walang paskau bangdai kidika balna niningna yakat bik kalbabauna.#Jos 10:40; 11:21. 10Kaput bik cananeo balna Hebrón#Jos 10:36-37. tawanni nuhni yakat bangdai kidika yakat bik dikalbabauna dai, muhnilau kau laih adika pāni ayangni laih Quiriat-arba atwadai, dawak Sesai, Ahimán, Talmai kidika balna niningna yakat minit bayakna.
Otoniel, Debir tawanni nuhni niningyakat kalbauwi minit bayakwi Acsa duna kidika
(Jos 15:15-19)
11Usnit kat Debir#Jos 10:38; 11:21. tawanni nuhni kidika niningyakat kalbauna, bahang kidika tawanni nuhni kidika muhnilaukau laih ayangni ūk duwadai, Queriot-sefer. 12Caleb witing yulna: “Wais muihni kat Debir kidika kalbauwi dakyakwarang kat, yang walakibis yal Acsa kidika kalating yalni duwarang.” 13Kaput laih Debir dakyakna kidika laih Otoniel dai, Cenaz walanibis, Caleb wirahni bin yakauh dai kidika; kaput laih Caleb witing walanibis yal Acsa dai kidika kalana. 14Kaunah yal kidika kiwi kana kat, Otoniel yaklau kulnin wirlana dai#1.14 Otoniel yaklau kulnin wirlana dai: ulna umani balna yakat laih kaput yulwi. Hibru kau laih yal kidika yaklau Otoniel yakat kulnin laihna. (Jos 15:18 yakat talah.) papangni yakat sau yulwak kalana atnin yulni. Caleb witing talwakat walanibis Acsa dai kidika biriniku minit kaupak yaklakwakat, kalyulwi dakana:
—¿Ais ampatdawih?
15—Dukih yawi man di as yanam —yal kidika yaklauwi kalyulna—. Néguev yakat sau yanaman bahang was tuna balna kidika bik yatah.
Dawak Caleb yaklauwi wastuna buhrwa balna tang niningkau dawak parah niningkauh dai kidika bik kalana.
Judá sulani balna dawak Benjamín sulani balna witingna kalbauwi dakyayakna balna kidika
16Quenita kaupak Hobab#1.16 Quenita kaupak Hobab: grik kau ulna kidika laih kaput yulwi. Hibru kau laih quenita. sulani balna kidika, Moses unisah, witingna Judá sulani balna karak kalpakwi tawan nuhni as ayangni palmeras kidika kaupak kalahwi uina dai, bahang witingna uina kidika laih Judá kauhnimak wanilang yakat uinadai, Arad kaupak wadah nining yakat, bahang witingna yakat uiwi watwi yalalahna dai kidika pāni muihni balna karak. 17Kaput laih Judá sulani balna kidika Simeón sulani balna karak uinadai, witingna kalpakwi yulbabauna kaput, dawak kaput laih cananeo muihni balna Sefat kau bang kidika niningna yakat kalbabauna, dawak kidika tawanni nuhni kidika bitik palni laih daukakalna dai. Bahang kidika pāni ayangni papakna dai Horma.#1.17 Horma sihm hibru yulni kau kapat ki kidika tanka laih bitik daukalna kidika. 18Kaput kaunah sip kawi duwas dadana#1.18 Kaput kaunah sip kawi duwas dadana: grik kau ulna kidika laih kaput yulwi. Hibru kau laih dawak kawi duduna. Gaza, Ascalón dawak Ecrón kidika balna dawak yaihnit kau sau ūk balna kidika bik.#Jue 3:3. 19Dawan witingna karakdai kaunah Judá muihni balna kidika, dawak witingna sipdai asangpas balna kidika, kaunah walang kau yalalahwa balna kidika laih sip kangwi yakwas dadana, kat kidika balna laih ayan kārni duduwadai bahang. 20Caleb laih Hebrón niningyakat kalbauna, Moisés yaklauwi kalyulna dai kaput, dawak Caleb witing Anac walanbis ahal bās dai kidika kangwi yakna.#Jos 15:13-14; Jue 1:10. 21Kaunah Benjamín sulani balna sip kangwi yakwas dadana jebuseo balna Jerusalén yakat yalalahwadai kidika. Kidika yulni, warmani kat, jebuseo dawak Benjamín sulani balna kidika Jerusalén yakat aslah yalalahwi.#Jos 15:63; 2 Sam 5:6; 1 Cr 11:4.
José sulani balna kidika Betel yakat kawi duduna
22-23José sulani balna laih Betel niningyakat kalbabauna, tawanni nuhni kidika muhnilau laih ayangni duwadai Luz, dawak kidika yakat muih sihna dai yakpakwi talna atnin. Dawan yaklauwi ilp diana dai. 24Dawak yakpakwi talwa muihni balna witingna tatalwak tawan nuhni kidika kaupak muih as as kalahwak, kalyulwi dakakana: “Man lawa tawan nuhni pasyakat amput kanin kidika nikingnakama kat, man namang yakat yamni awanaki.” 25Dawak al kidika yaklauwi amput kanin kidika niningnakana, dawak witingna yaklauwi kidika muihni balna bitik isparah kau ihina dai kaunah kidika alni witingna yakat ta niningnakana dai kidika laih ihiwas dadana dawak walanibis balna bitik. 26Kaput laih kidika al dai kidika hitita balna saunina yakat kiwi tawan nuhni wisam as yamna dai, dawak ayangni paknadai Luz, kidika ayangni warmani kat ban kaput duwi kidika pāni.
Manasés dawak Efraín sulani balna yaklauwi kalbauwi dakyayakna pāni balna kiwi watwi kidika
27Manasés sulani balna kidika yaklauwi sip kangwi yakwas dadana Bet-seán, Taanac, Dor, Ibleam, dawak Meguido kidika balna pāni yakat yalalahwa balna dai kidika, kaput laih kidika tawanni nunuhni balna yaihnit pa binina balna muih yalalahwa balna dai kidika bik, kaput laih cananeo balna kidika ban kidik pāni yakat yalalahwadai. 28Israel balna kidika baisa parasni kakalna kat, cananeo muihni balna yakat wark parasni balna yakat papakwak yayamna kaunah sip kangwi yakwas dadana.#Jos 17:11-13.
29Efraín sulani balna bik, cananeo muihni balna Gezer yakat yalalahwa dai kidika sip kangwi yakwas dadana, kaput bahang cananeo balna kidika ban witingna pasningna yakat yalalahna.#Jos 16:10.
Sulani ūk balna witingna kalbauwi pa dakyayakna balna kidika
30Zabulón sulani balna bik sip Quitrón kaupak kangwi yakwas dadana, kaput bik Naabal pāni kau cananeo balna yalalahwadai kidika balna bik, kaput bahang cananeo balna kidika Zabulón sulani balna pasyakat yalalahna, dawak wark parasni balna yak papakna yamna atnin.
31-32Aser sulani balna bik sip kangwi yakwas dadana Aco, Sidón, Ahlab, Aczib, Helba, Afec dawak Rehob kaupak cananeo balna kidika pāni balna yakat yalalahwadai kidika; dawak kidika tawanni nunuhni balna kaupak sip kangwi yakwas dadana bahang ban watwi witingna pasningna yakat yalalahna dai.
33Neftalí sulani balna bik sip kangwi yakwas dadana Bet-semes dawak Bet-anat kaupak cananeo muihni balna kidika yakat yalalahna kidika, dawak parasni balna yakat papakwak yayamna, dawak watwi witingna pasningna yakat yalalahna.
34Amorreo balna kidika Dan sulani balna yakat kangwi yayakna asangpas kaupak, bahang dawak walang yakat yaklakwas dadana. 35Dawak kaput laih amorreo balna kidika yalalahna Heres, Ajalón dawak Saalbim pāni balna yakat. José sulani balna kidika baisa parasni kakalna kat, amorreo muihni balna yakat wark parasni yakat papakna yamna atnin.
36Edomita balna#1.36 Edomita balna: grik kau ulna kidika laih kaput yulwi. Hibru kau laih amorreo balna. saunina kung kiwi watwa kidika laih Acrabim sauni lau kilkiwa kidika kaupak Sela kat ki, dawak kidika kaupak ma nining yakauh kilwi kiuna.