Génesis 2
2
1Kisang, sau dawak kidika pasyak di balna bangkidika bitik laih yamwi dana dai. 2Ma tiaskaubu yakat, Papang di balna kidika bitik yamwidana dawak urupna.#Ex 20:11; Hib 4:4,10. 3Bahang ma tiaskaubu kidika Papang yaklauwi blisyamna, dawak kidika mani laih holi kulna, kat kidika mani witing urupdana di balna bitik yamna usnit kat.#Ex 20:11. 4Adika kuduh kisang dawak sau yamna yulni balna kidika.
Muih al kidika Edén pāni yakat
Papang witing Dawan kidika, sau balna kidika yamna kat, 5baisa dibasta, dawak pan balna kidika ukuswasdai, kat Papang witing Dawan kidika yaklauwi sau minit yakat kalawak was lauwasdai bahang, dawak bik muih as bik disdai wark yamna atnin. 6Kaput kaunah, sau kaupak was kalahwi pāni kidika bitik suihwadai. 7Bahang Papang witing Dawan kidika yaklauwi muih al#2.7 Hibru kau ulna kidika adika yulni āna adam, kidika laih aput wirlana muih al, kidika tanka laih sau. Kaunah adam kidika muih ayangni Adán, dawak kaput wirlana ki 4:25 kaupak tanit yakat kidika. kidika yamna sau kaupak, dawak nangnitak yak puhwi sangnika kalana. Kaput laih muih al kidika sangnika duna sau akat.
8Kidika usnit kat, Papang witing Dawan kidika yaklauwi Edén sauni pīsni yakat pa yamni as yamna dai, dipulu satni balna dahna dai, kidika laih makilwa niningyakat dai, dawak kidika yakat muih al yamna dai kidika āsakna. 9Kidika yakat Papang yaklauwi pan yayamni mahni kalawak ukusna, dawak minik balna bik yayakna, bahang kasnin yayamni dai. Dawak kidika pāni papus yakat sangka atnin panan#Rib 2:7; 22:2,14. bik dahna dai, kidika panan laih dutni dawak yamni karak tanka amanglanin panan dai.
10Edén sauni kaupak was as kalahwadai, bahang kidika wasni laih kalawak Papang pa yamni yamna yakat suihwadai, bahang kidika wasni laih arungka rarahwi kalahna. 11Bahang rarahwi kalahna tatuna kidika ayangni laih Pisón pakna dai; bahang kidika kuduh Havila sauni pīsni bitik yakat awaihwi bayakna kidika, kaput bik kidika pāni laih gol manas duwi. 12Kidika pāni yakat gol duwa kidika laih yamni palni ki, dawak pan yāni walapni yamni balna duwi, dawak ónice kinipala bik duwi. 13Was rarahwi kalahna bu kidika ayangni laih Gihón, kidika kuduh Cus sauni bitik yakat awaihwi yaklana kidika. 14Was sahyakna bās kidika ayangni laih Tigris, bahang kidika wasni kuduh, Asiria sauni masar munah awaihwi bayakna kidika. Dawak sahyakna arungka kidika ayangni laih Éufrates.
15Papang witing Dawan kidika yaklauwi muih al kidika Edén sauni kau pa yamni yamna yakat āsakna dai, witing kidika yakat di dahna atnin dawak bik maintalna atnin yulni, 16dawak kaput laih adika yulni kalyulna: “Adika pāni akat pan balna bang-adika bitik minik balna kidika sipman kasnam, 17kaunah aslah laih sip-awasman kasnam, pan yamni dawak dutni karak kidika. Kidika panan minik laih kaswinih, kasma karang kat rahm palni laih dauma.”#Rom 6:23.
18Kidika usnit kat Papang witing Dawan kidika yaklau yulna: “Yamni awaski muih al adika alas sak-atnin. Bahang witing wanaihni yamni as yamtik kalaki.” 19-20Papang witing Dawan kidika yaklauwi sau kaupak di minikratni balna, tinglau balna, lawani duwa balna bitik yamwi muih al yakat duwi kiuna, witing yaklauwi ayangnina pakna atnin yulni. Dawak al kidika yaklauwi tinglau balna bitik dawakat lawani duduwa balna kidika bitik, dawak di minikratni balna bitik ayangnina pakna, bahang kaput laih ayangnina kidika duduna. Kaput kaunah kidika balna bitik laih witing yakat minikdanin yamni awasdai. 21Bahang Papang witing Dawan kidika yaklauwi muih al yakat kalawak yamni kamana dawak suluni yakat kurahwi wakalni as yakwi dawi, watwi muihni kidika libitwi yamni pāni kat āna dai. 22Kidika suluni wakalni kaupak Papang witing Dawan kidika yaklau yal yamna dai, dawak muih al yakat duwi kiuna, 23bahang muih al kidika talwi yulna:
“¡Adika laih yang wakalki kaupak kalahna dawak muihki kaupak kalahna! Bahang ayangni laih ‘yal’ karang, kat Papang yaklauwi muih al kaupak yakna bahang.”#2.23 Adika yulni Hibru kau yal tanka laih muih al kaupak kalahna kidika.
24Kidika bahang muih al kidika papangni, nanangni dawi kalahwi kiwi yalni karak aslah kalalahwarang, bahang kaput laih witingna kidika muih aslah kaput kalalahna karang.#Mt 19:5; Mk 10:7-8; 1 Kor 6:16; Ef 5:31.
25Muih al kidika dawak yal kidika bik, albupak witingna wahdis raudai, kaunah witingna wahdis rau kidika yakasasaldas dai.
Currently Selected:
Génesis 2: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998