Esdras 9
9
Tawan muihni balna dutni yayamwakatEsdras minit yulna
1Kidika dini balna saran laihna mani kat, tunan muihni balna kidika yang yaihkit yakat uiwi aput yayuyulna: “Israel muihni balna dawak kidika pasyakat sumalyang balna dawak libait muihni balna kauna, witingna kidika sauni muihni balna kaupak naikau kalalahwas ki, yuldarang kat, cananeo, hitita, ferezeo, jebuseo, amonita, moabita, egipto dawak amorreo muihni balna, witingna yalalahwa lani balna dutni Papang yakat kukulwas karang bik. 2Witingna dawak walaninabis balna kauna kidika muihni balna walaninabis yayal karak kalduduna; kaput bahang, Papang tawanni kidika tawan ūk muihni balna karak kalbahahana. Dawak adika dutni yayamna kidika laih tunan muihni balna dawak kabamint kayang balna kidika yayamna.”
3Adika yulni dakanayang kat, prakki kidika istik bistik, baski balna dawak kungkibas balna kidika bik istik dutnayang dai kulnik bukna sainni, dawak paraski dis palni yalahnayang dai. 4Israel Papangni wahni kidika yakat yamaduduwa dai muihni balna bitik kidika yang yaihkit yakat kalududuhna dai, pa ūk kau laihwi duwi uiwakat nawatwi aina balna kidika dutnina yulni; kaunah yang laih ban paraski dis yalahna sakyang dai ma ulah sakripais yamnin kidika kat. 5Ma ulah sakripais yamnin kidika kat yang kulnik bukna kidika kaupak yamni alahwanayang dai dawak, prakki bisna kidika kauna, Papangki Dawan yakat mikit yulnayang dai, 6aput kalyulnayang: “Yang Papangki, yang Papangki, asalni palni kaldakayang dawak yang amanglatasyang man yakat ais mayulnik pa. Yangna dutkina balna kidika laih minit bayakki, dawak bik yangna pātkina balna kidika laih kisang kilwi kawi. 7Ma mahni bayakna warmani kat, dutni mahni palni yamtik aiwanayangna. Yangna, kingkina balna dawak sumalyang balna kauna, dutni yamnayangna kidika yulni, sau ūk kingni balna kidika tingnina yakat āwanayangna. Dalani dunayangna, pakina danayangna, dikina balna bitik mamalna dawak dutni yanayayamna, dawak waradika kat kidika tranibil yakat bangyangna. 8Kaunah waralaih, yangna Papangkina Dawan, man dalani lani dutaman kidika kau yamtangkat yangna kaupak muih uduhna as kidika kulninna alasna duduna dawak man lawa sau holi kidika yanatang kat ūkina paktanakuh; man lawa yangna miknapa yakat yaringni wisamni as yananaman, dawak bik yangna muih dinina yamtayangna kidika pasyakat wingkinata parahni as yananaman. 9Yangna laih muih dinina yamyang yangna kaunah, man lawa laih kidika kaupak yanaruhmta datasman; man dalani lani dutaman kidika nikingnakanaman Persia kingni balna kidika muhnina yakat, dawak sangkinaka kidika bik yananaman man ūma daukalna balna kidika paskaupak laihtik dulautik yamna atnikna, ¡man tingma dinit yakat maiāta dunaman dai Judá yakat dawak Jerusalén yakat bik!
10“Kaunah waralaih, yangna Papangkina, ¿ais yulnikna sipyah di balna bitik yamnayangna usnit kat? La balna kidika kat laihtik yamtasyangna dai 11man dima yamyang prapit balna munah yamnin yulnaman dai kidika. Bahang yangna sau as āwik pa dutanaki kidika, kidika sauni muihni balna yaklau dutni yayamwakat daukalna dai kidika, dawak witingna Papang yakat kukulwas niningh kaput dutni yayamwakat muih balna bitik maisihni dini yakat laihwi yayamwa dai kidika, man lawa baisa kau isingna paknaman dai. 12Yangna walakinabis yayal balna kidika witingna walaninabis ahal balna karak dawak witingna walaninabis yayal balna kidika yangna walakinabis ahal balna karak kalduninna awas,#Ex 34:11-16; Dt 7:1-5. dawak kulnin aslah lani kidika dawak dinina balna yayamni dunikna awas yulni kidika bik yanayulnaman dai, kidika sauni yamni kaupak di minik balna kalahwa kidika kaupak kastik parasni atnikna, dawak usnit kat kidika balna bitik yangna sulakina balna yakat diana atnikna yulni ban kaput atnin.
13“Yangna dutkina nuhni yulni di balna bitik yanakalahna usnit kat, dawak man lawa yangna dutkina yulni wah dunikna bik yanatas data nawatkauh kulnikna alasna yanadanaman kidika, 14¿yangna wattik sip awanakiyah man lama balna kidika dakik yamtas atnikna dawak niningh dutni yamyang muihni balna karak kalpakna atnikna? ¿Ais yangna nikingna yakat antayangna bitik kau yanaimuktas awamakatpah?
15“Dawan, Israel Papangni, man laih yangna karak barangniman dai; man lawa yamtangkat yangna kaupak muih uduhna as kidika sangkaki, warmani talda kaput. Dawak yangna laih rahm palni man namangyakat dutni yamnayangna; kidika yulni laih man muhma yakat bang atnikna sip awas yangna.”
Currently Selected:
Esdras 9: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
