Ezequiel 4
4
Ezequiel yaklauwi isningpakna Jerusalén nining yakat kalbaunin kiwa kidika
1“Man, muih al, simint pis as duta, Jerusalén tawanni nuhni wayani kidika yamtah. 2Usnit kat wayani yamta tawan nuhni kidika kalbauyang muihni balna manah awaihdakna kapat atnin, dawak kalbaunin dini balna bitik, dawak yaihnit awaih yakat di kau daklata, dawak sau uhta du'ilyawah mayakat, kaput laih tawan as awaihdadakna kapat karang. 3Dawak usnit kat ayan pis as duta tamat yakat latah, dawak tawan nuhni muhnit yakat lawah, bahang kaput laih, kidika niningyakat kalbautaman kapat karang. Adika laih Israel nining yakat sain as karang.
4“Man laih wadah nining yakat alangwama dawak Israel dutni yamna kidika man mamatyakat ilma. Kidika niningyakauh alangwanam ki, dawak man mamatyakat witing dutni yamna kidika duyawanam ki, 5ma andat bās minitkau, muihas luih arungka minitkau salap, yuldarangkat kurih as pasyakat ma as kidika kulna karang ki Israel dutni yamna kidika. 6Kidika mani laihma kat, tingpal nining yakauh lawa alahwama, dawak Judá dutni yamna kidika trukma ma muihas luih bu praisni, kurih as pasyakat ma as kidika kulna karang. 7Usnitkat Jerusalén yakat nawatta yawama, waihla manah awaihdak, tingma kahr'ilta, dawak yang ayangki kau duta yulna witing niningyakat. 8Talah yang wahkau masitki ki, man pihrta yawa aiwa uinam-awas yulni, kidika mani balna dalani wauhta bayakma kat.
9“Usnitkat plawar minik buas, cebada buas dawak utmil buas duta yawa suba aslah yakat puta man kasnam yamma. Man kidika manh kasma, ma andat bās minitkau muihas luih arungka minit kau salap, wadah niningkauh alangwanatus awama kidika. 10Man kasnam kidika awarni kat duma, ma as kidika paun muihas luih minitkau singka kidika kaupak arungka sahyakna kidika as kasma ma as kidika; 11was bik awarni kat dima, ma as kidika batal papusbah dima. 12Man kasnam kidika cebada labanwi busna as karang, kuhkau, kauna kuhni kidika laih muih ba kau biwi busna karang, dawak man muih talwabangkat yamta kasma.”
13Usnitkat Papang yaklauwi baisa minityakat lakwi kalyulna: “Kasnin as dutni apat kidika, Israel witing kasna karang, pa ūk kau sihki pāni yakat.”
14Yang lawik nangnitlana yang: “Kauna yang sangkika pasyakat watas bik tingki kau laihtas yang, dawak dimuihni as bik kastasyang, witing silp dauna balna kidika, kidika awaskat, nawah balna ihina kidika bik, yang dimuihni dutni kidika balna apis bik kastasyang.”
15Kaput laih witing yaklauwi yayulna: “Kaput kat yang maki turuh bani kau man bita kasnam kidika yamma, muih bani kidika laih kuh kapat dutas awama.”
16Usnit kat yayulna: “Kalating kat Jerusalén yakat kasnin dini dis dawarang. Kasnin dini balna kidika dibin kalna karang, dawak muih kidika kaidīnah kaswarang, was kidika bik dis kalna karang, bahang yamaduwīnah dina karang. 17Witingna kasninna dis dawak dininna bik dis dana karang, biri, biri kaltalwi muihsak dadauwarang. Dawak witingna dutnina yulni sangka yakauna didutlawarang.”
Currently Selected:
Ezequiel 4: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
