Éxodo 7
7
1Kaput laih Dawan yaklauwi Moses yakat kalyulna:
—Talah, yang paki yakat mating man yulbauma fero muhni yakat, dawak wirahma Aarón laih man yulma yulbauna karang. 2Man lawa Aarón yakat kalyulna di balna bitik mapaktayang kidika yamna atnam, usnit kat witing fero karak yulbauna karang, dawak Israel balna kidika witing sauni kaupak kalahwi uina atnin. 3Kaput kaunah yang lawik yamting kat fero kidika baisa dutni kalna karang, kawak kaput bik sain manas yamki di taldas dini kidika, Egipto sauni yakat.#Ap.w 7:36. 4Fero mana yakat yulmana dakawas karang, kaunah yang paraski kidika Egipto minit yakat sihting kiuna karang, dawak di nuhni yamtik yang kalbaunik muihni balna kidika yakki, yuldarangkat, yang tawanki Israel kidika. 5Yang paraski nuhni kidika Egipto yakat niningkaki, dawak Israel balna kidika yakki kat, Egipto muihni balna amanglalawarang yang laih Dawan yang.
6Dawan yaklau Moses dawak Aarón karak amput yamnin diyulwakat yayamna kaput. 7Moses kurih 80 duwa dai dawak Aarón laih kurih 83, witingna fero karak yulbabauna dai mani kidika.
Aarón tulninah
8Dawan yaklauwi diyulna Moses dawi Aarón yakat:
9—Fero yaklauwi taldas dini kidika yamtanang talkuh tarang kat, Aarón yakat kalyultang tulninah kidika fero muhni tani yakat ruhm'lakwarang, dawak bil kalna karang.
10Moses dawak Aarón karak uina dai fero yakat, dawak Dawan yaklauwi ais diyulna kidika bitik yayamna: Aarón witing tulninah kidika fero muhni tani dawak tunan muihni nunuhni balna muhnina yakat bik ruhmlakna, dawak tulnah dai kidika bil kalna dai. 11Fero laih, witing sukniyah balna yulwak uiwi witingna bik sihm kaput yayamna dai: 12witingna, tulninanah bitik laih sau yakat ruhm'lalakna dai, dawak tulninanah dai kidika bitik laih bil kakalna dai. Kaunah Aarón tulninah dai kidika yaklauwi sukyah balna tulninanah yakat ukmukna dai. 13Kaput kalahna kaunah fero witing kulnin dadasni kalna dai dawak yulnina bik dakawas dana dai, Dawan yulna dai kaput.
Was kidika á yamna
14Usnit kat Dawan yaklauwi Moses kalyulna:
—Fero kulnin dadasni yamna bahang Israel balna kidika dawak kalahwi uiwas dadana. 15Kaunah yahan mapiris yawa kaltalma, witing waspa yakat yaklakkiwarang yakat. Was kung yakat tahama, dawak tulmanah bil kalna dai kidika duta yawama. 16Dawak kalyulna: ‘Dawan, hibru balna Papangnina yaklau yasihna man yakat mayulna atnik: Datangkat tawanki kidika kalahwi kiwang kauhmak wanilang yakat, yangkau ayangki nuhni yamna atnin. Kaunah man warmani kat baisa yuldakasman. 17Kaput bahang, Dawan yulna: Warmani amanglama yang Dawan yang kidika. Yang tingki akat tulnah duta sakyang adika kau was yakat wiski kat, was adika ā manah kalna karang.#Rib 8:8; 16:4. 18Waspa dini balna kidika dadauwarang, dawak was adika wayāni kalna karang, Egipto muihni balna adika wasni dinin tiningna dulihwarang.’
19Baisa minit yakat, Dawan yaklauwi Moses yakat kalyulna:
—Aarón yakat kalyultang kat tulmanah kidika duwi was murwa balna kidika minit yakat yuwang, wastuna balna yakat, lakun balna yakat, dawak kaput bik Egipto kau was laihwa pāni yakat bik, was duwa pāni balna bitik yakat, kaput laih ā manah kalna atnin yulni. ¡Kaput laih sutak balna yang kau yamna balna bitik yakat ā manah karang!
20Moses dawak Aarón witingna yayamna dai Dawan diyulna yakat. Aarón witing tulninah dulauwi was yakat wisna dai, fero dawak tunan nunuhni balna muhnina yakat, kaput laih was kidika bitik ā manah kalna dai. 21Waspa dini balna bitik dadauna, dawak wayāni kalna dai, kaput laih Egipto muihni balna bik sip-awas dai was kidika dinin. ¡Egipto sauni bitik yakat ā manah dai!
22Kaput bik laih, sukyah balna bik sihm kaput yayamna dai, dawak fero kidika baisa kulnin dutni yamna dai, Moses dawa Aarón karak yuyulwa kidika dakawas dai, Dawan yulna dai kaput. 23Fero, witing mahka ūni yakat nawatwi kiuna dai, adika dini dauh kulna dai, 24dawak Egipto muihni balna bitik witingna was kung yakat pa kukuhrna dai was yakna atnin yulni, kat was murwa kidika wasni laih dinin sip-awas dai bahang.
Pikpik kalalahna
25Dawan yaklauwi was yakat wisna kidika ma tiaskaubu bayakna usnit kat,
Currently Selected:
Éxodo 7: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998