Éxodo 4
4
1—Witingna rahm yakukulwas karang, dawak bik yulki dakakawas karang —kalatna dai—. Nawatkauh laih aput yayuyulwarang: ‘Dawan man yakat kalahwaski.’
2—¿Man tingma yakat ais dutamahn? —Dawan yaklau kalyulwi dakana.
—Tulnah as dutayang —kalatna Moses yaklauwi.
3—Sau yakat ruhm'laktah —kalatna Dawan yaklauwi.
Kaput laih Moses, witing tulninah kidika sau yakat ruhmlakna, dawak kidika minitni yakat tulnah dai kidika bil kalnadai. Dawak Moses kirana, 4kaunah Dawan yaklauwi kalyulna:
—Tingma kau laihta mamahni yakat.
Kaput laih Moses witing laihwi dulauwa kat bil dai kidika watwi tulnah kalna dai.
5—Kidika laih man yakat makulna atnin Dawan man yakat lāih kalahna kidika, man muihmabararak balna Papangnina, Abraham, Isaac dawak Jacob Papangni 6—kaput kaltadai Dawan yaklauwi—. Dawak waralaih, man tingma kidika balmatak yakat ātah kalatna.
Dawak Moses witing tingni kidika balnitak yakat āwi dawi yakwak, lipar manah pihni dai. 7Kaput dawak Papang yaklauwi kalyulna:
—Watta man tingma kidika balmatak yakat ātah kalatna.
Dawak Moses witing kaput yamna dai, tingni kidika balnitak yakat āna, dawi watwi yakwak yamni kalna dai. 8Usnit kat Dawan yaklauwi kalyulna:
—Tatuna sainni kidika yamtang rahm makukulwas karang kat, sain ūk watta yamma yakat rahm makukulna karang; 9adika sainni bupak yamtang rahm makukulwas karang kat, was murwa kidika kaupak butta sau yakat utuhma. Was kidika butta iltah sau yakat utuhtaman minitni yakat ā kalna karang.
10Moses yaklauwi yulna:
—¡Alakaih Dawan! Yang sip yul yamni yulbautasyang, bahang kidika laih damai mani, kidika awaskat warmani dini awaski, man dima yamyang karak yulbautaman kidika adika laih ma mahni bayakwi kaina kaupak ki. Yulbauting kat tuki laihwatwi.
11Kaunah Dawan yaklauwi nangnitlana:
—¿Wais yaklauwi muih al tinipas kidika kalanayah? ¿Wais yaklauwi yamna yah, yang lawik yamtayang awasyah, tubi tappuk, minikpa ditalwas, kidika awaskat minikpa yamni di talnin kidika bik? 12Kaput bahang, yawah, man yulbauma manikat yang man karak awaki, dawak bik mayulna awaki ais yulma kidika.
13Moses watwi yulna:
—¡Alakaih Dawan, kalma dinit yakat buktik yultayang, muih ūk sihtah!
14Kaput dawak Dawan kulnin daukalwi kalyulna:
—¡Kaput kat man wirahma Aarón sakki, levita kidika! Yang amanglatayang witinglaih yamni yulbauwi. Baisa minit yakat, witing man yakat kaiwi, yang amanglatayang witing alasna kalahwarang matalwarang kat. 15Witing karak yulbauta, di bitik yamni lāih kalyultah ais yulnin balna bitik kidika. dawak yang niking kauh laih manna karak awaki yulbautanama manikat, dawak bik manayulki ais yamnamna kidika. 16Man lawa Aarón yakat yulkalbauma, sihm yang yultayang kapat, dawak Aarón laih muih balna yakat diyulwarang. 17Tulninah adika duyawah, kat adika dini karak sain manas yamna ki.
Moses Egipto yakat nawatwi kiuna
18Moses, witing unisah Jetro uni yakat kiwi kalyulna:
—Egipto yakat nawattik yawinik ki, yang wirahki balna bangyakat. Talkih yawi baisa sangka bangpa.
Jetro yaklauwi kalyulna:
—Yawah, tala yawah.
19Moses kidika baisa Madián sauni yakat likkat, Dawan yaklauwi kalyulna:
—Egipto yakat nawatta yawah, maīnin mawawalwa balna dai kidika bitik dadauna.
20Kaput laih Moses yalni dawak walanibis#4.20 Walanibis: kaput kapat ulna kidika. Hibru kau laih walanibis balna. kidika bik duna, biriku minityakat ilwi dawi mahka Egipto yakat kiuna. Witing tingni yakat Papang tulninah kidika duwi kiuna. 21Usnit kat Dawan yaklauwi Moses yakat kalyulna:
—Egipto yakat yawama kat, fero muhni yakat di taldas dini yamna kidika yamni kulta talma, yang lawik yamnin manayang kidika. Dawak yang niking kauh laih yamtingkat kulnin dutni kalwarang, dawak Israel balna kidika dawak kalahwas karang. 22Kaput dawak fero yakat kalyulma: ‘Dawan aput yulwi: Israel laih yang walakibis barakni. 23Yang uman mayulnayang, walakibis al kidika datang kalahwang, kaput laih kiwi ayangki nuhni yamwang; kaunah man datang kiunin kidika dukih mawas bahang, yang lawik walamabis al tatuna muih barak kidika īki.’#Ex 12:29.
24Moses mahka ta yakat kalahwi lapakna, bahang witing walanibis dawak yalni bitik kalpakwi payahwarang pāni yakat Dawan yaklauwi Moses tanipas yakat kalahwi inin yamna. 25Kaput laih Séfora yaklauwi kipala kau kuhbil yamna dini kapatnah kau duwi walanibis supahni unitak bin kidika dakna, dawak usnit kat, dakyakna dini kidika kau Moses kalni yakat kahna, dawi yulna: “Rahm palni kidika laih man laih ā kaupak alki madunayang.”
26Kaput laih, Dawan yaklauwi Moses yakat dapamwak kiuna. Dawak Séfora yulna Moses kidika laih ā munah duna, kat Papang sainni munah laihwi yakna bahang.
27Kaput bik laih, Dawan yaklauwi Aarón yakat kalyulna dai: “Kauhmak wanilang yakat yawa Moses karak kalpaktah.” Kaput Aarón witing kiwi Moses karak kalpakna dai, Papang asangni yakat. Bahang kidika yakat kalpapakwakat laihwi umna dai. 28Kaput laih Moses yaklauwi kalyulna dai Dawan yaklauwi yulnin pakna kidika bitik, dawak kaput bik di taldas dini pakwak yamwa kidika bitik laih kalyulna dai. 29Kaput laih usnit kat albupak uiwi kalpapakna dai Israel muihni bararak balna karak kalpaknin, 30dawak Aarón yaklauwi diyulna, Dawan yaklauwi Moses yakat kalyulna balna dai kidika, dawak baisa kidika minit yakat di taldas dini balna yamwi niningna kanin yulna dai kidika bik yamna dai.
31Muih balna kidika bitik laih kulninna laihna dai, kat witingna amanglalana dai bahang Dawan yaklauwi witingna yakat ditalwa kidika yulni, dawak bik amput wawauhwa kidika yulni bik, dawak witingna minitna yulnin kapat risnipik lani kau abuk dadana dai.
Currently Selected:
Éxodo 4: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998