Éxodo 18
18
Jetro, Moses yakat kiwi kaltalwi
1Jetro, Madián sumalniyang nuhni dawak Moses unisah, bahang witing dakana Papang yaklauwi Moses yakat ais kalyamna kidika bitik, witing tawanni yulni, dawak kaput bik dakana dai Dawan yaklauwi Egipto kaupak yakna kidika bik. 2Moses witing yalni kidika sihpamwak kiuna dai, dawak Jetro witing uni yakat āwi duna dai 3dawak walanibis balna bu kidika bik.#Ap.w 7:29. As kidika ayangni laih Gersón,#18.3 S.n 2 dawak S.d 22 yakat talah. kat Moses yulna dai bahang: “Yang laih pa ūk muihni yang dai muih sauni yakat”,#Ex 2:21-22. 4dawak ūk kidika laih ayangni Eliezer,#18.4 Hibru kau laih, Eliezer tanka laih yang Papangki kidika laih ilp. kat yulna dai bahang: “Yang papangki Papangni yang akat ilp yana kaina dai bahang, dawak fero isniparah baini kaupak yalaihwi yakna.”
5Moses laih kauhmak wanilang yakat kiwi watwi uni labanni pakna dai, Papang asangni yaihnit yakat, bahang Jetro laih yakat kiuna dai, Moses yalni dawak walanibis balna karak kalpakwi. 6Dawak Moses yakat kalyulna:
—Yang kuduh Jetro man umasah, matalna aiwayang, man yalma dawak walamabis balna bu kidika karak kalpaktik.
7Moses witing kalahwi kiwi unisah karak kalpakna. Witing niningyakat abukwi dawi laihwi umna, dawak kalparasna usnit kat uni labanni yakat uiwi kakana. 8Kidika yakat Moses yaklauwi kalyulna unisah yakat, Dawan yaklauwi di yamna balna kidika fero niningyakat, dawak Egipto muihni balna yakat bik, Israel ilpni yulni, dawak ta yakat dutni kalpakna dai kidika balna bitik kalyulna, dawak amput Dawan yaklauwi laihwi yakna kidika bitik.
9Jetro, witing kasak alasna duna dai, Papang amput minikun ditalna dai kidika Israel balna yakat, Egipto parasni kaupak dilaihwi yakna kidika, 10dawak yulna:
—Dawan laih ayangni nuhni yamna karang, manna manalaihwi yakna kidika Israel balna, fero dawak Egipto muihni balna parasnina kaupak manalaihwi yakna kidika, dawak taihnin parasni kaupak bik 11dawak witingna tapanina dadasni kau dutni diyayamna dai kidika. Waradika laih yamni amanglatayang Dawan laih tanit nuhni ki dawan dauh balna karak dawakat.
12Jetro, witing tinglau as duna dai, Papang yakat sakripais busna atnin, dawak kaput bik minitdis kalanin dini ūk ūk balna bik. Usnitkat, Aarón dawak Israel yakat muih bararak balna bitik karak kalpakwi uina dai di kasna atnin, Moses unisah karak, Papang muhni yakat.
Moses yaklauwi wihta balna ūk āna
(Dt 1:9-18)
13Kidika payahwakat Moses witing yalahwi Israel balna lanina kidika yamna bahang witingna kidika mapiris kaupak masan kat Moses muhni yakat yaklauna bang dai kasakni. 14Witing Moses yamwa kidika talwi, unisah kidika yaklauwi kalyulna:
—¿Adika muihni balna karak ais yamtamahn? ¿Ais yamta man manah yalahdang witingna laih kasakni bangyah mapiris kaupak masan kat?
15Dawak Moses yaklauwi nangnitlana:
—Kat tawan laih yang akat aiwi yatatalwi Papang yakat di yulwi dakana atninna. 16Witing pasningna yakat dutni as kalahwakat aiwi yatatalwi, bahang yang lawik lanina yamna atnik wais kidika rahmni duwa pa; bahang kaput laih yang lawik Papang lani kidika niningnakatayang, amput sumalwa kidika.
17Kaunah, witing unisah Jetro yaklauwi kalyulwi isningpakna:
—Man yamtaman kidika laih yamni-awaski, 18man masuhwi, dawak muih balna man karak bang kidika bik disuhwi. Warkni kidika laih man parasma kidika yakat minit bayakwi, bahang man alas laih sip yamtas awamaki. 19Yamni dakah la masumalki kidika, dawak Dawan bik ilp mamunwarang. Man Papang muhni yak yawanam ki tawan yulni, dawak trabil balna kidika yulna atnam. 20Dawak witingna yakat laih lā balna kidika yakat disumaltah, dawak diatang amanglalawang amput yalahnin kidika dawak amput yamnin kidika bik. 21Dawak man yamnam kidika laih, tawan paskaupak muih di sip balna kidika walta yaktah, Papang yakat yamaniduduwa balna kidika, dawak di rahm yuyulwa muihni balna kidika, kaput bik ahal balna dutni lani munah di kidika minitkau yakwi duduwas balna kidika atnin ki, dawak buas kidika laih parasni diatah muih tausin balna minitna yakat atnin, dawak ūk balna kidika laih muih andat minitna yakat, dawak ūk kidika laih muih andat papusbah minitna yakat, dawak ūk balna kidika laih muih salap minitna yakat. 22Bahang witingna yaklauwi laih tawan lani yayamwarang minit bitik yakat; dutni nunuhni balna kidika laih man yakat duahaiwarang, dawak dutni dibinina kidika laih witingna barangni ahawarang. Kaput laih man mamatkau tikini sak kidika lakpamma, dawak witingna yaklauwi tingmasut laihwi duwi uiwarang. 23Man aput yamma kat, dawak bik Papang yaklauwi kaput yamnin mayulwarang kat, sip awama kalbaunam; dawak muih balna kidika laih witingna niningna yakat, isningnalak ūnina kau uiwarang.
24Moses witing unisah yulni dakawi, amput yamnin kalyulna dai yakat yamna: 25Israel pasyakat muih ahal di sip balna kidika walwi yakna, dawak parasni diana muih tausin, andat, andat papusbah, dawak salap balna minitna yakat. 26Witingna yaklauwi la yayamwa dai tawan pasyakat; dawak dutni dadasni balna kidika laih Moses yakat duwi uiwa dai, kaunah dutni di bin kidika laih witingna silp barangni ahawa dai. 27Usnit kat Moses dawi unisah karak kalpararasna mahka kaldakwi kalahnin, kaput laih witing unisah kidika mahka sauni kau kiuna dai.
Currently Selected:
Éxodo 18: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998