Éxodo 15
15
Moses unbauna
1Kaput laih Moses dawak Israel balna karak kalpakwi adika unbaunin#Rib 15:3. unbabauna Dawan risnipik nuhni yakat:
“Dawan risnipik nuhni kidika unbauki,
minit bayaknin taldas as minit bayakna,
kuma yakat kalawak kawi uina kat dawak aras kilyang balna.
2Yang unbautayang kidika laih Dawan yakat unbautayang,
witing kidika kuduh yang paraski dawak yalaihwi yakwa kidika.#Sal 118:14; Is 12:2.
Witing laih yang Papangki, bahang ayangni nuhni yamnik ki;
witing kuduh papangki Papangni, kidika bahang nuhni kaldulaunik ki.
3Dawan laih kalbauyang nuhni palni as ki.
Papang laih, ¡kidika witing ayangni!
4Papang yaklauwi kuma yakat āwak kawi uina
kat balna dawak fero kalbauyang muihni balna duwadai kidika bitik;
¡kalbauyang tunan muih balna yayamni
Kuma Pauni yakat was dadauna!
5Tuhni yakat kawi uina sihm kipala kapat,
kuma tuhni kidika yaklauwi disarammukna.
6Dawan, kidika laih man tingma palni kidika yaklauwi yamna
parasni dawak parasni nuhni duwa kidika,
waihla balna yakat imukna kidika.
7Parasma nuhni kau taihta labannaman
man namangkauh yaklalauna balna kidika yakat,
man kulnam daukalna kidika dahlna,
dawak witingna kidika dibasta kusuni kapat dahlna.
8Kulnam daukalna karuk puhnaman, dawak was kidika uduhna,
was lalamwa balna kidika dulauna sihm daklana as kapat;
¡kuma tuhni paskau kidika itikwas kus dana dai!
9Waihla kidika laih kulna:
‘Uitik kuihtik laihki,
dawak dina balna dakyakki kidika laih sahyaktik yuki,
isinglak dawarang kat.
Isparah kidika yakki,
dawak tingki kau ītik disyamki.’
10Kaunah puhtang kat, kuma yaklauwi ukmukna;
was parasni yakat sihm lit kapat kawi uina;
11Dawan,
¡dawan dauh balna kidika as bik
sip man karak sip kallibitwas ki!
¡As bik holi awaski, man kapat!
¡Di taldas dini balna kidika yamtaman,
dawak yamadangni balna kidika bik!
¡Kidika bahang ayangni nuhni yamnin kidika laih man yakat manahki!
12¡Parasma nuhni kidika sihtang kiuna,
dawak sau diukna!
13Parasma nuhni karak tatuna áwa duyawaman,
adika tawanni laihta yaknaman kidika yakat;
man parasma nuhni kau,
ūma maisihnidis yakat duta yawanaman.
14Nisan balna kidika dakakawarang kat diyukwarang,
filisteo balna laih didalawak bukwi pipihrwarang,
15Edom kalbauyang muihni duwa kidika taninatuna balna laih sip yakururupwas karang,
Moab kau kalbauyang tunan muihni balna kidika laih yamaduduwak diyukwarang,
dawak canaán muihni balna kulninna dadasni duduwa kidika bitik disdawarang.
16Dawan,
¡muihsak dadauwang!, ¡yamaduduwang!,
¡kipala kapat kakalwang
man tingma parasni kidik ā yulni,
man tawanma kidika bitik bayayakwarang kat,
tawan as man yakta dunaman kidika!
17Dawan,
man asangma holi yakat yanaduyawang kat, yakat yalahtanakuh,
yalahnin pāni as walta yakna man kidika,
maisihnidis as man tingma kau yamnaman kidika.
18¡Dawan laih king kawi ban kaput atnin yakat!”
Mery unbauna
19Fero kārni balna dawak aras kau kilna muihni balna kidika kuma paskau ta kiwa yakat kawi uiwak Dawan yaklauwi yamwak was kidika witingna minitna yakat bukna dai, kaunah Israel balna laih sau buhni kapat yamni dakyayakna dai. 20Kaput laih Mery prapit yal dai kidika, Aarón wirahni yal witing kilingnin duna dawak yayal balna bitik usnit uiwi uina, sutwi yakisdi kilingnin dini kidika kau kilingwi, 21witing aput unbauna dai:
“Dawan ayangni nuhni unbautanauh,
minit bayaknin taldas yamni as duna
kuma yakat kalawak kawi uina aras balna
dawak aras kilyang muihni balna bik.”
Was tapalhni
22Moses yaklauwi yamna Israel balna kidika Kuma Pauni kaupak dapamwi naikau uina atnin. Kaput laih witingna kidika kauhmak wanilang Shur yakat uina dai, kidika pāni yakat ma bās lapapakna kaunah witingna sip was yayakwas dai. 23Mara pāni yakat uiwi kakana kat, was yayakna kaunah sip didiwas dai, kat tapalhni dai bahang. Kidika yulni laih ayangni papakna Mara#15.23 Hibru kau laih, Mara tanka laih tapahlni. kidika pāni.
24Muih balna kidika mahka Moses yakat dutni kalyuyulna, dawak kalyulwi dakakana: “¿Yangna ais ditanakiyah?” 25Kaput laih Moses witing Dawan yakat ilp yulna, dawak Papang yaklauwi pan as niningkana, dawak Moses witing pan dai kidika duwi was yakat ruhm'āna, dawak wasni dai kidika damni kalna.
Kidika yakat Dawan yaklauwi traininatalna, kaput laih witingna yakat la as diana, dawak witingna kidika amput lapaknin kidika bik. 26Diyulna: “Manna, yang Dawan Papangmana yultayang yakat tapayuta dakanamna kat, manayultayang yang dukih yawa yakat yamtanama kat, dawak yulki balna yakat daka yamtanama kat kaput bik lāki balna kat yamtanama kat, yang manna mamatna yakat wah as bik sihtas awaki, Egipto kau sihnayang balna dai kidika, kat yang kuduh Dawan yang, manna sikmananis kaupak yamni manayamwa kidika.”
27Kidika usnit kat Elim yakat uiwi kakana, kidika yakat wastuna burhwi kalahwa salap minitkau bu bang dai, dawak pan kuku kapat satni balna kidika 70 bang dai, dawak kidika wasni kung yakat watwi ūnina labanni papakna dai.
Currently Selected:
Éxodo 15: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998