2 Kurint 1
1
Kalparasna yulni
1Yang, Pal, Papang kulnin lani munah Jisas Krais aposnitel yang. Wanaih Timoti karak kalpaktik adika wauhnitaya ultayang Papang sutsni Kurint#Ap.w 18:1. tawanni nuhni kau sakkidika yakat dawak Papang tawanni Acaya sauni bitik yakat bik. 2Mapapangki Dawan Jisas Krais karak yaklau witingna minikun talnin lani duduwa kidika dawak kulnin aslah lani kidika bik manna mamatna yakat lalakna karang.
Pal wauhnin dalani wauhna kidika
3Papang kidika laih ayangni nuhni yamna karang dawak Madakiwan Jisas Krais Papangni, bahang witing kuduh Papang dalani maitalwa kidika dawak Papang as ban kaput mawalakiāwa kidika. 4Witing yaklau mawalakiāwi wauhnin balna bitik wauhda yakat, mayang malawi muih ūk balna wawauhwa yakat walanina ānin yulni, witing yaklau mayang yakat mawalakiāna dini kidika kau. 5Kat Krais wauhnin balna yangna mikitnabayak kidika dawak yangna laih witing karak kalpaktik wauhtayangna kaput, yangna mawalakiānin kidika bik sihm kaput Krais munah mikitnabayak ki. 6Bahang yangna wauhtayangna kidika laih, manna walamanaānin lani dawak laihwi yaknin lani kidika dunamna yulni; dawak Papang yaklau mawalakiāwa kat, kidika laih manna walamanaānin lani kidika duta parasmana karuk sip wauhna atnamna yulni yangna wauhtayangna dini balna kidika yakat. 7Yangna laih tahanin lani barangni as dutayangna manna yulmana, kat yangna amanglatayangna, wauhnin niningyakat manna dimana dutamana kaput, walaniānin yakat bik sihm dimana dutamana.
8Wirahki balna, yangna dukih yanawi manna amanglana atnamna yangna pāt ampus dunayangnah Asia sauni sahyakna yakat.#1 Kor 15:32. Wauhnin as dadasni sip baisa niningkauh lawasyangna dai, dawak tahanin lani kat bik dutasyangna dai kidika kaupak sangka alahwana atnikna. 9Sihm dauna kapat kaldakanayangna dai. Kaunah adika laih yangna nikingna yakat yamni dai amanglana atnikna yangna silp muihkina yakat kultas atnikna kidika, kaunah Papang muih dadauna balna watwi dulauwa kidika yakat kulna atnikna. 10Dawak Papang yaklau yanalaihwi yakna dawak daunin yamadangni nuhni kaupak bik yanalaihwi yakwarang ki. Yangna witing yakat kultayangna ban kaput yanalaihwi yakwa karang kidika, 11manna lawa yangna yulkina mamatna yultanama kat. Muih mahni yangna yulkina minitna yuyulwa kat, muih mahni bik Papang yakat tingkih lani kalalawa karang witing kaupak yangna blisin lani dutayangna kidika yulni.
Ais yulni Pal Kurint yakat kiwasdana kidika
12Yangna di as yulni alasna yangna, dawak kidika laih yangna kulnikna yaklau yanayulwi yangna adika sauni akat alas lani dis karak di yamni yamnayangna kidika, baisa kidika laih manna pasmangna yakat. Yangna laih muih sinsni lani karak lapaktasyangna, kaunah Papang minikun talnin lani duwa kidika yakat kultayangna. 13Yangna wauhkinataya balna ulnayangna yakat, manna yulta tala amanglatanama kidika karak satuk bik laih ultasyangna. Bahang yang dukih yawi manna yamni yulta tala amanglana atnamna, 14kat manna uman apis amanglanamana yangna amput yangna kidika, Madakiwan Jisas Krais nawatwi kaiwarang mani kat manna laih yangna munah manna manah kapat kaldakanama ki dawak yangna bik manna munah yangna manah kaldakanaki kapat.
15Adika dini akat kultik, yang tatuna yawik manatalnik kulnayang dai, dawak kaput karak yang manna yakat wat bu yawik manatalna atnik; 16tatuna kidika laih Macedonia#Ap.w 19:21. munah yawik bayaktik manatalik dawak usnit kat, nawattik aiwik, wattik manatalna atnik kulnayang dai. Kaput karak laih manna lawa yang yakat ilp yatanang kat Judea yakat yawana atnik. 17¿Yang adika dini yamnik kulnik aslah dunayang mani kat rahm palni yang kauh barangni kultasyang daih? ¿Manna kultamanah yang di yamnik balna kidika alas lani karuk yamtayang, “agha” dawak kidika minitni yakat “dikah” yultik? 18Papang laih witnis yangna lawik manna yakat “agha” dawak kidika minitni yakat “dikah” manayultasyangna kidika. 19Kat Papang Walanibis Jisas Krais yulni, Silvano, Timoti dawak yang#Ap.w 18:5. kauna manna pasmangna yakat sumalnayangna dai kidika laih, “agha” dawak kidika minitni yakat “dikah” bik awasdai. Papang yaklau Krais munah “agha” atna kidika laih ban kaput atnin dana, 20bahang witing yakat Papang pranimis balna bitik kidika kat kalahwi. Kidika bahang, Papang yakat ayangni nuhni yamda mani kat, aput yuldi “Amén” Jisas Krais ayangni usnit yakat. 21Dawak Papang kuduh witing yaklau yangna dawak manna karak Krais yakat aslah mailibitna kidika, dawak bik witing dini maiyakna kidika. 22Witing tampni kau maibauna, dawak maising yakat Spirit Holi kidika āwi dana mayang dudarang#Ef 1:14. dini kidika.
23Kaunah baisa yang Kurint yakat yawasyang, kultayang dai kaput, Papang kidika witnis ātayang dawak yang sangkika yakat barangni kultayang, manna yakat manakultayang kidika yulni yawas danayang. 24Yangna laih manna rahm kulnin lani dutamana kidika didawan awasyangna; kaunah yangna dukih yanawa kidika laih manna karak kalpaktik wark alahwinikna, kaput karak manna laih alasna lani kidika duna atnamna.
Currently Selected:
2 Kurint 1: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998