4 Musa 5
5
Hatoren tersèngèt kalak Ramun
1Nina Jahowa mo mbang si Musa, 2“Pesakat mo perèntah èn bai kalak Israel: Karina kalak sikenna sakit puru mahantu i, barang pè sakit dengan tubuh, barang pè sienggo dais mi bangkè, kennah ikaruarken i undung-undung kalak Israel nai. 3Kennah ipelaus ngo kalak i, asa ulang gabè mengelamuni perundung-undungen, bekkasKu merian rebbak dekket bangsangKu.” 4Iulaken kalak Israel mo perèntah i janah iliplip karina kalak sibagidi ibas perundung-undungen idi nai.
Cara menggancih kerogien
5 #
3 Ms. 6:1-7
Iberèken Jahowa mo taba si Musa 6hatoren ènda lako bai kalak Israel: Mula lot sada kalak oda setia bai Jahowa merkitè memaing salah meradepken kalak sidèban, 7kennah iakui kalak i ngo dosana janah kennah dom igarar penebbusna, itambah duapuluh parsen, bai kalak sinirogienna idi. 8Tapi mula enggo matè kalak sinirogikenna i, janah oda ma lot sincelketna, nai kennah bai Jahowa mo iberèken penebusna i, janah gabè jambar imam mo i. Penebus idi oda termasuk biri-biri tonggal lako mahan kerja kesasaen dosa bai kalak simersalah idi. 9Barang kadè sambing sinipèlèken kalak Israel bai Jahowa, pèlèen hujuenna gabè jambar imam simenjalo pèlèen idi mo i. 10Barang kadè sinipèlèken sada kalak jelma bai Jahowa, gabè jambar kalak i sendiri. Pellin èn, barang kadè iberèken bai sada kalak imam, gabè jambar imam idi mo i.
Hatoren tersèngèt pertua ibalè simencemburui sinibagesna
11Ipasulak Jahowa mo si Musa 12-14pesakatken hatoren-hatoren ènda bai kalak Israel. Tah bakunè lot sada kalak anak laki mencemburui sinibagesna. Dok atèna oda setia sinibagesna i bana janah enggo ilèai dirina kumerna merlangkah julu meddem dekket daholi sidèban. Tapi oda lot dèng buktina bai pertua ibalè i, kumerna mboni-mboni ngo iulaken sinibagesna idi sibagidi; oda lot saksina, janah oda ma pella nung terdapet. Barang pè sada kalak pertua ibalè sèk ukurna midah sinibagesna, keppèken oda ngo lot pilit langkah sinibagesna i. 15Ibas sidua bagè simasa i kennah iarahken pertua ibalè idi mo sinibagesna i mendahi imam. Kennah iembah ma mo pèlèen siperlu mi si, imo sada kilo nditak berras. Oda ndorok isakkor dekket minak Zaitun nditak i barang ibaing merdengan dahupa, kumerna merumangken pèlèen sèk atè janah tujunna menandaken lot sèk atè pertua ibalè i taba sinibagesna.
16Kennah idokken imam mo daberru idi mi lebbè langgaten janah cènder i si menghadep Jahowa. 17Nai kennah ibuat imam mo sada mangkuk tanoh janah iarirken situk laè simbadia mi bagessen. Nai ibuat mo situk abu ipas hatap Undung-undung Jahowa nai janah icircirken mi bagasen laè i. 18Enggo kessa bagi kennah ipesarsar mo buk daberru idi, janah ibaingken mo nditak pèlèen sèk atè i mi bagasen tanganna, ninganna icèkèp imam laè mpagit simengkirap tulbang. 19Enggo kessa bagi kennah iruapken imam mo kata-kata sumpah janah mengidoken asa iuèken daberru idi. Kennah dokenken Imam mo, “Mula oda ngo kono merlangkah julu meddem, oda ngo kènna sempetta sinikerohken laè ènda ko. 20Tapi mula enggo merlangkah julu meddem ko, 21katerra pè ibaing Jahowa mo gerarmu gabè sumbiah perbilangen i tengah-tengah bangsamu. Katerra pè ibaing mo merkerètkut benna pahamu, janah mbuncat beltekmu. 22Laè siperohken simpetta ènda mbengket mi bagasen beltekmu janah memakin mersesseng beltekmu janah maing merkerètkut benna pahamu.”
Kennah ialoi daberru idi mo, “Imo tuhu; katerra pè ibaing Jahowa mo bagidi.”
23Nai kennah isuratken imam mo kata sumpah idi ibas kertas ginolong janah idalis dekket laè mpeggul idi. 24Isuruh Imam idi mo daberru i mengènum laè mpeggul simengkerohken simpetta i. Mula iènum laè idi, gabè mengkerohken sakit mo. 25Kennah ibuat Imam mo pèlèen nditak idi, janah ipehuju mi hadeppen Jahowa, nai iembah mo mi langgaten. 26Nai kennah ibuat mo nditak i singkupul sikira tanda magahken karina nditak idi enggo ipèlèken, nai itutung mo i babo langgaten. Perpodi ipepènumken mo laè idi bai daberru idi. 27Mula tuhu ngo enggo kin merlangkah julu meddem daberru idi, mengkerohken mpiah kalohon ngo iakap kerna laè siniènumna i; mersesseng mo beltekna janah merkerètkut mo pangkal pahana. Kenna sumpah perbilangen mo gerarna i tengah-tengah bangsana. 28Tapi mula oda ngo tuhuna ia mersalah, oda mo ia kenna sempetta janah ndorok dèng ngo ia merdukak.
29-30Bagidi mo hatoren mula lot sada kalak pertua ibalè cimburu janah sèk atèna midah sinibagesna merlangkah pilit janah pelèaken dirina. Kennah ipehadep anak laki idi ngo sinibagesna i taba Jahowa janah kennah ibahanken imam ngo hatoren i meradepkensa. 31Meluah mo anak laki idi ibas kesalahen nai, tapi ukum sinibagesna, mula tuhu-tuhu mersalah, kennah ijalo mo akibatna.
Currently Selected:
4 Musa 5: LAIBTD
Highlight
Copy
Compare
Share
Want to have your highlights saved across all your devices? Sign up or sign in
@ LAI 1998 Indonesian Bible Society (Lembaga Alkitab Indonesia)
@LAI 2022 Indonesian Bible Society (Lembaga Alkitab Indonesia)
