4 Musa 4
4
Ulaen kalak Lewi i horong si Kehat nai
1Isuruh Jahowa mo si Musa dekket si Aron, 2mengkèrah kalak Lewi i horong si Kehat nai mengèkutken kaum kalak i gennep, 3nai isurat mo karina gerar anak laki simerumur tellupuluh tahun soh mi limapuluh tahun, siterbaingsa mengulaken ulaen mengkebasi i Undung-undung Jahowa. 4Ulaen kalak i imo menjamoti barang-barang simbadia kalohon.
5Iberèken Jahowa mo bai si Musa hatoren ènda: Mula enggo dapet katikana mengerontas perundung-undungen, kennah masuk lebbè si Aron dekket dukak-dukakna mi Undung-undung Jahowa, mengamet kirè-kirè sinilebbè Pèti Petpadanen, janah menutupi Pèti idi dekket kaèn idi. 6Enggo kessa bagi, kennah ibaluti kalak i dèng ma ngo dekket sirambar bebbak halus nai ipekimbang mo sirambar kaèn meratah i babona, janah mengeleketken kayu pengosong Pèti idi.
7Kennah pekimbangen kalak i ngo sirambar kaèn meratah i babo mèja bekkas roti hantaren bai Jahowa, janah i babo mèja i kennah igamparken kalak i ngo pinggan, bekkas dahupa, dulang bekkas pèlèen, dekket gerigit bekkas memèlèken laè anggur. Roti hantaren kennah dak tong lot i mèja idi. 8Kennah itungkupi kalak idi ngo i karina dekket sirambar kaèn mbalo, nai ipekimbang mo sirambar bebak halus i babona, dekket mengèleketken kayu pengosong mèja idi.
9Kennah buaten kalak i sirambar kaèn meratah lako memaluti nèhè lampu dekket lampu-lampuna, haliu pebersihken sumbu lampu dekket tanggo-tanggona, dekket karina bekkas minak Zaitun. 10Nèhè lampu dekket karina perlengkapenna kennah ibalut kalak i dekket sirambar bebbak halus nai igamparken mo i mi babo osong-osong.
11Enggo kessa i kennah ipekimbang kalak i sirambar kaèn meratah i babo langgaten emmas idi, janah itungkupi dekket sirambar bebbak halus, nai ileketken mo kayu perosong langgaten idi. 12Karina haliu sinipakè ibagas Bilik Simbadia kennah ilempang kalak i janah ibalut dekket sirambar kaèn meratah. Nai kennah isangkemmi kalak i dèng dekket sirambar bebak halus, janah ibaing mi babo osong-osong. 13Kennah pebersihen kalak i ngo langgaten i asa ulang merabu, nai i pekimbang mo sirambar kaèn meharbu i babona. 14Janah i babona i kennah igamparken kalak i karina haliu sinipakè lako memoji Jahowa i langgaten i: Bekkas api, garpu, senduk dekket sambung. Nai kennah tungkupen kalak idi karina i dekket sirambar bebbak halus janah mengeleketken kayu osong-osongna.
15-20Nina Jahowa mo mbang si Musa dekket si Aron, “Tikan mengerontas per- undung-undungen i kènè, kennah mbengket ngo si Aron dekket dukak-dukakna mi bagasen Undung-undungKu janah isangkemmi karina ugasen dekket perlengkapen silot i si. Nai enggo kessa bagidi, ndorok mo roh kalak Kehat memersan. Tapi oda ndorok idah kalak i ugasen i, barang menjolmiti barang menjamah pè, kumerna enggo ihujuken baKu. Mula ilausi kalak idi, matè mo kalak i. Jadi asa ulang ntompet kalak Kehat idi i marga Lewi nai, kennah idokken si Aron dekket dukak-dukakna i mo samahsa, kadè embahen kalak i. Imo ulaen kalak Kehat mula tikan iompat Undung-undungKu. Si Eleazar, anak si Aron, mertanggung jawab i karina Undung-undungKu, minak lampu, dahupa, pèlèen pagè mahan hantaren menettap, minak kerja dekket karina silot i bagasen Undung-undungKu.”
Ulaen kalak Lewi ibas pemparen si Gerson nai
21Ipasulak Jahowa mo si Musa 22meng- kèrah kalak Lewi i horong si Gerson nai mengèkutken kaumna gennep. 23Kennah suraten si Musa karina gerar anak laki simerumur tellupuluh soh mi limapuluh tahun siterbaingsa dèng mengulaken siulaenken i Undung-undung Jahowa. 24Kalak i mo idokken lako merembah barang-barang èn. 25Kaèn tudung Undung-undung i dekket tutupna kettan bagasen dekket sikettan ruar ibas bebbak halus nai, kaèn sinipèntu Undung-undung, 26kirè-kirè dekket nasa tinalina i kasèan i sikuliling Undung-undung dekket langgaten, kaèn pèntu pengkeruhen kasèan, dekket karina haliu sipakèen lako memajek karina sinigegolen i. Kalak i mo mertanggung jawab i karina ulaen simerperdemuen dekket ugas-ugasen idi. 27Si Musa dekket si Aron kennah memerèso ulaen sinipesakat si Aron dekket dukak-dukakna bai kalak Gerson idi asa iulaken, janah nasa barang sipatut embahen asa iembah. 28Imo ulaen kalak Gerson ibas Undung-undung; ulaen i kennah iulaken siniuluken si Itamar, anak Imam Aron.
Ulaen kalak Lewi i horong si Merari nai
29Idokken Jahowa mo si Musa mengkèrah kalak Lewi i kaum si Merari nai mengèkutken horong kalak i gennep. 30Kennah isuratken si Musa karina anak laki simerumur tellupuluh soh mi limapuluh tahun siterbaingsa mengulaken karèjo sipatut ulaenken i Undung-undung Jahowa. 31Ulaen kalak i mo ibaing lako merembah rangka-rangka Undung-undung i, balok-balokna, tihangna dekket lantena. 32Bagi ma dekket tihang-tihang kasèan kuliling Undung-undung i bak henjellenna, pasek-pasekna dekket tinali tinali bak karina perkekkas siniperluken lako pejengjengkensa. Karina kalak ibakin merembahen ugasen tertentu. 33Imo ulaen horong Merari; karina siniulaken kalak i i Undung-undung Jahowa kennah iulaken siniuluken si Itamar, anak Imam Aron.
Ikerah karina kalak Lewi
34-48Rembang mi perèntah Jahowa, ibaing si Musa, si Aron dekket pengulu bangsa i mo pengkèrahen meradepken sitellu horong ibas marga Lewi nai, imo si Kehat, si Gerson dekket si Merari. Ibaing kalak i ngo pengkèrahen i sesser bages perjabu-jabu. Isurat kalak i ngo karina gerar anak laki simerumur tellupuluh sakat mi limapuluh tahun siterbaingsa dèng mengulaken ulaen sipatut ulaenken i Undung-undung Jahowa. En mo hasilna:
| Pinempar | Buè Kalakna |
|---|---|
| Si Kehat | 2.750 |
| Si Gerson | 2.630 |
| Si Merari | 3.200 |
| Pulung karina: | 8.580 |
49Merkitè perèntah Jahowa tarap si Musa, gennep mo isuratken janah isohken tanggung jawab barang kadè sikennah ikebbasi bak kadè sikennah embahenna.
Currently Selected:
4 Musa 4: LAIBTD
Highlight
Copy
Compare
Share
Want to have your highlights saved across all your devices? Sign up or sign in
@ LAI 1998 Indonesian Bible Society (Lembaga Alkitab Indonesia)
@LAI 2022 Indonesian Bible Society (Lembaga Alkitab Indonesia)
