4 Musa 3
3
Dukak-dukak si Aron
1Enda mo simpangaen si Aron dekket si Musa sinderrang mengerana Jahowa taba si Musa i babo Delleng Sinai. 2#4 Ms. 26:60 Lot ngo empat anak si Aron: Situaen mergerar si Nadab, nai si Abihu, si Eleazar dekket si Itamar. 3Ipebangkit mo kalak i gabè imam merkitè mengarirken minak mi babo takal kalak i. 4#3 Ms. 10:1-2; 4 Ms. 26:61 Tapi matè ngo si Nadab dekket si Abihu i gurun pasir Sinai, tikan menghadep Jahowa kalak i merembah api siso halal. Oda lot dukak kalak i sidua. Asa sidekkah nggelluh si Aron, mengulaken ulaen imam ngo si Eleazar dekket si Itamar.
Kalak Lewi iteddo lako mengkebasi imam-imam
5Nina Jahowa mo taba si Musa, 6“Dokken mo marga Lewi roh menghadep, janah kalak i mo dokken gabè perkebbas si Aron. 7I Undung-undungKu mo kalak i mengula janah kennah mengkebasi imam-imam bak karina ummat i merkitè ulaen kalak i i Undung-undungKu. 8Ulaen kalak i imo mengurus karina haliu Undung-undungKu dekket mengulaken ulaen i Undung-undungKu idi sikira gancih kalak Israel. 9I bangsa Israel nai, pellin marga Lewi ngo kessa Kudokken tettap mengkebasi si Aron dekket pinemparna. 10Tapi si Aron dekket dukak-dukakna kennah pebangkitenmu lako mengulaken ulaen imam; laènken kalak i, barang isè sambing simencuba mengulaken ulaen idi kennah ihukum matè.”
11Nina Jahowa mo mbang si Musa, 12-13#2 Ms. 13:2 “Kupilih ngo bagèndari kalak Lewi gabè milikKu. Tikan Kubunuh karina anak situaen bangsa Mesir, Kupejaè mo bangKu karina anak situaen kalak Israel dekket karina pinakan kalak i si lebbèen tubuh. Karinana idi Aku sidasa. Sikira gancih anak situaen kalak Israel, Kupilih ngo kalak Lewi lako baKu; gabè Aku mo sidasa kalak i. Aku ngo Jahowa.”
Kalak Lewi ikèrah
14I gurun pasir Sinai idokken Jahowa mo si Musa 15memahan daptar gerar-gerar kalak Lewi mengèkutken empung dekket horongna gennep; gennep anak daholi simeru- mur sada bulan mi babo kennah isuratken gerarna. 16Nai iulaken si Musa mo perèntah Jahowa idi. 17-20Lot ngo tellu daholi dukak si Lewi imo: Si Gerson, si Kehat dekket si Merari. Kalak i mo empung simemempar kaum sinigegolen mengèkutken gerar kalak i. Lot ngo dua daholi dukak si Gerson imo: Si Libni dekket si Simei. Empat ngo daholi dukak si Kehat imo: Si Amram, si Jizhar, si Hebron dekket si Uziel. Dua ngo daholi dukak si Merari imo: Si Mahli dekket si Musi. Kalak idi mo empung horong sinigeraren mengèkutken gerar kalak i.
21Horong Gerson imo kaum Libni dekket kaum Simei. 22Buè horong Gerson daholi simerumur sada bulan mi babo sitersurat imo 7500 kalak. 23-24Si Elyasaf anak si Lael ngo pengulu horong i. Ibas perundung-undungen bangsa Israel kalak i mo merbekkas kettan kesunduten kan podi Undung-undung Jahowa. 25Mengkebasi Undung-undung Jahowa, kalak i ngo mertanggung jawab tersèngèt Undung-undung dekket pèntuna, kaèn i pèntu lako mbengket mi bagasen, 26kirè-kirè kasèan simengkulilingi Undung-undung dekket lang- gaten, dekket kirè-kirè pèntu kasèan idi. Ka- lak i mo mertanggung jawab tersèngèt karina ulaen simerdemmu dekket ugas-ugasen idi.
27Horong si Kehat imo: Kaum Amram, Jizhar, Hebron, dekket kaum Uziel. 28Daholi simerumur sada bulan mi babo ibas kaum idi nai buèna karina 8.600 kalak. Kalak idi mo sikarèjo menjamotken barang-barang i Undung-undung Jahowa. 29-30Si Elisafan anak si Uziel mo mengerajai kaum idi. Ibas perundung-undungen, merbekkas mo kalak i kettan Selatan Undung-undung Jahowa. 31Kalak i mo simertanggung jawab tersèngèt Pèti Perpadanen, mèja, nènèh lampu, langgaten-langgaten, haliu-haliu sinipakè imam i Bilik Simbadia, dekket kirè-kirè kellang-kellang Bilik Simbadia. Kalak idi mo mertanggung jawab i karina ulaen simerperdemuen dekket barang-barang idi.
32Ekutèn marga Lewi imo si Eleazar, anak si Aron. Ia mo memerèso kalak simerkebbas i Bilik Simbadia.
33Horong Merari imo kalak sisimpangaen si Mahli dekket simpangaen si Musi. 34Anak laki simerumur sada bulan mi babo ibas horong idi nai buèna karina 6.200 kalak. 35Si Zuriel anak si Abihail mo èkuten horong idi. Ibas perundung-undungen kettan Utara Undung-undung Jahowa ngo ibuat horong i bekkasna. 36Kalak i mo mertanggung jabab tersèngèt rangka Undung-undung i, balokna, tihangna, hatapna dekket karina perkekkas bak nasa ulaen simerperdemuen dekket ugas-ugasen idi. 37Bagi ma tersèngèt tihang-tihang, hatap, pasek-pasek dekket nasa tinali i kasèan kettan ruar.
38Ibagessen perundung-undungen, si Musa dekket si Aron bak dukak-dukakna kennah memuat bekkas i lebbè Undung-undung Jahowa, kettan kebincarenna. Kalak idi mo simertanggung jabab ibas ulaen menguluken bangsa Israel memoji Jahowa i Bilik Simbadia. Laènken kalak i, barang isè sambing simencuba mengulaken ulaen idi kennah ihukum matè. 39Karina anak laki simerumur sada bulan mi babo ibas marga Lewi nai isuratken si Musa mengèkutken horongna gennep merkitè perèntah Jahowa, pulung karina 22.000 kalak.
Kalak Lewi gabè penggancih anak situaen Israel
40-41Nai nina Jahowa mo taba si Musa, “Karina anak laki situaen kalak Israel Aku ngo sidasa i. Suratken mo gerar-gerar kalak i simerumur sibulan nai mi babo. Tapi sikira gancih kalak i, Kuteddo mo karina kalak Lewi gabè milikKu. Aku ngo Jahowa! Janah pinakan kalak Lewi pè Kuteddo mo gabè gancih karina pinakan kalak Israel siperlebbè tubuh.” 42Nai iulaken si Musa mo kadè siniperèntahken Jahowa; isurati mo karina gerar-gerar anak laki situaen 43simerumur sada bulan mi babo. Buè kalak i karina 22.273 kalak.
44Nai nina Jahowa nola mo bai si Musa, 45“Kelini mo kalak Lewi baKu sikira penggancih karina anak laki situaen bangsa Israel; bagi ma pinakan kalak Lewi sikira penggancih pinakan kalak Israel. 46Kumerna buèen anak laki situaen kalak Israel 273 kalak daripada buè kalak Lewi, silebbihna idi kennah tebbusen ndènè. 47Gennep anak, kennah gararen ndènè lima kèpèng pirak mengèkutken harga simerlaku i Undung-undungKu; 48berrèken mo kèpèng idi bai si Aron dekket dukak-dukakna.” 49Iulaken si Musa mo perèntah Jahowa idi. 50Ibuat mo 1.365 kèpèng pirak, 51janah iberèken taba si Aron dekket dukak-dukakna.
Currently Selected:
4 Musa 3: LAIBTD
Highlight
Copy
Compare
Share
Want to have your highlights saved across all your devices? Sign up or sign in
@ LAI 1998 Indonesian Bible Society (Lembaga Alkitab Indonesia)
@LAI 2022 Indonesian Bible Society (Lembaga Alkitab Indonesia)
