4 Musa 1
1
Kalak Israel memaing pengkèrahen perlebbè
1 #
4 Ms. 26:1-51
I ari sada bulan dua i tahun peduaken enggo kessa itadingken bangsa Israel tanoh Mesir, mengerana mo Jahowa taba si Musa ibas Undung-undung Jahowa i gurun Sinai. Nina mo, 2“Kennah mo kono dekket si Aron mengkèrah karina bangsa Israel, mengèkutken kaum dekket horong kalak i gennep. Baing mo daptar gerar-gerar karinana anak laki 3simerumur duapuluh tahun mi babo sindorok gabè soridadu. Kennah idaptar ngo kalak i mengèkutken nuhnuhenna gennep. 4I gennep marga nai, pido mo sada kalak mahan pengulu kaum lako mengurupi kènè.” 5-16En mo gerar-gerar kalak i sienggo ipilih ibas bangsa i nai lako mengurupi si Musa dekket si Aron janah gabè pengulu i gennep-gennep marga, imo:
| Marga | Simenguluken |
|---|---|
| Ruben | Si Elizur dukak si Syedeur |
| Simeon | Si Selumiel dukak si Zurisyadai |
| Juda | Si Nahason dukak si Aminadab |
| Isasar | Si Netaneel dukak si Zuar |
| Zebulon | Si Eliab dukak si Helon |
| Efraim | Si Elisama dukak si Amihud |
| Manasye | Si Gamaliel dukak si Pedazur |
| Benjamin | Si Abidan dukak si Gideoni |
| Dan | Si Ahiezer dukak si Amisyadai |
| Asyer | Si Pagiel dukak si Okhran |
| Gad | Si Elyasaf dukak si Rehuel |
| Naptali | Si Ahira dukak si Enan |
17Merkitè pengurupien si sipuluh dua kalak i, isuruh si Musa dekket si Aron 18mo karina ummat i merpulung i ari sada bulan dua, nai isusun mo tarombo kalak i merempung-empung mengèkutken marga kalak i. Isurat janah ikèrah mo karina gerar anak laki si- merumur duapuluh tahun nai mi babo, 19ba- gè sinidokken Jahowa. Ibahanken si Musa ngo karina idi i gurun Sinai. 20-46Gennep anak laki simerumur duapuluh tahun mi babo sindorok gabè soridadu isuratken mo gerarna mengèkutken horong empungna mulai bai si Ruben nai, anak situaen si Jakob soh taba si Naptali. Buè kalak i imo:
| Marga | Buè Kalakna |
|---|---|
| Ruben | 46.500 |
| Simeon | 59.300 |
| Gad | 45.650 |
| Juda | 74.600 |
| Isasar | 54.400 |
| Zebulon | 57.400 |
| Efraim | 40.500 |
| Manasye | 32.200 |
| Benjamin | 35.400 |
| Dan | 62.700 |
| Asyer | 41.500 |
| Naftali | 53.400 |
| Pulung karina: | 603.550 |
47Ukum kalak Lewi oda pella isuratken rebbak dekket marga-marga sidèban, 48kumerna enggo idokken Jahowa mbang si Musa, 49“Sinderrang isurati kono gerar-gerar kalak sindorok gabè soridadu, ulang pella suratken marga Lewi. 50Dokken mo kalak i mengkebasi Undung-undungKu dekket karina haliuna. Ulaen kalak i imo mengosong Undung-undungKu dekket mengurus haliuna. Kennah merundung-undung ngo kalak i merkuliling. 51Mula mbungkas kènè, kennah irontas kalak Lewi ngo Undung-undungKu, nai balik nola mo ipejengjeng i gennep bekkas permalamen sirimbaru. Laènken kalak i, barang isè sambing simenjolmiti Undung-undung idi kennah ihukum matè. 52Kalak Israel sidèbanna i pè kennah ipejengjeng undung-undung kalak i merlungguk-lungguk, gennep kalak mersièngèt lunggukenna i sikuliling bandèrana gennep. 53Tapi ukum kalak Lewi kennah igembar Undung-undungKu ngo kalak i merundung-undung. Kennah ijaga kalak i ngo, asa ulang lot barang isè mendessingi, memaingken Aku gabè melaga janah menghukum bangsa Israel.” 54Nai iulaken kalak Israel mo nasa siniperèntahken Jahowa bai si Musa.
Currently Selected:
4 Musa 1: LAIBTD
Highlight
Copy
Compare
Share
Want to have your highlights saved across all your devices? Sign up or sign in
@ LAI 1998 Indonesian Bible Society (Lembaga Alkitab Indonesia)
@LAI 2022 Indonesian Bible Society (Lembaga Alkitab Indonesia)
