3 Musa 27
27
Hatoren tersèngèt pèlèen bai Jahowa
1Iberèken Jahowa mo bai si Musa 2hatoren ènda lako bai bangsa Israel. Mula lot sada kalak ipèlèken bai Jahowa lako menèbbus bagah-bagahna kin, ndorok ngo ia itebbus merkitè riar, 3-7mengèkutken harga sienggo ncemmal merdalan i Undung-undung Jahowa:
– ibabo 60 tahun:
| anak laki | 15 riar pirak |
| daberru | 10 riar pirak |
– ikellang-kellang 20-60 tahun:
| anak laki | 50 riar pirak |
| daberru | 30 riar pirak |
– ikellang-kellang 5-20 tahun:
| anak laki | 20 riar pirak |
| daberru | 10 riar pirak |
– iterruh 5 tahun:
| anak laki | 5 riar pirak |
| daberru | 3 riar pirak |
8Mula ncorsu ngo kalak simerbagah-bagah i lako menggarar bagè arga sienggo itentuken idi, kennah iarahken ngo kalakna sienggo ipèlèken bai Jahowa idi mendahi imam. Kennah Imam mo memahanken moru argana mengèkutken kesanggupen kalak i.
9-10Mula pinakan halal ngo siniperbagahna i janah ndorok ijalo mahan pèlèen bai Jahowa, oda ndorok gancihen kalak simerbagah-bagah i pinakan idi dekket pinakan sidèban, kumerna karina sinipèlèken bai Jahowa, gabè Jahowa mo sidasa. Mula itukari nola katèna, duana mo pinakan i gabè milik Jahowa. 11Tapi mula haram ngo pinakan i siso ndorok ijalo mahan pèlèen bai Jahowa, kennah iiring kalak simerbagah-bagah i mo pinakan idi mendahi imam. 12Imam mo memakin hargana mengèkutken pengidahna mi pinakan i. Janah harga sienggo ibahanken imo harga patè. 13Mula naing itebbus kalak i pinakanna i, kennah igarar hargana janah itambahi duapuluh parsen nai.
14Mula lot sada kalak memèlèken bagesna bai Jahowa, itentuken imam mo hargana mengèkutken rumang bages idi. Harga sienggo itentuken imo harga patè. 15Mula naing itebbus nola katèna bagesna i, kennah gararenna nasa argana itambahi duapuluh parsen.
16Mula lot sada kalak memèlèken dèba ibas tanohna nai bai Jahowa, hargana kennah itentuken mengèkutken buè bennih siniperluken lako menuani tanoh i. Gennep duapuluh kilo pagè hargana sipuluh kèpèng pirak. 17Mula ipèlèken tanoh idi mulai ibas Tahun Olihenken nai, kennah dom hargana igarar. 18Mula ipèlèken tanoh idi kessa lebbè Tahun Olihenken, kennah imam ngo menaksir harga cingki mengèkutken buè tahun silotna dèng soh mi Tahun Mengolihken sinaing roh nola, nai itentuken mo harga termurahen. 19Mula sèkel ngo kalak simemèlèken juma idi naing menebbus, kennah igarar mo hargana itambahi dekket duapuluh parsen. 20Mula idèaken juma idi oda dèng lebbè itebbus bai Jahowa nai, oda nèngè ia merhak lako menebbus jumana i. 21I Tahun Mengolihken sinaing roh nola, gabè milik Jahowa mo juma idi soh sidekkah-dekkahna, janah iberèken bai imam.
22Mula lot sada kalak memèlèken sinterpuk juma sienggo itokor kin bai Jahowa, 23kennah itaksir imam mo hargana mengèkutken buè tahun silotna dèng soh mi Tahun Mengolihken sinaing roh. Nai kennah igarar kalak i mo hargana nasa harga sidarinkenna i. Gabè milik Jahowa mo kèpèng i. 24I Tahun Mengolihken, kennah iolihken juma i bai sidasa kin barang bai pinemparna.
25Karina harga kennah ibahanken me- ngèkutken harga simerlakku i Undung-undung Jahowa.
26Pinakan siperlebbè tubuh milik Jahowa ngo i, jadi oda ndorok pèlènken mahan pèlèen sitergerrek ibas ukur. Anak lembu, anak biri-biri barang pè anak kambing siperlebbè tubuh Jahowa ngo sidasa i. 27Tapi ukum pinakan haram siperlebbè tubuh ndorok ngo itebbus mengèkutken harga simerlaku i Undung-undung Jahowa itambahi duapuluh parsen. Mula oda itebbus, ndorok ngo idèa pinakan i bai sidèban mengèkutken harga simerlaku i Undung-undung Jahowa.
28 #
4 Ms. 18:14
Sada kalak poda ndorok merdèa barang menebbus barang kadè sienggo ihujuken bai Jahowa, tah jelma pè i, tah pinakan barang tanoh. Milik Jahowa ngo i soh mi amman sumendah. 29Salang jelma sienggo ihujuken bai Jahowa lako ibinasaken oda ndorok itebbus; kennah ibunuh ngo ia.
30 #
4 Ms. 18:21; 5 Ms. 14:22-29 Sipersipuluh ibas karina hasil tanoh, tah pagè i barang buah-buahen, mahan bagian Jahowa ngo i. 31Mula lot naing menebbus dèba ipas hasil idi nai, kennah gararenna hargana bagè sienggo itentuken tambah duapuluh parsèn. 32Sada daripada gennep sipuluh pinakan, milik Jahowa ngo i. Mula ibilang pinakan i, pinakan pesipuluhken gabè milik Jahowa. 33Oda ndorok memilih-milih sidasa pinakan i, siapai selloh siapai nggodo. Oda ma ndorok igancihi. Mula igancihi katèna, duana mo pinakan i gabè milik Jahowa janah oda ndorok itebbus.
34Idi mo perèntah iberèken Jahowa i babo delleng Sinai bai si Musa lako bai bangsa Israel.
Currently Selected:
3 Musa 27: LAIBTD
Highlight
Copy
Compare
Share
Want to have your highlights saved across all your devices? Sign up or sign in
@ LAI 1998 Indonesian Bible Society (Lembaga Alkitab Indonesia)
@LAI 2022 Indonesian Bible Society (Lembaga Alkitab Indonesia)
